హైన్రిక్ క్లాసెన్

హెన్రిచ్ క్లాసెన్ (జననం 1991 జూలై 30) దక్షిణాఫ్రికా జాతీయ క్రికెట్ జట్టు కోసం ఆడుతున్న దక్షిణాఫ్రికా క్రికెటరు. ^[1] అతన్ని 2015 ఆఫ్రికా T20 కప్ కోసం నార్తర్న్స్ క్రికెట్ జట్టులోకి తీసుకున్నారు. ^[2] 2021 ఫిబ్రవరిలో క్లాసెన్ T20I మ్యాచ్‌లో మొదటిసారి దక్షిణాఫ్రికాకు కెప్టెన్‌గా వ్యవహరించాడు.^[3] 2023 మార్చి 21న, వెస్టిండీస్‌తో జరిగిన మ్యాచ్‌లో క్లాసెన్, 54 బంతుల్లో తన రెండవ వన్‌డే సెంచరీని సాధించాడు.

హైన్రిక్ క్లాసెన్

వ్యక్తిగత సమాచారం
పూర్తి పేరు	హైన్రిక్ క్లాసెన్
పుట్టిన తేదీ	(1991-07-30) 30 జూలై 1991 (age 33) ప్రిటోరియా, ట్రాన్స్‌వాల్ ప్రావిన్స్, దక్షిణాఫ్రికా
బ్యాటింగు	కుడిచేతి వాటం
బౌలింగు	కుడిచేతి ఆఫ్ స్పిన్
పాత్ర	వికెట్-కీపర్ బ్యాటరు
అంతర్జాతీయ జట్టు సమాచారం
జాతీయ జట్టు	దక్షిణాఫ్రికా
తొలి టెస్టు (క్యాప్ 339)	2019 అక్టోబరు 19 - ఇండియా తో
చివరి టెస్టు	2023 మార్చి 8 - వెస్టిండీస్ తో
తొలి వన్‌డే (క్యాప్ 125)	2018 ఫిబ్రవరి 7 - ఇండియా తో
చివరి వన్‌డే	2023 ఏప్రిల్ 2 - నెదర్లాండ్స్ తో
వన్‌డేల్లో చొక్కా సంఖ్య.	45
తొలి T20I (క్యాప్ 75)	2018 ఫిబ్రవరి 18 - ఇండియా తో
చివరి T20I	2023 మార్చి 28 - వెస్టిండీస్ తో
T20Iల్లో చొక్కా సంఖ్య.	45
దేశీయ జట్టు సమాచారం
Years	Team
2011/12–present	నార్దర్స్న్
2014/15–2020/21	Titans
2018	రాజస్థాన్ రాయల్స్
2018	డర్బన్ హీట్
2019	రాయల్ ఛాలెంజర్స్ బెంగళూర్
2022	గయానా Amazon వారియర్స్
2022/23	డర్బన్ సూపర్ జయింట్స్
2023	సన్ రైజర్స్ హైదరాబాద్
2023-present	Seattle Orcas
కెరీర్ గణాంకాలు
పోటీ టెస్టులు వన్‌డేలు T20I FC మ్యాచ్‌లు 4 36 40 85 చేసిన పరుగులు 104 1,080 704 5,347 బ్యాటింగు సగటు 13.00 40.00 24.27 46.09 100లు/50లు 0/0 2/5 0/4 12/24 అత్యుత్తమ స్కోరు 35 123* 81 292 వేసిన బంతులు 0 30 6 88 వికెట్లు - 0 0 2 బౌలింగు సగటు - – – 25.00 ఒక ఇన్నింగ్సులో 5 వికెట్లు - – – 0 ఒక మ్యాచ్‌లో 10 వికెట్లు - – – 0 అత్యుత్తమ బౌలింగు - – – 1/12 క్యాచ్‌లు/స్టంపింగులు 10/2 34/5 24/3 272/23
మూలం: ESPN cricinfo, 2 April 2023

దేశీయ, T20 కెరీర్

2017 ఆగష్టులో, T20 గ్లోబల్ లీగ్ మొదటి సీజన్ కోసం నెల్సన్ మండేలా బే స్టార్స్ జట్టులో క్లాసెన్ ఎంపికయ్యాడు. ^[4] అయితే, 2017 అక్టోబరులో, క్రికెట్ దక్షిణాఫ్రికా మొదట్లో టోర్నమెంట్‌ను నవంబరు 2018కి వాయిదా వేసింది, ఆ తర్వాత వెంటనే రద్దు చేసింది. ^[5]

