From Wikipedia, the free encyclopedia
Кривоніс або тыж шишкарь (Loxia curvirostra) є малый співавый птах з родины вюрковых.
Кривоніс є выразный птах (лем дакус векшый як воробель) із силным тїлом, выразно куртым хвостом і характерістічно закривеным дзёбаком з перекриженыма шпіцями. Самець є цеглово червеный з бурыма крылами і хвостом, сивым дзёбаком і бурыма ногами. Саміця є менше выразна, найчастїше оливово жовтожелена з крылами ай хвостом той самой фарбы як самець. Молоды птахы ся подобають саміцям.
В середнїй Европі бывать дуже часто поплетеный з рїдкіше росшыреныма білопоясныма кривоносами (Loxia leucoptera), котры мають білы смугы на крылах, а із сосновиком (Loxia pytyopsittacus), котрый мать зясь векшу голову і робустнїшый дзёбак.
Є то богато росшыреный співак жыючій в Европі, Азії і Северній Америцї. Сучасна популація є притім гадана на 15 000 000 екземпларів, якы жыють на цїлій плосї векшій як 10 000 000 км2.[1]
Область гнїздїня, чісленость і доба росшырїня в середнїй Европі ся каждым роком мінить в завислости од уроджаю насїня. Нереґуларны переміщованя мають часто характер інвазій. Часто цїлы популації опущають область і на дакілько років населяють іншакы теріторії.[2]
Мімо гнїздїня жыє кривоніс звычайно в меншых, вольнїшых ґрупах. Є дуже шыковна, швыдко перескакує з конаря на конарь, часто вісить і горї ногами. Є тіпічным насїняпожераючім птахом, котрый жере лем насїня шпильковых стромів, передовшыткым смереків і сосен. Часто ся озывать твердым „кіп кіп“, спів творить змішанина трілкованя і верзґавых і праскавых звуків.
Гнїздить цїлый рік, найчастїше в добі од децембра до мая, в завислости од множества стравы єден аж двараз за рік. Добрї схованы гнїзда собі будує переважно на смереках у вышцї 4 аж 5 м. В марцу до нёго кладе 3 -4 яйця великы 22 × 16 мм, білы з чорныма і бурыма фляками, котрый час інкубації тырвать 14 - 16 днїв. В зимнїшых місяцях самічка опущать гнїздо лем зрїдка і зохабить ся кормити самцём. Родічі молодята кормлять аж до такого часу, коли їм не стверднуть і не скривлять ся дзобачікы (14-20 днїв).
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.