From Wikipedia, the free encyclopedia
Синеви́р — село в бывшом Межгорском районѣ[1] Закарпатской области Украины. Село лежить в горном току Тереблѣ о 15 км од районного центра и о 60 км од желѣзничной штации Воловець.[2]
| Село Украины
Синевир
|
Синевир первый раз упоминать ся в листинах, якы до нас дошли, под роком 1604, яко Zynever, а под роком 1605 уже яко Szinevér мад..[3]
В зачатку 20. ст. Синевир поважовав ся за глуху провинцию, куды высылали провинилцьох за кару. Так быв высланый з Волового на поселѣня в Синевир В. И. Мушка, котрый ходив на заробкы до России и, вернувши ся по револуции 1905-1907. рокох, агитовав селян Волового на револуцию.[4] З другого боку, Синевир быв главным селом в цѣлом горѣшном току Тереблѣ: лем ту быв еден дохтор, котрый за грошѣ мог дати медицинску помочь обывателям сел, што были еще высше в горах.[5]
В року 1930 в селѣ жыли 2880 обывателе, з них Русины — 2506, Евреи — 294, Чехы и Словаци — 59, Мадяре — 8, Нѣмцѣ — 2, чужоземцѣ (без чехословацкого подданства) — 11. Двѣ религийны громады: православна (1875 вѣрникы) и грекокатолицка (634 вѣрникы); православны мали деревяну церковь Преображения, выставлену в 1930-х, грекокатолици — муровану церковь Успѣня Пресвятой Богородицѣ з року 1905. В селѣ была русинска школа (4 класы) и чешска школа (2 класы), нотарскый уряд, пошта, жандарска станиця, инспекторат и станиця «финанцох». Была кырниця лѣчебной воды, коло котрой влѣтѣ ставили купельовы шатры, ходив державный автобус. На Теребли была клавзура и перепусткы на сплав дерева.[6]
10. октобра 1944 в село зашла Червена Армада и зачала ся совѣтска доба его истории. Передвоенну историю села описав писатель Иван Долгош в романѣ Синевир.[2]
В року 1961 деревяна православна церковь была демонтована,[6] и православным оддали муровану церковь зликвидованой грекокатолицкой громады.
Село мать захоронку, середню школу и филиалку Межгорской дѣточой музичной школы, Културный дом з библиотеков (над 8000 книг) и клубным помѣщѣньом на 400 людей. Медицинску амбулантну помочь в сельской болницѣ можуть денно достати 120 хворых, а еще 10 хворых можуть ся лѣчити в стационарном постельовом режимѣ.[7]
За 6 км од Синевира, в готарѣ Чорна Рѣка, находить ся уникатный Музей лѣса и лѣсосплава, якый потерпѣв од повеней в рр. 1998 и 2001.[8]
Религийны громады:[7]
Назва Синевир русинского походжѣня: од синий и вир (прудкый рух воды довкола вертикалной оси, крутѣль). В нижной части села на рѣцѣ Теребли под скалов в довжцѣ 6 сяг была страшна глубѣнь и там ся вода вирила и зато звало ся мѣсто Синий вир, циже синя крутѣль, а од того взникла и назва села, а не од «морского ока», котре положене на сѣвер од сосѣдного села Синевирска Поляна. Мадярска назва Alsószinevér (Нижный Синевир) появила ся в хоснованю од 1900-х рокох, коли в Мадярщинѣ одбыло ся упорядкованя назв, на одрознѣня од сосѣдного села Felsőszinevér (Szinevérpolyána) мад., циже Вышный Синевир (Синевирска Поляна).[3]
Назва Нижный Синевир была скасована в року 1946, коли нова влада вернула стару назву.[2]
Назва сосѣдной Синевирской Поляны споминать ся в листинах о 10-20 рокы позднѣйше, очевидно взникла она яко новоселиця, котра свою назву достала од старой селитвы.[9]
Еще и в року 1924 упорядкована дорога была од Волового лем до села Синевир.[10] Теперишне озеро Синевир называло ся тогды Озеро.[11][12] Ни Чехам, ни Мадярам то не вадило, бо не тотожнило ся з посполитым назывником: jezero Ozero чеш., Ozero tó мад.. В совѣтскый час озеро зачали называти Синевирскым озером по аналогии з Синевирсков Полянов, а од конця 1950-х з активизациов туристикы — Синевиром.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
