From Wikipedia, the free encyclopedia
Jean-Jacques Rousseau (Ginevra, 28 sciugne 1712 – Ermenonville, 2 luglie 1778) ha state 'nu screttore, felosofe e museciste svizzero.
Le idèe socio-politeche de Rousseau influenzarene 'a Rivoluzione Frangese, 'u sviluppe de le teorie socialiste e 'a crescite d'u nazionalisme. L'eredità soje de penzatore radicale e rivoluzionarie jè probabbilmende espresse a 'u megghie jndr'à frase cchiù famosa soje, condenute jndr'à 'u Condratte sociale: "L'omme ha nate libbere ma a tutte vanne jè in catene". Le teorie sue avèrene pure 'na notevole influenze sus a 'u successive Romandicisme.
Rousseau nascìe jndr'à 'u 1712 a Ginevra e jndr'à 'u corse de totte 'a vita soje mandenìe l'orgoglie de essere ginevrine. 'A mamese, Suzanne Bernard Rousseau, murìe 'na sumane apprisse 'a nascite d'u figghie, pe comblicaziune post-parto. L'attane Isaac, 'n'orologgiaie medie borghese, 'u diede inaffidamende jndr'à 'u 1722, a cause de 'na risse, infatte, avenìe bandite da 'a cetate de Ginevra. Jndr'à l'infanzia soje Rousseau avenìe educate ijndr'à 'nu mode abbastanze sdreuse: le classece d'a letterature latine avenèrene spesse privileggiate a le libbre accademece. Ere 'nu uagnone fandasiose, indelligende e ccreative, e pure 'nu lettore precoce e infaticabbele, se pò dicere ca s'à furmate sus 'a Bibbie, sus a le Vite parallele de Plutarco e sus a le sermune moralistece de Calvino (calvimisme).
Rousseau lassò Ginevra 'u 14 marze 1728, apprisse diverse anne de apprendistate apprisse da 'nu notaio e pò da 'n'ingisore. Apprisse ripeture vagabondagge ingondrò Françoise-Louise de Warens, 'na baronesse svizzere ca s'avere convertite a 'u cattoliceseme, ca se ne facìe protettrice e cchiù nnande addevenìe l'amanda soje, pure ca jedde ere de tridece anne cchiù granne de jidde.[1] Cchiù nnande jidde se convertìe pe combiacenze a 'u deisme, cumme se pò vedè da 'a "Confessione d'u vicarie savoiarde" jndr'à 'u libbre IV de l'"Emilio".
Trascorrìe allore quacche sumane jndr'à 'nu seminarie e quanne avere accumenzate 'u 1729, sei mise jndr'à 'na scole d'u core d'a cattedrale de Annecy. Dedicò pure diverse timbe a 'u viagge e a diverse professiune; pe esembie, quanne accumenzò 'u decennie 1730, fatiò cumme inzegnande de museche a Chambéry. Jndr'à 'u 1736 scìe 'n'otra vote da le de Warens, vicine a Chambéry, 'nu soggiorno ca acchiò avveramende piacevole, ma jndr'à 'u 1740 partìe 'n'otra vote pe Lione, addò facìe da tutore d'u figghie uagnone de Gabriel Bonnet de Mably.
Jndr'à 'u 1742 Rousseau se spustò a Parigge, pe presendà a l'Accademie de le Scienze 'nu sisteme nuève de notazione musicale ca avere invendate, basate sus a 'na singola linèe addò le numere rappresendavene le indervalle 'mbrà le note, invece punde e virgole indicavane le valure ritmice. L'idèe ere quedde de avè 'nu sisteme combatibbele cu 'a tipografije, ma l'Accademie 'u respingìe cumme inutile e prive de origgenalità.
