జిమ్నాస్టిక్స్
From Wikipedia, the free encyclopedia
జిమ్నాస్టిక్స్ వ్యాయామ సంబధిత ఒక రకమైన క్రీడ. ఇందులో బలం, వశ్యత, సమతుల్యత, చురుకుదనం, ఓర్పు, నియంత్రణ అవసరమైతాయి. ఈ క్రీడ ప్రాచీన గ్రీకులు తమ గుర్రాలను అధిరోహించడానికి, దిగడానికి చేసే వ్యాయామ విన్యాసాల నుండి అలాగే వారి సర్కస్ నైపుణ్యాల నుండి ఉద్భవించింది. ఒకరకంగా చెప్పాలంటే వారి ఆనాటి సాహసకృత్యాలే ఈ క్రీడకు ఆద్యంగా పేర్కొనవచ్చు.
జిమ్నాస్టిక్స్ లో చాలా క్రీడాంశాలు సమ్మిళితమై ఉంటాయి. వివిధ అంశాలలో పోటీలు కూడా జరుగుతాయి. ఈ పోటీలు అన్నిటిని ఆంతర్జాతీయ జిమ్నాస్టిక్ సమాఖ్య పర్యవేక్షిస్తుంటుంది. ప్రతి దేశం తన స్వంత జిమ్నాస్టిక్ పాలకమండలిని కలిగి ఉంటుంది. అయా పాలకమండళ్ళు ఆంతర్జాతీయ జిమ్నాస్టిక్ సమాఖ్యకు అనుసంధానమై దాని పర్యవేక్షణలో పనిచేస్తూ ఉంటాయి.పోటీ అంశాలలో ముఖ్యంగా చెప్పుకోదగినది కళాత్మక జిమ్నాస్టిక్స్. ఇందులో మహిళల కొరకు నిర్వహించే పోటీ అంశములో వాల్ట్,అన్ఈవెన్ బార్స్, బాలెన్స్ బీం, ఫ్లోర్ ఎక్సర్సైజు విభాగాలు ఉంటాయి. అలాగే పురుషుల కొరకు నిర్వహించే పోటీ అంశములో ఫ్లోర్ ఎక్సర్సైజు,పొమ్మెల్ హార్స్, స్టిల్ రింగ్స్, వాల్ట్, పారలెల్ బార్స్, హారిజాంటల్ బార్స్ విభాగాలు ఉంటాయి
ఆంతర్జాతీయ జిమ్నాస్టిక్ సమాఖ్య నిర్వహించే, గుర్తింపు పొందిన ఇతర జిమ్నాస్టిక్ అంశాలలో లయబద్దమైన (రిధమిక్) జిమ్నాస్టిక్స్,ట్రాంపోలైనింగ్, టంబ్లింగ్, ఏరోబిక్ జిమ్నాస్టిక్స్ ఉన్నాయి.ఆంతర్జాతీయ జిమ్నాస్టిక్ సమాఖ్య గుర్తింపు పొందని అంశాలలో కళాసౌందర్యాత్మకమైన (ఏస్థటిక్) బృంద జిమ్నాస్టిక్స్, పురుషుల లయబద్దమైన (రిధమిక్) జిమ్నాస్టిక్స్, టీమ్జిమ్ అంశాలు ఉన్నాయి. ఈ పోటీలలో వివిధ అంశాలలో పాల్గొనేవారు ఆయా అంశాల నియమాల ఆధారంగా వివిధ వయస్సుల క్రీడాకారులు పాల్గొనవచ్చు. ఉదాహరణకు కిండర్జిం, చిన్నారుల జిమ్నాస్టిక్స్ అంశాలలో పాల్గొనే క్రీడాకారుల వయస్సు కనీసం 20 నెలలు ఉండవచ్చు. అలాగే మనోరంజన / కాలక్షేప (రిక్రియేషన్) జిమ్నాస్టిక్ పోటీలలో కనీసం 5 సంవత్సరాల వయస్సు గల క్రీడాకారులు పాల్గొనవచ్చు. వివిధ స్థాయు పోటీలలో పాల్గొనే క్రీడాకారుల నైపుణ్యం ఆయా స్థాయిని బట్టి ఉంటుంది. అత్యుత్తమ నైపుణ్యం ఉన్న క్రీడాకారులు ప్రపంచ స్థాయి పోటీలలో పాల్గొంటారు.