From Wikipedia, the free encyclopedia
Святый Августин тыж Аврелий Августин або Августин з Гиппо, лат. Aurelius Augustinus, Augustinus Hipponensis, (*13. новембер 354, Тагаст, лат. Thagaste/Tagaste, в Нумидии, днесь Сук Арас, Алжир — †28. август 430, Гиппо Региус, лат. Hippo Regius, Hippone в Нумидии, ) — быв епископ и учитель Церкви в часѣ поздного римского цѣсарства; днесь тыж святый Католицкой Церкви, котрого свято держать 28. августа. Называный быв ай Учитель Церкви, лат. Doctor Ecclesiae, понеже быв едным з найвызнамнѣйшых филозофох и теологох ранного христианства, представительом платонскы ориентованой патристикы.
| „ | Божа держава едино права, довершена и вѣчна держава. Тото сполочность, котру заложили добры вѣрникы. Тот невидимый свѣт мать свого земского представителя, свои законы и владу, а тов е Церковь. | ” |
| Augustinus Hipponensis, De civitate Dei | ||
| Святый Августин | |
|---|---|
 | |
| Учитель Церкви | |
| Родженый | новембра 13., 354 |
| Спочилый | авґуста 28., 430 (75 р.) |
| Честованый в | Римокатолицкой, Православной, Англиканской, Лутеранской, Старокатолицкой Церквах |
| Канонизация | 20. септембер 1295 од Папы Бонифация VIII. |
| Главне святилище | San Pietro in Ciel d'Oro, Павия, Италия |
| Праздник | 28. август (католикы) 15. юн[1] (православны) |
| Атрибуты | епископскы шаты, книга, гусяче перо, ранене сердце |
| Покровительство | теологох; книгопечатникох; пивоварникох; стараючых ся о захрану зроку |
| Святый Августин на Викискладѣ | |
Августин лишив подробный опис свого живота в первых десятьох книгах Confessiones (Вызнаня). Отець Августина, Патриций, быв поганин, мати, Моника, горлива христианка.[2] Были пунского, або берберского рода,[3][4][2] але отець му быв низшый штатный урядник, а в такых родинах в Тагасту говорило ся по латинскы.[5]
Учив ся в Картагенѣ на правника, де жив неморалным животом, и родив му ся неманжелскый сын (372). Вступив до манихейской секты и быв там девять рокы (374-383), але росчаровав ся.
На его далшый живот мала великый вплыв мати, котра го хотѣла воспитати в набоженском духу и послала го учити ся до Рима (383) и Милана (384). Тота наука и матчина вытрывалость зробила на нем великы перемѣны. Як споминав, "вшытко, што не несло в собѣ Божого Имени, хотьяк елегантне, добрѣ написане и повне правды, не захватовало мене" (Confessiones І.4.). В року 387 прияв христианство и дав покрестити свого сына. Рѣшив ся вернути домов з родинов, але в дорозѣ му умерла мати (387). Наконець, року 389 вернув ся до Тагасту, де му умер сын. По той утратѣ Августин оддав вшиток родинный маеток на монастырь и заложив там перву громаду августинох.[6] Зостав высвяченый на священника и служив в Гиппо, де по смерти епископа (394) вычеряв го в том урядѣ и служив там до смерти. Умер в року 430 в часѣ облѣганя города Вандалами. Року 431 Гиппо быв заятый и спаленый, але церковь и библиотека Августинова зостали нерушены. Его останкы около року 720 дав Луитпранд, краль Лонгобардох перенести до Павии, жебы захранити перед нападами могамеданох на Гиппо.
Августин з великов жадностьов и вдумчивостьов брав ся до штудированя найглубшых филозофичных тем. Властнѣ тота жадность привела го и до секты манихейох. Зачав з позиций неоплатонизма, позднѣйше прияв до ся идеи павлианства, а од часу свого священства (391) занимав ся шпецифичныма проблемами церковного живота. Августин быв едным з найплоднѣйшых теологох, лишив понад сто окремых робот з теологии, филозофии, социологии и етикы и на полемичны темы. Опис свого духовного живота лишив в 12 книгах Вызнаня (Confessiones).
Од него Церковь достала первый учебник катехетикы (De catechizandis rudibus), первое объяснѣня Святого Писма (De doctrina christiana) и перву гомилетику (De doctrina christiana).
Многы протестанты поважують го за духовного предходника протестантства: з его наукы много зачерили Мартин Лутер и Жан Калвин.
Повне выданя его робот вышло в Парижу два раз: 1679-1700 и 1836-1840.[7]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