Da 'u 1743 a 'u 1744 facìe 'u segretarie de l'ambasciatore de Frange a Venezia, 'u quale guverne repubblicane Rousseau citò assaije vote jndr'à le scritte politece sue cchiù nnande. Turnò allore a Parigge, addò, indorne a 'u 1745, accumenzò 'na relazione, ca dure pe totte 'a vite, cu Thérèse Le Vasseur,[2] sarta uagnedde analfabbete da 'a quale avìe cinghe figghie, ca Rousseau lassò tutte a 'u spizie de le trovatelle. Conzideranne le teorie sue sus a l'educazione, Rousseau avenìe assaije vote criticate da Voltaire e da le commendatore successive, pe l'abbandone premature de le figghie sue a l'orfanotrofie. Rousseau jndr'à le "Confessioni" spieghe, ammettenne pure le rimorse sue, ca non ge tenève 'a disponibbilità economeche pe mandenè le figghie sue e ca chiste avessere avute 'na vita megghie proprie in orfanotrofie. Condraddiziune cumme chiste 'mbrà 'a vite e l'opere, avenèrene ausate da le critece pe scettà 'nderre Rousseau, definennele ingapace de vivere in suggettate, jndr'à 'u tendative de scettà 'nderre le fatie teorece sue.
Duranne 'u soggiorno a Parigge, facìe amicizie cu Diderot, e da 'u 1749 collabborò cu diverse articole accumenzanne da chidde de museche, a l''Ngeclopedije. 'U condrebbute sue cchiù 'mbortande avere state 'a vosce "Econmije Politeche", scritte jndr'à 'u 1755. Apprisse quacche timbe le rapporte de Rousseau cu Dideort e l'otre engiclopediste se fecere tese e difficele.
Jndr'à 'u 1749, sus 'a vie verse Vincennes, pe visità Diderot, a 'u timbe in priggione, Rousseau avenìe a sapè de 'nu congorse sponzorizzate da l'Accademie de Digione, pe 'nu sagge ca avera discutere ce 'u sviluppe de le arte e de le scienze ere benefiche da 'u punde de viste morale. 'A resposte de Rousseau, negative, avere state 'u Descurse sus a le scienze e le arte, d'u 1750, ca le facìe pigghià 'u prime premie e le facìe guadagnà pure 'nu sacche de notorietà.
Rousseau affermò ca duranne 'u viagge in carrozze pe visità Diderot, avìe 'n'ispirazione imbrovvise sus 'a quale se basarene tutte le successive fatìe filosofeche sue. 'N'ispirazione ca, però, non ge frenò l'inderesse sue pa museche, tande ca jndr'à 'u 1752, l'opera soje L'indovine d'u villagge, avenìe mise in scene pe Luigge XV.
Jndr'à 'u 1754, Rousseau turnò a Ginevra, addò se convertìe 'n'otra vote a 'u Calvinisme e avìe arrete ufficialmende 'a cetadinanze ginevrine. Jndr'à 'u 1755 combletò 'a seconda opera maggiore soje, 'u Discurse sus a l'origgene e le fondamende d'a disuguaglianze 'mbrà le omme. Partenne da ste fatte le opere sue comingiarene a 'ngontrà 'nu sfavore sembre cchiù gruesse da 'u guverne frangese.
Jndr'à 'u 1761 Rousseau pubblecò 'u fortunate romanze Giulia o 'a nova Eloisa e, l'anne apprisse, 'u Condratte sociale e Emilio o de l'educazione. Tutte e doje le libbre criticavene 'a releggione e avenèrene pe stu fatte bandite in Frange e pure a Ginevra. Rousseau avenìe costrette a scappà pe no essere arrestate, fermannese a Berna apprime e a Motiers apprisse, in Svizzera. A Motiers screvìe 'u Proggette de costituzione pa Corsica.
Pe colpe de le criteche ca 'u sudecarene pure in Svizzera ('a casa soje a Motiers avenìe murate jndr'à 'u 1765), Rousseau, jndr'à 'u scennare d'u 1766, se rifuggiò in Gran Bretagna, da 'nu filosofe David Hume. Ma apprisse diciotte mise, credenne ca Hume stè comblottave condre a jidde, se ne fuscìe pure da addà.
Rousseau turnò in Frange ausanne 'u nome de "Renou", pure ca ufficialmende non ge puteve turnà 'mbonde a 'u 1770. Jndr'à 'u 1768 se 'nzurò cu Thérèse[3] e jndr'à 'u 1770 turnò a Parigge. L'avenìe congesse de turnà a condizione ca non ge avera pubblecà otre libbre, ma apprisse ca avere combletate le Confessiune sue, accumenzò a dà letture private, ca le avenèrene imbedite jndr'à 'u 1771. De conseguenze, stu libbre e tutte l'otre successive avenèrene pubblecate apprisse 'u 1782, quattre anne apprisse 'a morta soje.
