Комунистична партия Чехословакии

Комунисти́чна па́ртия Чехослова́кии, КПЧ; чеш. и слов. Komunistická strana Československa — комунистична партия в Чехословацкой републицѣ, членка Коминтерны, владна партия в роках 1948–1989.

Заникла партия

Комунистична партия Чехословакии
Komunistická strana Československa
Основана	16. май 1921
Розвязана	23. апрѣль 1992
Идеология	комунизм
Держава	Чехословакия
Слоган	Пролетарѣ вшиткых земель, спойте ся!
Комунистична партия Чехословакии на Викискладѣ

Закладаючы зъѣзды

КПЧ была закладена на установлюючом зъѣздѣ 14.-16. мая 1921 в Празѣ, котрый прияв 21 условие на вступ до Коминтерны, и так од самого зачатку новостворена партия под веджѣньом Вацлава Штурца и Богумира Шмерала стала ся членков Коминтерны. Партия была складена з трьох народностных зложок: чешской, словацкой и русинской. але подля жаданя Коминтерны там мали быти вшиткы народностны зложкы, котры суть в републицѣ. Зато од 30. октобра по 2. новембра 1921 в Празѣ быв злучуючый зъѣзд, де ку партии прилучили ся иншы народностны секции и так створила ся интернационална КПЧ.^[1] Подкарпатска организация КПЧ была активнов 24-в крайовов организациев КПЧ и добивала ся в окремы рокы значной подтримкы на выборах (1924 — 39%).^[2]

Ведучы особы

Найвысша функция ся означовала яко генералный секретарь (1921–1945, 1971–1989), предсѣдатель (1945–1953, 1989–1990), первый секретарь (1953–1971), а занимали ю поступно:

1. Вацлав Штурц (1921–1922)
2. Алоиз Муна (1922–1924)
3. Йозеф Гакен (1924–1926)
4. Богумил Йилек (1926–1929)
5. Клемент Готтвалд (1929–1953)
6. Антонин Новотный (1953–1968)
7. Александер Дубчек (1968–1969)
8. Густав Гусак (1969–1987)
9. Милош Якеш (1987 – 24. listopadu 1989)
10. Карел Урбанек (25. новембер – 20. децембер 1989)
11. Ладислав Адамец (21. децембер 1989 – 1. септембер 1990)

Ключовы моменты истории партии

Болшевизация

В року 1929 ку веджѣню ся достав Клемент Готтвалд, сталиниста. Партия ся поступно болшевизовала.^[3]

„	...А мы, мы есьме партия чехословацкого пролетариата, и нашым найвысшым револучным штабом е направду Москва. И мы ся ходиме до Москвы учити, ци знаете што? Мы ся од русскых болшевикох ходиме учити, як вам скрутити шию. А знайте, же русскы болшевици суть на том майстрове. Оригиналный текст (чеш.) ... A my, my jsme stranou československého proletariátu a naším nejvyšším revolučním štábem je skutečně Moskva. A my se chodíme do Moskvy učit, víte co? My se od ruských bolševiků do Moskvy chodíme učit, jak vám zakroutit krk. A víte, že ruští bolševici jsou v tom mistry. Клемент Готтвалд, выступ в парламентѣ, децембер 1929	”

По Мниховѣ в роках 1938–1945 партия была в илегалитѣ. Веджѣня перебывало в Москвѣ, а часть его на росказ Коминтерны — в Лондонѣ.^[4]

«Витязный фебруар»

По «витязном фебруарѣ» намѣсто демокрации пришла комунистична диктатура и театрализоване зображѣня щастливого живота «трудящых мас»

22. фебруара 1948 КПЧ закликала «трудящы масы» на бой против «реакции». Представителе иншых партий во владѣ подали демисию в надѣи, же президент Бенеш выпише передчасны парламентны выборы. Але Бенеш зо страха перед совѣтскым засягом 25. фебруара 1948 пристав на формованя влады з повнов перевагов комунистох.^[5] Од септембра 1949 в Чехословакии были сталы агенты Москвы в статусѣ «порадникох», котрых задача была выбудовати сталинску систему. О тыждень по абдикации Бенеша, 14. юна 1948 президентом републикы став ся Клемент Готтвалд, злучивши в своей особѣ высшы партийну и державну функции. Зачали ся сконштруованы политичны процесы и терор, жертвами котрых ся стали понад 230 000 люди. Клемент Готтвалд умер о даколько днѣ по смерти Сталина и синхронна смерть двох диктаторох означала далшый перелом, котрый мусѣв наступити, але то не могло стати ся нараз.^[6]

Проба демократизации

Подробно см.: Пражска ярь ай Социализм з людсков тварьов

В януарѣ 1968 на чолѣ Комунистичной партии Чехословакии став Александер Дубчек, котрый выголосив нову политику «социализма з людсков тварьов». Але в Москвѣ и в сосѣдскых «братскых партиях» такый социализм быв не до принятя и мусѣв быти «нормализованый» сполочныма силами. Военскым засягом реформаторы были одстранены, а до влады поставлены послушны Москвѣ люде.

Роспад партии и державы

«Нормализация» продовжала ся довгы 20 рокы з помочов удавачох, шпицлох, застрашованя, репресий и терора, але не была успѣшна. КПЧ ку рокам 1988–1989 трафила до меджинародной изолации и цѣлком стратила подтримку у властного обывательства. По масовых протестах од 17. новембра 1989 поступно КПЧ была збавлена зафиксованой в конштитуции ведучой моци, и зрекла ся догмата о диктатурѣ пролетариата.^[7]

По выборах 1990 влада перешла ку опозиции. Криза довѣры вела и ку роздѣлу державы, а КПЧ самороспустила ся. Наступниками стали ся: Комунистична партия Чех и Моравы (KSČM) и Комунистична партия Словакии (KSS), позднѣйше переменована на Партию демократичной лѣвицѣ (SDĽ), котра од року 2005 была абсорбована партиев СМЕР (SMER).

Жерела и одказы

• Магочій П.Р., Поп І. (уклад.) Енциклопедія історії та культури карпатських русинів. Вид-во В.Падяка. Ужгород, 2010. — 856 c.+ХХХІІ с. ISBN 978-966-387-044-1
• Komunistická strana Československa (KSČ): počátky KSČ

Референции

1. Komunistická strana Československa (KSČ): počátky KSČ
2. Магочій П.Р., Поп І., с. 355.
3. Komunistická strana Československa (KSČ): bolševizace KSČ.
4. Komunistická strana Československa (KSČ): období 1938-1945.
5. Komunistická strana Československa (KSČ): období 1945-1948.
6. Komunistická strana Československa (KSČ):totalitní způsob vládnutí.
7. [Komunistická strana Československa (KSČ): "Na věčné časy a nikdy jinak"]

Тоты даны суть часточно або цалком основаны на перекладї статї Komunistická strana Československa на чеській Вікіпедії.