From Wikipedia, the free encyclopedia
Листы травы, англ. Leaves of Grass — зберка поезий од америцкого автора Волта Витмана, его цѣложивотне дѣло (1855–1892), котра высловила представу едности чоловѣка и модерного свѣта.[1]
Листы травы | |
---|---|
Leaves of Grass | |
![]() Третье выданя | |
Автор | Волт Витман |
Держава | США |
Язык | англицкый |
Жанер | поезия |
Датум появы |
1855—1892, 9 выдань |
Тип медиа | полиграфия |
Листы травы на Викискладѣ |
Переживши половку свого живота без всякого плана, не написавши нич достойного, Витман ани не мав амбиций. Але вшитко ся перемѣнило по року 1848, коли, навщѣвив юг США, побывавши путьом в 17 штатах. «Споены Штаты самы по собѣ суть поемов,» — вызрѣло у него пересвѣдчѣня, и постановив написати тоту еще никым не написану поему. Америка переживала тогды найщастлившу добу своей истории, в току едного людского живота держава з тринадцятьох штатох меджи Атлантичным океаном и рѣков Миссури росширила ся до Тихого океана и 34 штатох. 80% землѣ были незаселены, каждый мог достати землю, газдовати и богатѣти, Тогдышна демокрация, братство и ровность видѣли ся вѣчныма и прямов дорогов ку благобыту, еще невиданому на планетѣ. З того оптимизма родила ся книга Витмана.[2] Далшым импулзами быв есей Поет, 1844 од Ралфа Волдо Емерсона, де ся назначовало, же Америка еще лем чекать на истинно америцкого поета.[3]
Дѣло од зачатку было плановане о обдумане. 15. мая 1855 Витман зарегистровав назву Листы травы в Державном окружном судѣ Ню Джерзи и достав патент на авторске право.[4] 4. юна 1855 вышло перве выданя. Тота назва была игра слов: в полиграфичном жаргонѣ «трава» означовала роботы невеликой вартости, а «листы» — полиграфичны листы.[5]
Листы травы розростали ся поступно од первого выданя (1855), де было 12 неименованых поезий, через далшы: 1856 (32 поезии), 1860 (156), 1867 (236), 1871 (245)... аж ку девятому, так званому «предсмертному» выданю з рокох 1891–1892 з понад 400 поезиями. Додавали ся не лем новы вершы, але и новы тематичны роздѣлы, мѣняла ся штруктура.[1]
Листы травы были встрѣчены голоснов лайков. Найвецей здержаны новинкы писали, же тота книга — «мѣшанка высоколетности, самохвалы, пустоты и спростости». Тоты нездержаны писали, же «книга — самый гной», «з автора такый поет, як зо свинѣ математик». Але пришло писмо од самого Емерсона, котрый писав, же Листы травы суть «высшы и самобытнѣйшы од вшиткого, што дотеперь створила Америка.» Критик писав, же чув ся щастливый, читаючи тоту книгу. Емерсон думав, же е то простый поет з народа, котрый интуитивно сам пришов на трансцендентализм. Не мав ани гадкы, же Витман свѣдомо писав, слѣдуючи идеям, выкладеным в есеях критика.[2]
Зо загранича перве добре оцѣнѣня пришло в року 1868, коли в Лондону опубликовали покуртане выданя Листох травы, але тото нич не змѣнило позицию америцкой критикы. Аж в року 1882, коли в Бостону было заказане выданя книгы, а суд во Вашингтону тот заказ ануловав, зродив ся масовый интерес читательох о книгу.[1]
Кедь курто вызначити ядро книжкы, мож повѣсти так: ей тема — сам Волт Витман, сюжет — чоловѣк и Вселена, идея — вѣчный и неодступный триумф людства. Вся книжка — не монументалне завершене полотно, а лем вѣчно жива ткань самого розманитого живота. Ту суть урывкы и цитаты зоз вшелиякых трактатох розличных доб, пробы объяснѣня научных явох, а при том цѣлый водопад новаторскых поступох, зачавши од добрѣ познатого нынѣ «витменовского каталогу» (довга лишта реалий, створююча доим всеохопности) и шпецифичной ритмикы (поужитя, напримѣр, граматичных категорий яко ритмотворных елементох) аж по такы зложены поступы яко реинтерпретация (замонтованя рознородных походжѣньом фрагментох и цитатох до зовсѣм нового естетичного контексту).[6]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.