Rousseau condinuò a scrivere 'mbonde a quanne murìe. Jndr'à 'u 1772 avenìe invitate a presendà de le raccomandaziune pa costituziona nove d'a Pulonie, e 'u resultate de stu scritte ha state l'urtema granne opera politeca soje, le Conzideraziune sus a 'u guverne d'a Pulonie.
Jndr'à 'u 1776 combletò le Dialoghe: Rousseau guidece de Jean-Jacques e accumenzò a fatià a Le fandasticherie d'u passeggiatore solitarie. Jndr'à stu periode, pe se putè mandenè, turnò a cupià museche. Pe colpe d'a paranoia soje (in parete infondate), non cercò 'a combagnie o l'attenziune de otre crestiàne.
'Na matine, passeggianne pe le terre d'u marchese de Girardin, a Ermenonville (vicine a Parigge), avenìe colpite da 'n'emorraggie, e murìe 'u 2 luglie 1778.
Rousseau avenìe, inizialmende, brucate jndr'à l'Ile des Peupliers. Sidece anne cchiù tarde, jndr'à 'u 1794, 'u cuerpe sue avenìe traspurtate a 'u Pantheon de Parigge, addò, pe ironie d'a sorte, repose affianghe a 'u nemiche sue, Voltaire. 'U chiaute avenìe disegnate pe assomiglià a 'nu tembie rusteche, cumme richiame a le teorie de Rousseau sus 'a nature. Jndr'à 'u 1834 'u guverne de Ginevra 'nzippò, condre voglie, 'na statue in onore de Rousseau sus 'a piccenne Ile Rousseau, jndr'à 'u Lache de Ginevra.
Pò Rousseau ha scritte pure l'Eugenio e l'Eriberto, doje opere filosofeche de 'na certa 'mbortanze. Ste doje opere piccenne, de mettere jndr'à 'u repertorie de formazione, sonde scanusciute a 'a maggiorparte de le crestiàne e onne state pubblecate pa prima vote jndr'à 'u 1912 da 'u Croce.
Cchiù ca 'nu felosofe jidde ere 'nu moraliste, ca riesce a elabborà certe idèe origgenale e jndr'à quacche case innovative sus a 'u piane pedagogeche e sus a quidde sociologgeche e politeche. Omme profondamende releggiose e psichicamende debole jidde trasferisce le turbaminde teologgece sue e psicologgece (se penze a "Rousseau giudece de Jean-Jacques") jndr'à 'nu penziere certe vote ingoerende, ma denze de suggestiune releggiose e mistiche. Quidde ca prengepàlmende caratterizze 'u penziere sue jè 'a posizione in merite a 'a culture e a 'a scienze in generale, ca se dipane jndr'à le splendide pàggene d'u Discurse sus a le scienze e le arte. Opere de granne 'mbortanze 'u "Condratte sociale".
Accanite detrattore de le Accademie, a quidde timbe ieratece custode e arbitre assolute e d'u scibbele, Rousseau condraste cu 'u cervidde le beneficie ca provenene da 'a conoscenze fine a jedde stesse e prive de 'na funzione morale e virtuose, argomendanne cu raggionaminde loggece ca seguene da esembie e inderpretaziune storeche. Jndr'à st'otteche jè apprime de tutte 'u vizie e le mollezze de l'omme raffinate e le innaturale ricercatezze sue ca avènene avversate, sconfessanne 'a boriosità conferite da 'a culture e 'a corruzzione morale conzeguende a l'involuzione de le custume sociale. Le megghie pàggene d'u Rousseau penzatore onne 'nu chiare indende moralizzande e comungue polemeche condre le eccesse d'u culte d'a raggione ca 'mberverserà 'mbonde a osce a die.
Condrebbute notevole le davìe in riflessiune basate sus a l'indrospezione psicologgeche, addò recanosce 'a fraggilità e le mangaminde umane e sociale. Pe quande le analisi sue andropologgeche erene opinabbele, in sociologgiew avìe ottime idèe e facìe 'u paladine de l'uguaglianze sociale e de l'uguaglianze 'mbrà le omme. Latore de 'n'idealisme umaniste de stambe arcaiche, vedève comungue 'a femmene inferiore in raggionamende rispette a 'u maschele e a quiste subbordinate.
