В албанской женской ноши видиме пестры запаскы, фартушок спереду и ззаду
Етногенеза, етнонимы, етничны групы
Переважна часть етнологох поважують предками Албанцьох иллирскы племена, дакотры учены — фракийскы. Од 2. стороча о Албанцьох суть упоминкы як о Арберох, а од 11. стороча тот етноним уже росширив ся на них.[2] В 15. сторочу были завоеваны Османами и од того часу появив ся еще еден етноним Арнауты — турецка назва Албанцьох.[3] В новѣйшой добѣ вывинув ся етноним Шкиптары, котрый е днешнов их самоназвов. Ку зачатку 19. стороча вывинули ся двѣ етничны групы: Тоскы (в южной области Тоскерия) и Гегы (сѣверна область Гегерия), котры ся одличують и языково.[2][1]
Вѣра
Подля вѣры Албанцѣ суть поликонфесионалны, при тому суть во великой мѣрѣ толерантны ку вѣрникам иншой конфесии.[4] Вѣруючы Албанцѣ переважно суть могамедане — 71%, на югу суть православны — 19%, на сѣверѣ римокатолици — 10%.[1] Доднесь в албанскых календарных и родинных обрядах заховали ся знакы стародавных вѣровань (почитаня сонця, ростлин, воды, гор и просмыкох).[2]
Характер и ноша
О народном характерѣ Албанцьох тяжко повѣсти дашто сполочне, бо меджи розличныма групами мож видѣти абсолутный роздѣл характерох. Католицкы верховинцѣ счасти подобны на Чорногорцьох, а католици-варощане в долинѣ, напротив, гет погублены всякыма грѣхами и недостатками. Могамедане смѣлы, не люблять ся учити, погостителны, на войнѣ круты, але не менше лѣнивы од иншых Албанцьох. В людовой ноши Албанцьох видѣти тыж такы роздѣлы, як и в их характерѣ. Тоскы и могамедане вообще носять фустанелу, верховинцѣ — здолу узкы, згоры широкы сѣры холошнѣ, а католици-варощане преферують носити выгодны ионичны порткы.[3] Фустанела — бѣла сорочка з довгым подолком, котрый ся перетворив на сукню. В ноши переважны колоры: бѣлый, чорный, червеный. У жен повинен быти фартушок, вовняный, в сытых фарбах, много вышивок и стрѣберны украсы.[2]
Скандербег (1405–1468) — народный герой албанской истории
Свята Мати Тереза (1910–1997) — римокатолицка монашка
Иванова Ю.В.: Албанцы. //Народы и религии мира: Энциклопедия / Гл. ред. В. А. Тишков, Редкол.: О. Ю. Артемова, С. А. Арутюнов, А. Н. Кожановский и др. — М.: Большая Российская энциклопедия, 1999. - 928 с: ил. ISBN5-85270-155-6 Сс. 34–36.
Кралюк, Петро: Така близька для українців Албанія/ //Газета «День», 4. септембер 2014, №164. Доступно онлайн (одчитане: 28.03.2019).
Кузіна Н. В. Албанці // Велика українська енциклопедія. Доступно онлайн (одчитане: 28.03.2019).
Албанцы. //Энциклопедический словарь Брокгауза и Ефрона, т. I (1890): А — Алтай, с. 362—363 Доступно онлайн
