From Wikipedia, the free encyclopedia
Bruxelles o Brussel (Bruxelles /bʀyˈsɛl/ o /bʀyˈksɛl/ in francese, Brussel /ˈbrœsəɫ/ jndr'ô olannese, Brüssel jndr'ô tedesche, Brusselle o Borsella jndr'ô tagliàne arcaiche) jè 'a capitale ed 'a prengepàle cetate d'u Belge. 'U termine Bruxelles solitamènde coincide cu 'a Reggione de Bruxelles-Capitale.
Bruxelles jè comunemènde conziderate 'a capitale de l'Aunione europee.
Bruxelles amministrazioni | |||||||||
---|---|---|---|---|---|---|---|---|---|
Bruxelles / Brussel | |||||||||
| |||||||||
Stato: | ![]() | ||||||||
Coordinate: | 50°50′48″N 4°21′09″E | ||||||||
Altitudine | 13 m s.l.m. | ||||||||
Superficie | 161 km² | ||||||||
Crestiàne | 1.099.174[1] (2009) | ||||||||
Denzetà | 6.811,09 ab./km² | ||||||||
CAP | 1000-1130 | ||||||||
Prefisso tel | 02 | ||||||||
Nome javetande | Bruxellois(e) | ||||||||
Sinnache | Freddie Thielemans | ||||||||
Lènghe | frangise fiamminghe | ||||||||
Site istituzionale | www.brucity.be | ||||||||
![]() |
Pe approfondimende, 'ndruche 'a vôsce Cetate de Bruxelles. |
![]() |
Pe approfondimende, 'ndruche 'a vôsce Comune d'a Reggione de Bruxelles-Capitale. |
Cu 'u termine Bruxelles ce se referisce quacche vote ad 'a municipalità prengepàle d'a Reggione de Bruxelles-Capitale (Région de Bruxelles-Capitale jndr'ô frangise, Brussels hoofdstedelijk gewest jndr'ô olannese), ma jndre stù case jè cchiù corrette chiamarle Cetate de Bruxelles (Ville de Bruxelles jndr'ô frangise, Stad Brussel jndr'ô neerlandese).
'A cetate de Bruxelles non g'ète ca une de le 19 municipalità ca 'nzieme fàcene 'a Reggione de Bruxelles-Capitale: cunde 161.273 crestiáne, mendre conzideranne le 'ndere Reggione de Bruxelles-Capitale se arrive a 1 miglione de crestiáne.
![]() |
Pe approfondimende, 'ndruche 'a vôsce Reggione de Bruxelles-Capitale. |
'A Reggione de Bruxelles-Capitale, da 'u punde de viste amministrative jè 'na reggione esattamènde accume Fiandre e Vallonie, e da 'u punde de viste sciugrafeche jè 'na enclave de le Fiandre. Le reggione sonde 'na combonende de le comblesse istituziune belghe, le ttrè comunità sonde un'otre: 'a popolazziune de Bruxelles hàve a cce fàce cu 'a Comunità frangòfone d'u Belgie o cu 'a Comunità fiamminghe d'u Belge, pè questione reguardande argumènde cumme culture ed educazione.
Dope 'a lòre creaziune, le istituziune comunetarije e reggionale fiamminghe se reaunirone, ed 'u conziglie leggislative fiamminghe aunificate, 'u 'Vlaamse Raad', ôsce a die chiamate Vlaams Parlement, stabbilì 'u soje guverne e le soje ministere a Bruxelles. Bruxelles jè pure 'a capitale d'a Comunità frangòfone d'u Belge (Communauté française Wallonie-Bruxelles jndr'ô frangise).
'A frondière lènguisteche scucchie 'u Belge jndre 'nu settendrione de lènga olannese e 'nu meridione de lènga frangise.
'A reggione de Bruxelles jè ufficialmènde bilènghe, ma 'a maggioranze d'a soje popolazziune parle frangise (cchiù de l'85%[2]). Piccele comunità de immigrande cunzervane 'a lòre madrelènghea: berbere, arabe, tagliàne, spagnole e otre, ma 'a granna parte de quiste parle pure jndr'ô frangise.