Pe quande riguarde 'a sociologgie ìu "Condratte sociale" jè certamende 'u capolavore sue, avenne 'nu notevole successe de consense e 'n'indubbie influenze su certe istanze d'a rivoluzione. Le proposte politeche sue sonde in granne parte ispirate a 'u Platone d'a "Repubbleche" e de le "Legge". 'U sogne sue ere in conglusione none 'nu state libbertarie ma totalitarie, addò 'u popole jndr'à globbalità sue avesse state libbere da 'u furastiere, ma inguadrate jndr'à 'nu State addò l'individiualità jè vissute in favore de 'nu congette de Patria cumme state etiche, ca se face garande e promotore d'a rettitudine morale d'u cetadine.
Rousseasu vedève 'na diversificazione sostanziale 'mbrà 'a suggettate e 'a nature umane; diceve ca l'omme ere, in nature, bbuène, 'nu "belle selvagge", ma ca avere state corrotte successivamende da 'a suggettate civile e colte; vedève queste cumme 'nu prodotte artificiale nocive pu benessere de le individue, portannele a 'a degenerazione e a 'u vizie.
L'influsse negative d'a suggettate sus a 'n'omme ca invece ere virtuoso, jndr'à filosofije de Rousseau, gire atturne a 'a trasformazione de l'amore de jidde (amour de soi), indese in sense positive, jndr'à l'amore proprie (amour-propre), viste cumme negative. L'amore de jidde conziste jndr'à l'istindive desiderie, possedute da l'omme cumme da l'otre animale, de autoconzervazione; l'amore proprie, invece, generate da 'a suggettate, costringe l'individue a combrondarse a l'otre essere umane, purtanne a l'infondata paure de no essere sufficiendemende apprezzate o a 'u pigghià pèiacere da le debolezze e da 'u dulore de l'otre. Comungue, 'u prime a mettere sta differenze non ge fu Rousseau; ad esembie avenìe dette, 'mbrà l'otre, da Luc de Clapiers, marchese de Vauvenargues.
Jndr'à 'u Descurse sus a le scienze e l'arte, Rousseau sostenìe ca le arte e le scienze non g'avessere purtate beneficie a l'umanità, in quande non g'avèrene state fatte pe responnere a le necessità umane, ma generate da l'orgoglie e da 'a vanità. Pò le arte e le scienze ccrejavane occasiune pe l'ozie e 'u lusse, condrebbuenne accussì a 'a corruzzione de l'omme. Rousseau diceve ca 'u progresse de le canoscenze averene fatte addevendà le guverne angore cchiù putende, cazzanne accussì le libbertà individuale. Congludeve allore ca 'u progresse materiale minacciave le possibbeletà de costruì amicizie singere, e a 'u lore poste trasevane gelosie, paure e sospette.
Jndr'à 'u successive Descurse sus a 'lineguaglianze, facìe vedè 'u progresse e 'a degenerazzione de l'umanità da 'nu primitive state de nature 'mbonde a 'a suggettate moderne. Rousseau suggerive ca l'uemmene primordiale erene individue isolate, diverse da le otre animale unicamende pu possesse d'u libbere arbitrio e pa capacità de perfezionarse. Chiste uemmene primitive erene dominate da l'imbulse de autoconservazione ("amore di sè") e da 'na disposizione naturale a 'a combassione e a 'a pietà verse le simile. Quanne l'umanità avere state costrette a vivere jndr'à 'na comunitate, pe colpe d'a crescite d'a popolazzione, subbìe 'na trasformazione psicologgeche, in seguite a 'a quale accumenzò a conziderà cumme 'a bbona opinione de l'otre cumme 'nu valore indispensabbele pu proprie benessere. Rousseau associave sta nova forme de consapevolezze a 'n'età de l'ore d'a prosperità umane. Comungue, 'u sviluppe de l'agricolture e d'a metallurgie e 'a conseguende ccreazione d'a proprietà private e d'a divisione d'a fatije, purtarene a 'na crescende dipendenze reciproche de le individui e a 'a disuguaglianze 'mbrà le uemmene.