2018 ఏప్రిల్ 2 న క్లాసెన్, స్టీవ్ స్మిత్ స్థానంలో ఇండియన్ ప్రీమియర్ లీగ్ జట్టు రాజస్థాన్ రాయల్స్‌లో చేరాడు. ^[6]

2018 జూన్లో, 2018-19 సీజన్‌లో టైటాన్స్ జట్టులో క్లాసెన్ జట్టులో చోటు దక్కించుకున్నాడు. ^[7] 2018 అక్టోబరులో అతను, ఎంజాన్సీ సూపర్ లీగ్ T20 టోర్నమెంట్ మొదటి ఎడిషన్ కోసం డర్బన్ హీట్ జట్టులో ఎంపికయ్యాడు. ^{[8] [9]}

2018 డిసెంబరులో, 2019 ఇండియన్ ప్రీమియర్ లీగ్ కోసం ప్లేయర్ వేలంలో క్లాసెన్‌ను రాయల్ ఛాలెంజర్స్ బెంగళూరు కొనుగోలు చేసింది. ^{[10] [11]} 2019 జూన్లో అతను, 2019 గ్లోబల్ T20 కెనడా టోర్నమెంట్‌లో టొరంటో నేషనల్స్ ఫ్రాంచైజీ జట్టు తరపున ఆడేందుకు ఎంపికయ్యాడు. ^[12] 2019 జూలైలో, అతను యూరో T20 స్లామ్ క్రికెట్ టోర్నమెంట్ యొక్క ప్రారంభ ఎడిషన్‌లో గ్లాస్గో జెయింట్స్ తరపున ఆడటానికి ఎంపికయ్యాడు. ^{[13] [14]} అయితే, మరుసటి నెలలో ఆ టోర్నీని రద్దు చేసారు. ^[15]

2019 సెప్టెంబరులో క్లాసెన్‌ను, 2019 ఎంజాన్సీ సూపర్ లీగ్ టోర్నమెంట్ కోసం ష్వానే స్పార్టాన్స్ జట్టులోకి తీసుకున్నారు.^[16] 2020 IPL వేలానికి ముందు అతన్ని రాయల్ ఛాలెంజర్స్ బెంగళూరు విడుదల చేసింది. ^[17]

క్రికెట్ సౌతాఫ్రికా నేషనల్ అకాడమీ కోచ్ అయిన షుక్రి కాన్రాడ్, క్లాసెన్ MS ధోనీకి సమానమైన ఆటగాడిగా మారగలడని పేర్కొన్నాడు. ^[18] 2015 సెప్టెంబరులో, "ఈ పరిస్థితిలో హైన్రిక్ చాలా ప్రశాంతంగా ఉంటాడు. అతను ప్రస్తుతం లోనే ఉంటాడు. అతనిలో ఒక 'MS ధోని' ఉన్నాడు. అతని ఆటకు నిజంగా సైడ్‌షోలు లేవు. ఆటలో ప్రత్యర్థిపై దాడి చేస్తాడు. ఆట తన వద్దకు వచ్చేదాకా ఆగడు. అతనిలో నాకు నచ్చేది అదే. అతను ఎంత దృఢంగా ఉండాలో అంత దృఢంగా ఉంటాడు." ^[18]

2021 ఏప్రిల్లో, దక్షిణాఫ్రికాలో 2021–22 క్రికెట్ సీజన్‌కు ముందు క్లాసెన్ నార్తర్న్స్ స్క్వాడ్‌లో ఎంపికయ్యాడు. ^[19]

2023 ఫిబ్రవరిలో, క్లాసెన్ SA20 టోర్నమెంట్‌లో రెండవ సెంచరీని సాధించాడు, ప్రిటోరియా క్యాపిటల్స్‌పై డర్బన్ సూపర్ జెయింట్స్ తరఫున 44 బంతుల్లో 104 నాటౌట్ చేశాడు. 2023 మేలో, తన మాజీ జట్టు బెంగుళూరుపై 51 బంతుల్లో 104 పరుగులు చేసి తన తొలి IPL సెంచరీని కూడా చేసాడు. ^[20]

