Олга Ришави

Олга Ри́шави, нѣм. Olga Rischawy (*10. януара 1903, Мѣстек, Морава, Австро-Мадярщина — †23. мая 1993, Кушниця, Закарпатска область, Украина) была нѣмецка писателька чешского походжѣня^[1][2] в Подкарпатской Руси и Закарпатской области УССР.

Олга Ри́шави
Уроджѣня	януара 10., 1903(1903-01-10) Мѣстек, Морава, Австро-Мадярщина
Умертя	мая 23., 1993 (90 р.) Кушниця, Закарпатска область, Украина
Погреб	Кушниця, Закарпатска область, Украина
Занятя	писателька, учителька
Язык творох	нѣмецкый
Народность	Нѣмкеня
Родом	з Чех
Горожанство	Чехословакия, УССР
Жанры	поезия, казка, повѣданя
Ту можуть быти податкы з Wikidata, не контролованы авторами статѣ

Биография

Закончила нѣмецку гимназию в родном мѣстѣ. Оддала ся за Чеха, котрый яко дипломованый лѣсник в року 1928 достав замѣстнаня на Подкарпатской Руси, и въедно з ним пришла до найдалшого восточного кутика молодой републикы. Была учительков музикы и спѣву в Раховѣ и Ясиню.^[1][2]

По войнѣ и установлѣню совѣтской украинской влады перебрала ся до Кушницѣ, села де оддавна жила и спозначна часть нѣмецкого обывательства. Подобно иншым приселенцям з индустриализованой Чехии была очарована природов края, полюбила народный быт, спѣванкы, котрым учила дѣтей въедно з музикалнов теориев. Зостала вѣрна своей новой отчизнѣ и своей профессии до конця живота.^[1]

Литературна творба

Писала вершѣ, дѣточѣ повѣданя, вершованы и прозовы казкы^[3] по нѣмецкы и публиковала в нѣмецкоязычных выданях в Празѣ, Теплицях, Братиславѣ.^[2]

В повоенных роках, уважаючи на заострьовану комунистичнов владов антинѣмецку пропаганду, лишила литературну творчость. По хрущовском одмяку вернула ся ку писаню и публиковала свои творы в новинках Нѣмцьох Казахстана Freundschaft (Цѣлиноград), Нѣмцьох Алтая Rote Fahne (Славгород).^[2] Выступовала тыж в централных московскых нѣмецкых выданях: Neues Leben,^[1] антологиях нѣмецкой поезии в СССР.^[2]

Окремов книжков вышли ей поезии з паралелным текстом по нѣмецкы и по украинскы: Голуба мандрівка, Ужгород, «Карпати», 1979,^[2] двѣ зберкы поезий в Ужгородѣ.^[1][4]

Посмертно вышла ей друга зберка поезий Рокам подвоєно ціну, Ужгород, 1996, таксамо з оригиналным нѣмецкым текстом и паралелным украинскым. Обѣ зберкы якостно потовмачив по украинскы Петро Скунць.^[3][5][6]

Жерела и одказы

• Алмашій, Михайло. Русинська педагогічна енциклопедія. Ужгород, 2005. ISBN 966-2674-43-X Сс. 228-229.
• Береш О., Гецко Н. Повернення Ольги Рішаві. //Нове життя (Іршава), 17 березня 2014.
• Ігнатович, Олександра. Літературні портрети. «Ліра». Ужгород, 2013. ISBN 978-617-596-112-4 Сс. 50-51. Google books
• Павленко Г. В. Діячі історії, науки і культури Закарпаття. Малий енциклопедичний словник. Ужгород, 1999. ISBN 966-7242-10-2 C. 150.
• Поп, Иван. Энциклопедия Подкарпатской Руси. Ужгород: Изд-во В.Падяка, 2001. 431 с. ISBN 966-7838-23-4 С. 323.
• Хланта Іван. Літературне Закарпаття у ХХ столітті. Бібліографічний покажчик. Ужгород, 1995. Сс. 607-608.

Референции

1. М. Алмашій.
2. И. Поп.
3. Павленко Г. В.
4. Хланта Іван.
5. Береш О., Гецко Н.
6. Ігнатович О.