Dò de le ttrè prengepàle istituziune de l'Aunione europee, 'a Commissiune europee ed 'u Conziglie de l'Aunione europee, onne 'a lòre sede a Bruxelles. 'A terze istituziune prengepàle, 'u Parlamènde europee, tène pure jedde 'na camere parlamendare a Bruxelles (le soje sessiune plenarie se svolgene però jndr'à sede de Strasburgo). Bruxelles ospite pure le uffice d'a Presidenze europee, le commissiune d'u Parlamènde europee ed 'u Comitate de le Reggione, e jè pure 'a sede polìteche d'a NATO, e de l'Aunione Europee Occidendale (UEO). Ospite pure 'a sede de l'EPC, ende no-profit cullegate all'UE.
'U toponime Bruxelles derive da Bruocsella o Brucsella, ca segnefeche "cáse (sel) jndr'à palude (broek)", chiste termine onne state cchiù nnande latinizzate jndre: "Brucsella". 'U prime nuclee d'a cetate jè nasciùte jndr'ô VI sèchele d.C. pè iniziative d'u vescove de Cambrai, cumme punde de cullegamènde strateggeche 'mbrà le cetate de Colonie e Bruges.
Le prime documènde sonde oreggenarie d'u sèchele X, e fàcene referemènde a chiesère sorte sus 'u Caudenberg, 'na alture ca se iacchie rrete 'a cetate. Jè devendate successivamènde 'a residenze de le duche de Brabante, pigghianne accussì sembre cchiù granne 'mbortanze, tanne da esse circunnate cu 'na cerchie de bastione luènghe quàtte chilometre, jndr'ô 1144. Jndr'ô curse d'u sèchele XII jè passate d'a corone de Brabante a quèdde de le duche de Lorena.
Successivamende 'a soje storie resulte jndre 'nu mode assolute legate a le sorte d'a reggione de le Fiandre, passanne attraverse le battagghie pè 'u predominie 'mbrà l'Austrie, 'a Spagne ed 'a Frange. Jndr'ô 1477, quanne devènde capitale de le Pajèsere Vasce austriache, ère retènute une de le cetate cchiù attraende e ricche d'Europe, grazzie specialmende a le soje attività commerciale, concendrate sus 'u traffeche de tessute. Jndr'ô 1567, pè soffocà le mote autonomiste, ô spagnole Duca d'Alba adotte metode assaje repressive, arrevanne a fà decapità 'na cifre cumme 18.000 crestiáne. 'U guverne spagnole, ca jè condinuate angore pè totte 'u XVII sèchele, jè resultate inette e desastruse, e provocò sùbbete 'nu veloce decline economeche, 'u quale hé purtate ad 'a vote soje le mèstre e le mercande ad 'a sollevaziune.
Bruxelles resendì cchiù nnande d'a polìteche spanniunistèche de Luigi XIV, ca hé fatte bombardare pesantemènde 'a cetate jndr'ô 1695. Durande 'u prengipie d'u Settecinde condinuarene a cangià ad 'a guide de Bruxelles frangise e austriache: quiste urteme reuscirene a pigghià 'nfine 'a cetate cu 'u trattate de Aquisgrana (1748), e guvernarone jndre 'nu mode avvedute, promuovenne 'mbrà ll'otre 'nu programme de rennovamènde urbanisteche (ca previde 'u quagghiamènde d'a magnifeche Grand Place, prugettate da l'architette Guimerd).
Le 'ndependenze, dope 'nu periode de timbe sutte 'a occupaziune napoleoneche e dope quinnece anne de associaziune cu 'a Corte d'Olanne, ha state finalmènde raggiunde jndr'ô 1830, accume conseguenze de 'na revolte scoppiate 'mbrà le vie cettadine 'u 25 aguste. Bruxelles visse cchiù nnande decenne de tranquillità, 'nderrotte sulamènde da le 'nvasiune tedesche d'u 1914 e d'u 1940.
