From Wikipedia, the free encyclopedia
Патриций, лат. patricius од pater (отець) — потомок старого римского рода. Зачаточно лем патриции были повноправныма обывателями Рима. В добѣ Римской републикы поступно зыскують обывательскы права и плебеи.
В найстаршой добѣ выграднѣ патрициям належало право служити военску службу, право голоса при выберанках, право быти выбраныма на державну службу, право быти священиками. Створити законну манжелску пару могли лем особы, належны ку патрициям. Лем патриции творили народ (populus). Патриции дѣлили ся на три племена (tribus): Ramnes, Tities a Luceres. Кажде з тых племен складовало ся з 10 курий (curiae).[1][2] Родины патрициох (familiae) творили роды (gentes), а каждый род належав до едной з 30 курий. Згромаджѣня 30 курий, Куриалне згромаджѣня (comitia curiata) было найстарша и найважнѣйша инштитуция влады.
Од зачаткох Римской републикы плебеи усиловали ся достати ровны права з патрициями и минули цѣлы столѣтя аж тота цѣль была досягнута.
В поздной добѣ Римской републикы в резултатѣ домовых войн и другых причин число родин патрициох змалѣло нательо, же было их ледвы 50. Зато Цезарь и Август зачали придѣльовати статус патриция новым родам за заслугы, и од той добы придѣлѣня патрициату стало ся цѣсарьскым вызнаменаньом.[1][2]
В добѣ Римской империи Константин Великый (306–337) дав понятю патриций новый обсяг: одтогды быв то почестный титул, а слѣдовав в ступници рангох нараз за конзулом, з чого выплывать, же носило го лем невельо людей.[1][4]
В середновіку и ранном нововіку титул патриций означав голову богатой и решпектованой родины в городѣ, котрый мав право быти членом самосправы города. Громадна назва патрициат означала цѣлу тоту социалну версть обывательох города, котра обычайно была и економично найлѣпше поставлена.[1][2]
В обычаю римскых патрицийох было ѣсти лем трема перстами, не поуживаючи перстенник и мизилник. Тыж належало перед ѣджѣньом мыти рукы, а в часѣ ѣджѣня великы кусы порѣзати на меншы.[5]
Seamless Wikipedia browsing. On steroids.