Петро Мурянка

Петро Мурянка (властным меном Петро Трохановскый, родженый 10. августа 1947 в Парховѣ в бывшом воеводствѣ Легницком (днесь воеводство Долна Шлезия) в Польщи — русинскый (лемковскый) поет, спѣвак, културный и сполоченскый активиста.

Петро Трохановскый
PetroMurjanka.jpg
Фото з року 2022
Уроджѣня	Piotr Trochanowski авґуста 10., 1947 (1947-08-10) (77 р.) Пархов, Долна Шлезия, Польща
Псевдоним	Петро Мурянка, Петро Поплета, Афтанас Колька, Климентий Жак[1]
Занятя	поет, редактор, спѣвак, диригент, режисер
Язык творох	лемковскый, польскый
Народность	Русин
Родом	з Лемковины
Горожанство	польске
Час творбы	1971–доднесь
VIAF:41213605; LCCN:n2003034402; Ту можуть быти податкы з Wikidata, не контролованы авторами статѣ

Биография

Петро Трохановскый уродив ся в Парховѣ^[2] на западных новоодзысканых землях Польщи о три тыжднѣ по тому, як там были переселены цѣлов фамилиов з лемковского села Бѣлцарьова в рамках акции Висла. Закончив Православну духовну семинарию и штудовав на Христианской богословской Академии в Варшавѣ, але не зостав высвяченый до духовного стану. Намѣсто того року 1976 вернув ся на Лемковину и ту быв диригентом церковного хора в Саноку (1978–1982), а од року 1982 в Крыници. Од 1980-х еден з ведучых културных и сполоченскых активистох лемковской оброды. Быв сполуосновником фестивала Ватра на Лемковинѣ (1983), редактором часописа Голос Ватры и солистом ансамбла Лемковина. Занимать ведучы позиции в Стоваришѣню Лемкох, редагуе двомѣсячник Бесіда и рочник Лемківскій календар тай иншы выданя.

Так, як в Словакии, так и ту успѣх лемковскых русинскых организаций зависѣв од динамизма еднотливцьох, в том припадѣ сполоченского активиста Андрѣя Копчи, поета Петра Мурянкы-Трохановского и ученой Олены Дуць-Файферовой...

— Magocsi, Paul Robert. Chrbtom k horam, с. 480.

Од року 1992 учитель лемковского языка в основной школѣ в Крыници. Як учитель языка и редактор лемковскых выдань активну участь мав на кодификации лемковского варианта русинского языка в Польщи.

Литературна и сценична творчость

В литературѣ дебутовав року 1971, коли в украинской новинцѣ Наше слово, органѣ Українського суспільно-культурного товариства (УСКТ) в секции Лемківська сторінка зачав выступати з вершами, малыма прозами и репортажами. Выдав четыри зберкы поезий:

• Suchy badyl — Сухий бадиль — Новый Сонч, 1983 (з перекладом по польскы Здзиславы Зегадлувны)
• Мурянчыско — УСКТ, Варшава, 1984
• Jak sokół wodę z kamienia — Як сокіл воды на камени — Iskry, Варшава, 1989 (з перекладом по польскы Барбары Догналик)
• Планетникы: давны и новы вершы — Stowarzyszenie Łemków, Крыниця, 2001

Выдав драму Млиньскы камені (1990), написав и режировав дѣточы сценичны образкы, пьесы про Молодежный аматерскый театер Терка. Склав и выдав антологию дѣточой поезии Мамко, куп мі книжку (1995), де во властной адаптации представив дѣточу поезию з Войводины, Лемковины и Пряшовщины. Выдав по польскы автобиографичну книгу, адресовану Полякам, A Wisła dalej płynie (2007) «з вѣров, же захочуть прочитати и спробують зрозумѣти».

Оцѣнѣня[3]

• 1984, 1998 — Заслуженый дѣятель културы од польского министерства културы
• 1985, 1987 — Лемко року
• 1990 — польска литературна премия им. Станислава Пьентака
• 1997 — Православна премия им. князя Острожского
• 2002 — Литературна премия им. Александра Духновича
• 2003 — Премия св. брата Алберта за успѣхы в културѣ, добродѣтельствѣ и екуменичной сферѣ

Публикации

• Мурянка, Петро; Graban, Volodislav; Zegadłówna, Zdzisława (1983) (по польскы). Сухий бадиль [a Dry Stalk]. Nowy Sącz: Sądecka Oficyna Wydawnicza. OCLC 69452364.
• Трохановскый, Петро (1989) (по польскы, русиньскы). Як сокіл воды на камени [Like water from a stone falcon]. Warsaw: Iskry. ISBN 9788320711349. OCLC 30750811.
• Трохановскый, Петро (1995) (по русиньскы). Мамко куп мі книжку (children's poetry). Nowy Sącz: SOWy. ISBN 9788385753308. OCLC 46719953.
• Мурянка, Петро (2001) (по русиньскы). Planetnyky : davny i novy vershy. Stovarišynâ Lemkìv. ISBN 9788390973043. OCLC 54079749.
• Бесіда (редактор)

Жерела и одказы

• Magocsi, Paul Robert. Chrbtom k horam. Dejiny Karpatskej Rusi a karpatských Rusínov. UNIVERSUM. Prešov, 2016. ISBN 978-80-89046-97-3.
• Murianka, Petro. A Wisła dalej płynie. (Z zamierzonego cyklu: Opisać życie). Stowarzyszenie Łemków. Krynica - Legnica. 2007. ISBN 13 978-83-923771-5-3.
• Дудаш Н. (зостав.). Русински/руски писнї. Вибрала Наталия Дудаш. Нови Сад. Футура. 1997. ISBN 86-7105-111-0.
• Магочій П.Р., Поп І. (уклад.) Енциклопедія історії та культури карпатських русинів. Вид-во В.Падяка. Ужгород, 2010. ISBN 978-966-387-044-1.

Референции

1. Русински/руски писнї, с. 149.
2. Тогдышна назва села была: Пархотин. (A Wisła dalej płynie, с. 13.)
3. Магочій П.Р., Поп І., сс. 748-749.