Pè quanne reguarde 'a storie condemboranee, Bruxelles jè state trestemènte ad 'u cindre de le cronache pè 'a Strage de l'Heysel, avvenute 'u 29 màsce 1985.
'U simbole d'a cetate jè da sèchele e pure ôsce a die 'nu giglie gialle sus a 'nu sfunne blu; quèste immaggene pare sije da recullegà ad 'a presenze frangise (giglie d'a monarchie frangise) ma seconne alcune deriverebbe d'a presenze de giglie de palude sus 'u site origgenarie d'a cetate.
Le lènghe origginale de l'aree de Bruxelles, sciugrafecamènde 'nzerite jndr'à lle Fiandre, sonde dialètte brabandìne d'u neerlannese. 'Na curiosità jè 'u "marollien", 'nu dialètte assaje 'nfluenzate d'a lènga vallone ca se parle jndre 'na sezione cendrale d'a cetate. Sije 'u neerlannese ca 'u frangise sonde state ausate pè 'a maggior parte d'a storie d'a cetate cumme lènghe ufficiale e da le classe cchiù ìerte.
Jndr'ô Uèttecinde, cu le progresse de l'alfabbetizzaziune, le dialètte fùrene chiane chiane soppiandàte da le lènghe standardizzate. A Bruxelles, 'a maggior parte d'a popolazziune hagghie ausate 'u frangise chiuttoste ca 'u neerlannese cumme lènga de culture, piccè jndre quèdde epoche ère cchiù prestiggiose e quinne conziderate cchiù utile.
Ôsce, 'u 90% de le crestiáne de Bruxelles parlane frangise. Le dialètte de Bruxelles sonde quase sparite, pure ce le sforze de quacchedùne pè salvarle.
'A Reggione de Bruxelles-Capitale jè ufficialmènde bilènghe frangise/neerlannese. Non ge stonne statisteche ufficiale sus 'a prime lènghe de le crestiáne e sonde 'u stesse difficile da pigghià, piccè le famigghie "miste" non ge sonde rare. Stime serie d'a percenduale de crestiáne ca parlane neerlannese cumme prime lènghe variane 'mbrà 'u 7,5% ed 'u 15% d'a popolazziune, e se basane sus 'a lènga ausate pè comunecà cu le autorità comunale e sus a le resultate elettorale de le partite de lènga neerlannese.
Ce stè 'na conzistende popolazziune de lènga frangise jndr'à periferie de Bruxelles, 'na zone ca ufficialmènde fàce parte de le Fiandre. Jndr'à maggior parte de le municipalità ca se iacchiene 'nzigne ad 'a Reggione de Bruxelles-Capitale, 'a popolazziune de lènga frangise jè addiritture maggioretarie. Le lòre diritte lènguistèche e/o 'u spannamènde d'a Reggione de Bruxelles-Capitale sonde oggette de assaje spinde dibattite.
Bruxelles tène deverse università, ttrè de quèste sonde l'Université Libre de Bruxelles (ULB) 'a Vrije Universiteit Brussel (VUB) ed 'a KUB (Katholieke Universiteit Brussel) nonché 'na seziune de l'Université Catholique de Louvain (UCL) ca se iacchie jndr'ô quartiere "Alma" 'nzigne 'u granne ospedale "Saint Luc".
'A produzziune manefatturière devènde segnefecative già jndr'ô lundàne 1460 e quinnece anne dope le artiste onne ottenute da 'u Maggistrate 'a chiene autonomie sus 'a crijaziune de le cartone e de le disegne inerende a le arazze, miglioranne jndre stù mode 'a qualità. Quèste cangiaminde conzentì a l'arte de l'arazze de pigghià le disegne da 'u movimènde pittoreche fiamminghe. 'Mbrà le opere cchiù reuscite quagghiate jndr'à seconne metà d'u XV sèchele ce stè 'a Vergine in gloria d'u 1485 esposte ad 'u Louvre e caratterizzate da 'na combosiziune simile ad 'u trittiche.