'A conseguende condizione de conflitte 'mbrà ce avere assaije e ce avere picche o ninde, facìe sine, seconde a Rousseau, ca 'u prime State avenìe invendate cumme 'na forme de condratte sociale suggerite da le cchiù ricche e putende. Infatte le ricche e le putende, ausanne stu condratte sociale, sanzionarene 'a proprietà private, 'u state de fatte e allore istituzionalizzarene 'a diseguaglianze cumme ce ere inerende a 'a suggettate umane. Rousseau congepive 'a propria proposte pe 'nu condratte sociale nuève cumme 'n'alternative a sta forme de truffe. Spiccianne 'u Descurse sus a l'ineguaglianze, Rousseau spieghe cumme 'u desiderie de essere conziderate da 'u sguarde de l'otre, ca s'avere generate duranne l'età de l'ore, avere putute, sus a 'u periode luènghe, corrombere l'indegrità e l'autendicità de le individue a l'inderne de 'na suggettate, quedda moderne, signate da 'a dipendenze reciproche, da le gerarchie e da le disuguaglianze.
![]() |
Pe approfondimende, 'ndruche 'a vôsce Descurse sus a l'origgene e le fondamende d'a diseguaglianze 'mbrà le uemmene. |
L'opere cchiù 'mbortande de Rousseau, probbabbilmende, ha state 'u Condratte sociale, addò avènene proposte le base pe 'n'ordine politeche leggittime.
Addevenìe une de le titele cchiù influende jndr'à successive teorie politeche europèe. Jndr'à le condenute, mannave nnande certe idèe già ditte jndr'à 'na fatìa precedende, l'artichele sus a l'"economije politeche" cu 'u quale Rousseau avere condrebbuite a l''ngeclopedije de Diderot. Rousseau diceve ca 'u state de nature, degenerate jndr'à 'na condizione ferine senza legge o morale, costringeve l'umanità a adottà de le istituziune o a murè. Jndr'à fase degenerate d'u state de nature, l'omme jè suggette a 'na combetizione condinue cu le simele sue, e condemboraneamende a devèndà sembre cchiù dipendende. 'Na doppia tensione ca minacce 'a sopravvivenza soje e 'a libbertà soje. Seconne a Rousseau, aunennese grazie a 'u condratte sociale e lassanne 'a pretesa lore de deritte naturale, le individue ponne conzervà lore stesse e jndr'à 'u stesse timbe remanè libbere.
Quiste purcé, avascianne 'a cape a l'autorità d0a volondà generale d'u popole in quanne endità aunitarie, le individue cerchene de non divendà subordinate a 'a volondà de otre individue; pò, jndr'à stu mode, une se assicure ca onne obbeddì a le legge pe le quale, lore stesse, onne state auture tutte inzieme. Rousseau sostiene ca 'a sovranità adda essere jndr'à le mane d'u popole, ma distingue nettamende 'mbrà sovranità e guverne. 'U guverne jè 'ngarecate de eseguì e de fà rispettà 'a volondà generale e jè comboste da 'nu gruppe piccinne de cetadine, definite "commissarie d'u popole". Rousseau se metteve condre fortemende a l'idèe ca 'u popole putesse esercità 'a proprie sovranità ausanne 'n'assemblea rappresendative.
Piuttoste, le stesse cetadine averena essere le dirette auture de le legge. Stè ce ha dedotte ca, de conseguenze, 'u State ideale de Rousseau non ge pò essere realizzate in suggettate de granne dimenziune, ma invece 'u modelle politeche proposte ere adottabbele assaije assaije a state de 'na sola cetate. 'A maggior parte de le 'ngazzaminde successive sus a l'opere de Rousseau riguardane 'u disaccorde sus a l'affermaziona soje ca le cetadine onne essere libbere purcé costrette a obbedì a 'a volondà generale.
Rousseau teorizzò 'nu probbleme pedagogeche basate sus a 'u congette de "educazione prevendive", cioè 'n'educazione ca non ge sckaffe nisciuna virtù, ma previene 'u vizie; non ge insegne 'a verità, ma preserve da l'errore conzendenne 'u libbere sviluppe d'a personalità.