2023 జూలైలో, క్లాసెన్ MI న్యూయార్క్‌పై 44 బంతుల్లో 110 పరుగులు చేసి మేజర్ లీగ్ క్రికెట్‌లో సియాటెల్ ఓర్కాస్ తరఫున సెంచరీ చేసిన మొదటి వ్యక్తి అయ్యాడు. ^[21]

అంతర్జాతీయ కెరీర్

2017 ఫిబ్రవరిలో, న్యూజిలాండ్‌తో జరిగిన సిరీస్‌లో దక్షిణాఫ్రికా టెస్టు జట్టులో క్లాసెన్ ఎంపికయ్యాడు గానీ ఆడలేదు. ^[22]

2018 ఫిబ్రవరిలో గాయపడిన క్వింటన్ డి కాక్ స్థానంలో క్లాసెన్‌ను భారత్‌తో సిరీస్ కోసం దక్షిణాఫ్రికా వన్డే ఇంటర్నేషనల్ (వన్‌డే) జట్టులో తీసుకున్నారు. ^[23] 2018 ఫిబ్రవరి 7న భారతదేశంపై తన వన్‌డే ప్రవేశం చేసాడు. ^[24] తన రెండవ వన్‌డేలో భారత్‌తో జరిగిన స్వదేశీ సిరీస్‌లో నాల్గవ వన్‌డేలో 27 బంతుల్లో 43 పరుగులు చేసి, తన మొదటి అంతర్జాతీయ మ్యాన్ ఆఫ్ ది మ్యాచ్ అవార్డును గెలుచుకున్నాడు.^[25]

అదే నెలలో క్లాసెన్, దక్షిణాఫ్రికా ట్వంటీ 20 ఇంటర్నేషనల్ (T20I) జట్టులో, భారత్‌తో జరిగిన సిరీస్‌లో చోటు దక్కించుకున్నాడు. ^[26] 2018 ఫిబ్రవరి 18న భారతదేశంపై దక్షిణాఫ్రికా తరపున తన తొలి T20I ఆడాడు.^[27] ఫిబ్రవరి 21న, దక్షిణాఫ్రికా 6 వికెట్ల తేడాతో గెలుపొందిన రెండో T20I లో క్లాసెన్ తన తొలి T20I అర్ధ శతకం సాధించాడు, 30 బంతుల్లో 3 ఫోర్లు, 7 సిక్సర్‌లతో 69 పరుగులు చేసినందుకు మ్యాన్ ఆఫ్ ది మ్యాచ్ కూడా అందుకున్నాడు. ^{[28] [29]}

2018 ఫిబ్రవరిలో, ఆస్ట్రేలియాతో సిరీస్ కోసం దక్షిణాఫ్రికా టెస్టు జట్టులో క్లాసెన్ ఎంపికయ్యాడు, కానీ ఆడలేదు. ^[30] 2019 ఆగష్టులో, గాయపడిన రూడీ సెకండ్ స్థానంలో అతనిని భారతదేశంపై వారి సిరీస్ కోసం దక్షిణాఫ్రికా టెస్టు జట్టులో చేర్చారు. ^{[31] [32]} అతను 2019 అక్టోబరు 19న భారతజట్టుతో దక్షిణాఫ్రికా తరపున తన టెస్టు రంగప్రవేశం చేసాడు.^[33] 2020 ఫిబ్రవరి 29న, క్లాసెన్, ఆస్ట్రేలియాపై అజేయంగా 123 పరుగులు చేసి, వన్‌డే మ్యాచ్‌లో తన మొదటి సెంచరీని సాధించాడు.^[34]

2021 జనవరిలో, పాకిస్తాన్‌తో పాకిస్తాన్‌లో జరిగిన సిరీస్‌కు దక్షిణాఫ్రికా T20I జట్టుకు కెప్టెన్‌గా క్లాసెన్ ఎంపికయ్యాడు. ^[35] 2021 ఏప్రిల్లో, టెంబా బావుమా గాయం కారణంగా తప్పుకున్నాక, క్లాసెన్ మళ్లీ దక్షిణాఫ్రికా T20I కెప్టెన్‌గా ఎంపికయ్యాడు, ఈసారి పాకిస్తాన్‌తో జరిగే వారి స్వదేశీ సిరీస్‌కి. ^[36] 2021 సెప్టెంబరులో, క్లాసెన్ 2021 ICC పురుషుల T20 ప్రపంచ కప్ కోసం దక్షిణాఫ్రికా జట్టుకు ఎంపికయ్యాడు. ^[37]