From Wikipedia, the free encyclopedia
'U Kilimanjaro (o Kilimangiaro), cu le soje ttrè cone vulcane Kibo, Mawenzi e Shira, jè une stratovulcane inattive, ca se iacchie jndr'à Tanzanie nord-oriendale. Cu le soje 5895 metre jè 'a mondagne cchiù ìrte d'u continende africane e une de le vulcane cchiù ìrte d'u munne.
Kilimanjaro | |
---|---|
State | ![]() |
Altezze | 5,895 m s.l.m. |
Prominenze | 5 895 m |
Isolamende | 5 510 km |
Catene | Stratovulcane (inattive) d'a Rift Valley |
Urteme eruzione | Nisciune recende. |
Codece VNUM | 222150 |
Coordinate | 3°04′00″S 37°21′33″E |
Otre nome e segnefecate | Kilimangiaro |
Date prime ascensione | 6 ottommre 1889 |
Autore prime ascensione | Hans Meyer e Ludwig Purtscheller |
Mappe de localizzazione | |
Jè une stratovulcane furmate da ttrè cratere: 'u cchiù andiche, Shira, ad ovest, cu 'na altitudine de 3962 metre, 'u Mawenzi ad est, cu 'na altitudine de 5149 metre e, 'mbrà le prime dò, Kibo, ca jè 'u cchiù recende e mostre pure ôsce a die segnale de attività, jndre 'na forme de fumarole. 'Mbrà 'u Kibo e 'u Mawenzi se iacchie 'na piattaforme de cirche 3600 ha, chiamate “'a selle”, ca costituisce 'a cchiù granna aree de tundre de alture jndr'à Africa.
Jndr'ô 2003 le scienziate onne scuperte ca 'na certe quantità de magma fluide (lave) se iacchie a sule 400 metre sotte 'u cratere: se penze accussì ca 'u vulcane pòte collassà (o esplodere) cumme aví fatte 'u Mount Saint Helens (State Aunìte) jndr'ô 1980.
Pure ce non ge s'onne 'mbormaziune precise sus a quanne sie avvenute l'urteme eruzione, alcune leggende locale facene penzà ca ce ne sie state une cirche 170 anne fa.
'A punde estreme d'u vulcane jè recoperte da 'nu ghiacciaie perenne.
Non g'è canosciute da addò provene 'u nome Kilimanjaro, me stonne assaje teorie. Le esplorature europee ausarene quiste nome jndr'ô 1860, dicenne ca quiste ere 'u nome d'a mondagne jndr'à lènga swahili, penzanne ca Kilimanjaro se putesse scucchià jndre Kilima (Swahili pè "colline", "piccele mondagne") e Njaro[1] ca, pè alcune teorie, jè 'na andiche parole Swahili pè vianghe o splendende[2], mendre pè otre jè 'na parole de origgene non Swahili; pè esembie jndr'ô lenguagge Kichagga 'a parole jaro segnefeche "carovane". 'U probleme de totte quèste teorie jè ca non ge sonde capace de spiegà purcè jè ausate 'u diminutive Klima, 'nvece d'a parole cchiù appropriate pè 'ndecà mondagne, cioè mlima. 'Nu penziere defferende porte a penzà ca Kilimanjaro derive da 'u Kichagga kilemanjaare o kilemajyaro ca segnefeche "ca sconfigge acidde/leoparde/carovane". Tuttavie quèste teorie non ge pòte spiegà purcè 'u nome Kilimanjaro non g'ere jndre ause jndr'ô Kichagga prime de le esplorazziune europee de metà Uèttecinde.[3]
Jndr'ô 1880 'a mondagne, chiamate Kilimandscharo jndr'ô tedesche, divende 'nu stuezze de l'Africa Oriendale Tedesche dope ca Karl Peters hagghie convinde le cape locale a firmà le trattate ('a diffuse storie ca 'a reggine Vittorie aví donate 'a mondagne a Guglielmo II de Germanie jè false).[4]
Jndr'ô 1889 'u Picche Uhuru sus ô Kibo fù chiamate Kaiser-Wilhelm-Spitze, nome ausate jndre le 'Mbere tedesche fine ad 'a soje sconfitte jndr'ô 1918, quanne le territore devendarene parte d'u Tanganika, guvernate da le 'nglise, e 'u nome vène lassate.
![]() |
Pe approfondimende, 'ndruche 'a vôsce Parche nazionale d'u Kilimanjaro. |
Jndr'à zone se iacchie 'u parche naziunale d'u Kilimanjaro (Kilimanjaro National Park) ce jè une de le prengepale parche naziunale d'a Tanzanie. Tène 'na superficie de 756 km². Jndr'ô 1910 fù dichiarate reserve naturale da 'u guverne coloniale tedesche. Jndr'ô 1921 divende reserve forestale. Jndr'ô 1973 l'aree mondane sus ad 'a linee de le àrvule (~2.700 m) fù reclassifecate cumme Parche naziunale e fù apirte a 'u pubbleche accesse jndr'ô 1977. 'U parche fù dichiarate Patrimonie de l'umanità da l'UNESCO jndr'ô 1987.
'U Parche se iacchie jndr'ô stuezze nordoriendale d'a Tanzanie (3°03′32.66″S 37°20′37.97″E ), a 'u confine cu 'u Kenya. L'ingresse prengepale d'u parche, 'u Marangu Gate se iacchie cirche 30 km a nord d'a cetate de Moshi, a 1.870 m de altitudine.