Rousseau espone 'a visiona soje de l'educazione jndr'à l'Emilio, 'nu libbre parzialmende de fandasie, ca conde jndr'à le dettaglie 'a crescite de 'nu uagnone chiamate proprie Emilio e guidate da 'u stesse Rousseau. Jidde 'u porte jndr'à cambagne, 'nu luèche ca, pe jidde, jè maggiormende congeniale a 'a nature umane, diversamende da 'a cetate, addò 'u uagnone pò rischià de pigghià le brutte abitudine, sia da 'nu punde de viste fiseche ca morale. Obbiettive de l'educazione, dice Rousseau, jè cumme 'mbarà a vivere e stu fatte se ave seguenne 'nu uardiane ca jè in grade de fà vedè 'a strade pe 'na vita bbone.
'A crescite d'u uagnone jè divise jndr'à ttre seziune: 'a prime 'mbonde a le dodece anne cchiù o mene, periode addò non g'è angore possibbele 'u penziere comblesse e le piccinne, seconde Rousseau, vivene cumme anemale; 'a seconde vè da le dece o dudece anne 'mbonde a le quinnece, periode addò 'a raggione s'accumenze a sviluppà; 'a terze ca vè da le quinnece anne in su, jè 'u periode addò 'u uagnone vè pe addevendà adulte. A stu punde Emilio ingondre 'na uagnedde cu 'a quale se pò combletà.
'U libbre jè basate sus a le ideale de Rousseau de 'na vita sane. 'U uagnone addà 'mbarà, da 'a propria esperienze dirette, cumme seguì le istinde sociale sue e proteggerse da le vizie de l'individualismee de l'autocoscenze urbane. Curiosamende, cumme otre granne pedagoghe, non g'à state pe ninde 'n'attane affettuose cu le figghie sue (ca abbandonò in orfanotrofie), ma granne educatore fore da 'a famigghie.
L'Emilio jè 'u capolavore pedagogeche sue. Emilioo jè 'n'allieve immagginarie, dotate de totte le facoltà e le condiziune socio economeche pe essere educate da 'nu precettore bbuene. 'U curriculum educative sue dure vendicinghe anne, duranne le quale, 'u precettore le presende 'na serie de esperienze ca avene 'u scope de farle raggiungere 'a maturità, jndr'à 'nu mode tale ca jidde pò indegrarse bbuene jndr'à suggettate addò jidde vive.
'U precettore adda programmà 'a vita soje e le ingondre sue, infatte agisce indirettamende, pe evitarle de le esperienze non educative. Adegue, jndr'à le diverse età, 'u sapere sue; e face in mode ca Emilio avverte jndr'à 'nu mode naturale le limite sue. Emilio adda 'mbarà da l'esperienze, vivenne a l'aria aperte e 'mbare sulamende quanne ne sende l'abbesogne.
A l'inizie de l'adolescenze adda 'mbarà 'na fatie manuale e jndr'à sta fase 'u precettore le 'mbartisce 'n'educazione culturale, sessuale, morale, releggiose e l'avvie pure a 'u 'nzuramende e a 'a politeche. 'U precettore 'u lasse lòibbere sulamende quanne jidde jè convinde ca Emilio pò essere, a vota soje, 'nu bbuene precettore pe le figghie sue.
Pe capì precise precise 'a posizione releggiose de Rousseau jè necessarie apprime de tutte capì l'inconsistenze andropologgeche d'a cultura soje e 'uy desiderie mistiche ca 'a dominesce. Ce se pò parlà de 'na rivoluzione rousseauiane queste riguarde 'a sociologgie, 'a psicologgie e 'u custume, ma pe ninde proprie 'a filosofie. Rousseau jè 'nu penzatore ca avìe granne fortune pu straordinarie stile letterarie sue, a 'a mode, e 'a "rivoluzione" da jidde fatte riguarde 'u modelle de retrogruardie ca jidde propone condre 'u moderne a favore de l'andiche ('u sogne sue jè Sparta).
