"Non còmpores mercantzia russa!" (ucrainu: «Не купуй російське!») o "Boicotta cosa russa!" (ucrainu: «Бойкотуй російське!») est una campagna de resistentzia non biolenta pro andare contra su cummertziu russu in Ucraina. Sa protesta fit cumintzada in su 14 de Agustu de su 2013, pro parare fronte a s'imbargu de iscambiu cummertziale russu contra s'Ucraina. La an promòghia pro mediu de sa retza sotziale, grassias a Vidsich.[1] Sa campagna fit poi andada a innantis cumpartinde a muntones bolantinos, poster e etichettas in prus de 45 tzittades e biddas. Andande in abbassiada a su cumintzu de sas manifestadas EuroMaidan in su mese de Sant'Andrìa de su 2013, est torrada a picare pede derettu a pustis chi sa Russia fit intervènnia chin sos militares in terra ucraina.
Articulu in nugoresu
In Ucraina
In su 22 de Agustu de su 2013, sos attivistas an fattu una protesta a curtzu de s'uffitziu de amministrassione presidentziale de s'Ucraina.[2][3][4] Sa campagna at sichiu cumpartinde bolatinos, poster e etichettas in prus de 45 tzittades e biddas ucrainas.[5][6] Si at fattu fintzas impreu de carrigaduras de matrioscas russas pro sa campagna, chi at cumintzau a andare in abbassiada a su cumintzu de su gai nàu "Euromaidan".[7]
In su 2 de Martzu de su 2014, sos attivistas an cumintzau a impreare sos social networks pro dare annuntziu chi torraban a annovare s'opera de boicottazu, a disacatu de benes russos e serbitzios a costazu de siendas russas. Sa punna fit de istesiare cantu prus si podiat su soddu ucrainu dae su tretu russu, chi in cughe podian impreare pro dare amparu a sos militares russos.[8] Su boicottazu fit puru pro torrare imposta a sa crisi de Crimea e a s'interventu militare russu in Ucraina.[9][10]
In su mese de Martzu de 2014, sos attivistas an cumintzau a apparizare flash mobs in supermercados pro ispingher a sa zente a non comporare cosas russas[11][12][13] e a boicottare istatziones de gas russu[14][15][16][17], bancas[18] e cuntzertos.[19] In su mese de Aprile de su 2014, carchi tzinema in Kyiv, Lviv, e Odesa an cumintzau a non dare prus film russos.[20]
In istiu de su 2014, sos attivistas an peri apparizau flash mobs in restorantes e tzilleris russos.[21][22]
A s'acabbu de Agustu 2014, sa campagna at sichiu, custa borta contra film e serias televisivas russas in sos media ucrainos. [23][24]
In Aprile 2014, carchi produtore russu at cambiau su codiche a barras russu in cussu ucrainu.[25] Una applicassione pro Android, de lùmen Boycott Invaders, fit in isvilupu pro indittare sos produtos russos, cumpresos cussos chi cubaban s'orizine issoro.[7][8][26]
In atterube
A cumintzare dae su mese de Martzu 2014, s'opera de boicottazu la an cumpartida fintzas atteros istados, de manera ispetziale in Lettonia, Lituania, Estonia, Polonia, Georgia,[27] USA[28][29] e sa Repùblica Ceca.[30]
Sa béndia de benes russos in Ucraina est falada de su 35-50% in beranu de su 2014.[31][32] In mese de maju 2014, sos supermercados ucrainos an cumintzàu a acabbare de si picare mercantzia russa. S'imbiu de benes russos fit falàu de unu de tres.[33]
Dae su mese de jannarju a su mese de maju de su 2014, sicundu a sas crassificaduras de Standard & Poor's , bancas chin capitale russu in Ucraina an pèrdiu prus de su 50% de depositos.[34]
S'economista Andriy Novak at nau chi s'opera de boicottazu, in su mese de Martzu de su 2014, at fattu perder a s'economia de sa Federassione Russa non prus de una zuzina de miliones de dollaros. A abbisu suo, bi at una manera menzus pro facher dannu a s'economia russa, corfende unu puntu dolente - "Gazprom".[35]
S'idea de boicottare cosa russa la aìat amparada Fozzy Group, grupu ucrainu de cumpanzias chi tenet buttegas, ma non sos uffitzios rapresentativos ucrainos de "Auchan" e "Metro Cash and Carry". Sa resone fit chi issos si naran apoliticos.[36]
Andriy Dlihach, "Advanter Group" CEO, at ispintu non tantu a che catzare sos produtos russos ma, prusaprestu, a si cuntzentrare in cussos ucrainos ebbìa.[37]
Su blogger ucrainu de limba mama russa Danylo Vakhovskyi at nau chi est impreande chin cussentzia sos serbitzios in linia e at a sichire gai, ca est una manera pro amparare su "fravicamentu de un'ambiente favorevole a sos impresarios" in Russia. Peròe, "no est una cosa de patriotu, ma pro amparare impresarios "chin rubios", dare possibilidade a s'isvilupu de prozetos novos, chi est a cambiare su mundu in menzus". Su blogger at fintzas presentau carchi esempiu de custa zenìa de prozetos, chi sun zassos fortes e chi bi sun dae tempus meda: QIWI, Ostrovok.ru and antivirus Kaspersky Anti-Virus.[38]
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