'Mbrà le arazziere cchiù canosciute de quiste periode s'onne a recordà Lyon ("Lione de Smet") cu 'u soje famuse Comunione de Herkimbald quagghiate jndr'ô 1515 e Filippo del Mol de cui sonde rumaste 'a Deposizione e 'A discese d'a croce. Durande 'u Cinghecinde l'arte de l'arazze hé canosciute 'nu periode floride grazzie a le 'ndroduzione d'a petture renascimèndale tagliàne e d'u stile raffaellesche. Verse 'a fine d'u Cinghecinde jè iniziate 'nu periode de flessione a cause de uerre polìteche e releggiose e l'arte de le arazze fù contraddistinte da 'u stile canosciute accume "a verdure". Jndre 'u seconne decennie d'u XVII sèchele Rubens trasferì sus a le arazze le soje 'ndende de maestosità decorative, cumme se pòte vedè cu 'a Storie de Costantino ed 'a Storie de Achille. Pure ce 'a qualità de quiste prodotte jndr'ô 1794 le telaie de le manefatture de Bruxelles s'onne fermate definitivamènde.[3]
Jndr'à capitale belghe onne fatijate ttrè fabbreche de maioliche: 'a prime funnate jndr'ô 1705, 'a seconne jndr'ô 1751, 'a terze jndr'ô 1802. 'A produzziune tipeche comune a le ttrè fabbreche ha state caratterizzate da terrine cu 'a forme de anemàle o de ortagge o de melòne jndre le quale prevalse le 'ndende naturalisteche. 'U reste d'a produzziune s'ète accostate a le aspette decorative 'mberande jndr'ô nord d'a Frange.
Verse 'a fine d'u XVIII sèchele 'nzigne 'a Bruxelles fù attive 'na fabbreche de porcellane dure realizzande prodotte simile ad 'a condemboranee manifatture pareggine.
Bruxelles se pòte onorà d'u premate d'a trina a fuselle mendre a Venezia spètte quèdde d'a trina ad aghe ed adderetture le dò cetate se fàcene 'na battagghe pè 'a palme de le origgene d'a trina ca parene antecedende ad 'u XVI sèchele. Jndr'ô Sèjecinde 'a produzziune de trina fiamminghe 'ndrodusse alcune innovaziune stilisteche cumme le fiùre sus 'u tombole ed 'u funne combletate a magghie cu l'aghe. 'A trina de Bruxelles s'hé caratterezzate pure pè 'a finezze d'u filate, fatte devendà cchiù facile da le partecolare condizione climateche. 'Ndorne da 'u 1830 le 'ndroduzione de nuève macchinarie permise 'na produzziune sus a 'na larghe scale a prezze cchiù vasce pure ce a scapite d'a lucendèzze e d'a morbidèzze. 'A trina de Bruxelles se produce fine a le timbe attuale.[3]
![]() |
Pe approfondimende, 'ndruche 'a vôsce Metropolitane de Bruxelles. |
Bruxelles jè servite da l'Aeropùerte de Bruxelles-Zaventem, ca se iacchie jndr'à municipalità de Zaventem, e da l'Aeropùerte de Charleroi Bruxelles-Sud, ca se iacchie 'nzigne a Charleroi.
Jè possibbele spustarse a le 'nderne d'a cetate mediande bus, tram e metropolitane ottemamènde collegate 'mbrà de lòre.
'A metropolitane de Bruxelles jè oreggenarie d'u 1976.
Bruxelles hagghie ospitate 'u terze Congres Internationaux d'Architecture Moderne jndr'ô 1930.
Dò esposiziune mundiale onne avùte luèche a Bruxelles, l'Exposition universelle et internationale (1935) e l'Expo' 58 d'u 1958. L'Atomium, 'na rappresendaziune ìerte 103 metre de 'nu crestalle de ferre, ha state quagghiate pè l'Expo' 58, e jè state mandenute, devendanne 'na specie de equivalende belghe d'a Torre Eiffel.