Jidde jè condre 'a modernità e condre 'a civiltà e 'a culture, jndr'à 'u perseguimende de 'nu sogne utopeche de austerità e purezze primitive; sogne certe strutture universale e permanende de l'esistenze umane a 'u state sue de purezze de le origgene pre-culturale. A 'u riguarde sonde fondamendale le congette de "coscenze" e de "sendimende": 'a prime rappresende pe l'autore 'na vosce inderiore ca serve da "bussola" jndr'à valutazione morale d'u proprie e de l'otre combortamende e ca appartene a 'a nature umane (ma ca tuttavie se sviluppe jndr'à na fase successive a l'origginarie "state de nature"). 'U congette de sendimende se sviluppe jndr'à 'u penziere de Rousseau seguenne varie sfumature ma sembre condre 'a razionalità indellettuale, conziderate cause d'a corruzione d'a bontà origgenarie de l'omme e allore fondamende de tutte le male sue. 'U lume ca 'u guide e ca le face penzà de assè da l'immobbilisme de 'na suggettate jè 'u sogne de 'nu retorne a 'u state de nature.
Ma queste jè sulamende 'na pulsione releggiose ca 'u ienghie profondamende cumme ce ere 'na verità sognate e illusorie. 'A raggione jè conzendite jndr'à mesure jndr'à quale ve sotte a 'u sendimende, a 'a passionalità e a 'u "core", 'a sede d'u "sendimende" adda sembre prevalè sus 'a "cape", 'a sede d'a razionalità moderniste e corruttrice. 'u "core" cumme autonomie sendimendale vitale, allore condre le costriziune e le precette, condre l'autorità releggiose, condre 'u state corrotte. 'A releggione positive, quedde istituzionalizzate e corrotte, vè supranate cu 'na releggiona nove d'u core e d'a spondaneità, ca jidde cogghie jndr'à 'u deisme de Samuel Clarke debitamende riformate "a 'a Rousseau" ma cu forte suggestiune de San Paolo. Da aqquà 'u dualisme anime-cuerpe, inderiore-esteriore (nature-suggettate), caratteristeche d'u Rousseau, a l'inderne d'u quale 'a releggione se sckaffe jndr'à 'u prime de le doje termine: 'u spirite releggiose se sviluppe naturalmende jndr'à l'omme, face parte de 'n'ambite individuale, indime, inferiore, se rileve jndr'à semblicità soje e purezze spugghiate de tutte le costruziune fatte da 'a culture.
Le teorie de Rousseau onne state assaije dibbattute, a 'u timbe, pe colpe de le giudizie in ambite releggiose condenute jndr'à lore. L'idèe de Rousseau, ca l'omme ere bbuene pe riprodurse, ere in condraste cu 'a dottrine d'u peccate origgenale; e pò, 'a "teologgie naturale" soje, esposte da 'u Vicarie Savoiardo jdnr'à l'Emilio purtò a 'a condanne d'u libbre sie jndr'à Ginevra calviniste ca jndr'à cattoleca Parigge. Jndr'à 'u Condratte sociale Rousseau dice ca le seguace autendice de Gesù non ge ponne maje essere le cetadine bbuene, e allore pure stu libbre avenìe condannate a Ginevra. Rousseau non ge avere state comungue ateo, pure ce 'a feda soje e 'a filosofia soje condrastavene diverse pringipie d'u cristianesime; e pò, sembre jndr'à 'u Condratte sociale, dice ca pu benessere e 'a coesione d'u State jè necessarie 'na releggione, ca tene cunde d'a fede jndr'à 'nu Die uniche, jndr'à 'na vite eterne e future e jndr'à remissione de le peccate.
Jndr'à stu sienze Rousseau jè ritenute 'mbrà le cchiù coerende teorece de l'indolleranze releggiose: seconde sta visiona soje, 'u State tène 'u deritte e 'u dovere de perseguì e sanzionà, in nome d'a volondà generale, tutte chidde ca non ge s'adeguane a 'a confessione previste da 'a legge. Rousseau cercò de difenderse da le critiche condre 'a visiona releggiosa soje jndr'à Lettere a Christophe de Beaumont.
