From Wikipedia, the free encyclopedia
మొజాంజాహి మార్కెట్ తెలంగాణ రాష్ట్ర రాజధాని హైదరాబాదులోని నాంపల్లికి సమీపంలో ఉన్న మార్కెట్.[1][2][3] వివిధ రకాల వస్తువులతో కూడిన నాలుగు వందల దుకాణాలు ఈ మార్కెట్ లో ఉన్నాయి. హైదరాబాదు పట్టణ అభివృద్ధి సంస్థ (హుడా) చే వారసత్వ కట్టడంగా గుర్తించబడింది.
నిజాం రాజు మీర్ ఉస్మాన్ అలీ ఖాన్ కాలంలో తన రెండవ కుమారుడు మొజాం జా బహదూర్ పేరుమీద 1935, జనవరిలో ఈ మార్కెట్ నిర్మించబడింది. దీనిని తెలంగాణ హైకోర్టు నిర్మాణ శైలీ నమూనాలో బూడిద రంగు గ్రానైట్ రాళ్ళతో నిర్మించారు. దీనిపై 7వేల రూపాయలతో గడియారాన్ని కూడా ఏర్పాటుచేశారు.[4]
ఇందులో జాంబాగ్ పూల మార్కెట్ ఒక భాగంగా ఉండేది. 1980లో ఇక్కడి పళ్ళ మార్కెట్ కొత్తపేట పళ్ళ మార్కెట్ కు మార్చబడింది.[5] ప్రపంచవ్యాప్తంగా గుర్తింపుపొందిన ఫేమస్ ఐస్ క్రీం షాప్ కూడా ఈ మార్కెట్ లో ఉంది.[6][7] ఇక్కడికి సమీపంలో కరాచీ బేకరి ఉంది.
తెలంగాణ ప్రభుత్వం 15 కోట్లతో మొజాంజాహి మార్కెట్ కాంప్లెక్స్ పునరుద్ధరణ చేసింది. ఆహ్లాదకర వాతావరణంలో సందర్శకులను ఆకర్షించేలా క్లాక్టవర్ను తీర్చిదిద్దడంతోపాటు, స్వాతంత్ర్య దినోత్సవం రోజున ఎగురవేసేలా వంద ఫీట్ల భారత జాతీయ జెండాను ఏర్పాటుచేశారు. దీనిని 2020, ఆగస్టు 14న రాష్ట్ర మున్సిపల్, ఐటీశాఖ మంత్రి కల్వకుంట్ల తారక రామారావు ప్రారంభించి, మొజాంజాహి మార్కెట్ చరిత్ర పుస్తకం ఆవిష్కరణ చేశాడు. ఈ కార్యక్రమంలో రాజ్యసభ సభ్యులు కే కేశవరావు, హైదరాబాద్ ఎంపీ అసదుద్దీన్ ఒవైసీ, మంత్రులు మహమూద్ అలీ, సబితా ఇంద్రారెడ్డి, తలసాని శ్రీనివాస్ యాదవ్, వి. శ్రీనివాస్ గౌడ్, గోషామహల్ ఎమ్మెల్యే టి. రాజాసింగ్, నగర మేయర్ బొంతు రామ్మోహన్, డిప్యూటీ మేయర్ బాబా ఫసియుద్దీన్, పురపాలక పట్టణాభివృద్ధిశాఖ ప్రిన్సిపల్ కార్యదర్శి అర్వింద్కుమార్, జీహెచ్ఎంసీ కమిషనర్ లోకేష్ కుమార్ తదితరులు పాల్గొన్నారు.[8][9]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.