Le idèe de Rousseau averene 'na notevole influenze duranne 'a Rivoluzione Frangese, duranne 'a quale, comungue, 'a sovranità popolare non ge avenìe esercitate direttamende da 'u popole ma da de le rappresendande sue: non ge se pò allore dicere ca le guverne rivoluzionarie erane 'n'applicazione effettive d'a dottrine politeche de Rousseau. Cchiù nnande scritture cumme Benjamin Constant e Hegel accusarene le teorie de Rousseau de essere responsabbile de le eccessi rivoluazionarie, specialmende chidde d'u Terrore; chiste accusse erane tuttavie oggette de condroversie. Jidde sugnave de le legislature e de le politece "sande e pure" a l'ause d'u quale Platone sognave le reggiture d'a polis de Atene (se penze a 'u "mite d'a caverne"), ma Rousseau conziderave Atene corrotte da 'a culture e da le agge invece vedève Sparta cumme 'a polis modelle, forte, guerriere, austera e virtuose.
Rousseau ha state 'u prime scrittore moderne a attaccà jndr'à 'nu mode decise l'istituzione d'a proprietà private, e pe quiste assaije vote jè pure conziderate 'nu precursore d'u socialisme e d'u comunisme (comungue, Marx raramende cite direttamende Rousseau jndr'à le scritte sue). Rousseau, pò, condestave 'u pringipie ca 'u volere d'a maggioranze jè sembre corrette; seconde a jidde l'obbiettive d'u guverne ere assicurà 'a libbertà, uguaglianze e giustizie pe tutte le cetadine, pure a dispette d'a volondà d'a maggioranze in base a pringipie etice. Jidde ha state 'u prime teorizzatore d'u state etiche "assolute" condre a 'u modelle de Montesquiei d'u state megghie "possibbele".
Une de le pringipie fondamendale d'u penziere socio-politeche de Rousseau jè l'imbossibbeletà de separà l'ambite prettamende politeche da quidde morale. 'Nu State ca non ge riesce a aggì in mode morale fallisce jndr'à funziona primaria soje e spicce de esercità 'n'autorità autendiche sus a l'individue. 'U State, seconne Rousseau, adda agì sus a le individue pe le trasformà e emendarle da tutte le distorsiune morale generate da 'na suggettate, cumme quedde attuale, dominate da l'ineguaglianze. 'U seconne pringipie fondamendale jè 'a libbertà, ca 'u State adda defennere a ogne coste condre 'u furastiere. Non ge se tratte tande de 'na libbertà indese in sense libberale, ma 'na libbertà morale e inderiore, ca consiste jndr'à l'indipendenze d'u popole e de ogne singola personalità individuale ca ne face parte da le valore fluttuande e suggette a le mode d'a maggioranze. Seconne Rousseau 'u State tène 'u dovere de "costringere a essere libbere" le cetadine riluttande a seguì 'a volondà generale. Pe volondà de reformà e trasformà l'omme e pe l'ideale de 'na comunitate statale totale, Rousseau ha state viste certe vote cumme 'nu precursore de le successive utopie e de le State totalitarie d'u XX sechele.
Le idèe de Rousseau sus a l'educazione onne profondamende influjenzate le successive teorie sus a l'educazione, tande ca ste ce, cumme John Darling, ha ditte ca 'a storie d'a teorie de l'educazione conziste jndr'à 'na serie de note a margine a le opere de Rousseau (parafrase d'a cchiù note affermazione de Whitehead, seconne cui l'indera storie d'a filosofie conziste jndr'à 'na serie de note a margine a l'opere de Platone). Jndr'à l'Emilio, Rousseau distingue 'mbrà 'nu piccinne sane e 'nu piccinne "inutile" e ingapace. 'U piccinne sane adda essere l'uniche obbiettive de ogne attività educative. Rousseau scettave 'nderre l'imbortanze d'a letture e raccomandave de sviluppà l'emotività d'u piccinne apprime ca 'a raggiona soje. Congedeve particolare 'mbortanze a l'apprendimende ausanne l'esperienze e none ausanne l'acculturazione.
Jndr'à le scritte prengepàle sue Rousseau identifiche 'a nature cu 'u state primitive de l'omme selvagge. Cchiù tarde ause 'u termine "nature" pe indicà 'a spondaneità d'u processe cu 'u quale l'omme costruisce l'istinde sue egocentriche (none indese in sienze negative), basate sus a 'u proprie carattere e sus a 'u munne piccinne ca 'u cerconde. Nature signifeche aqquà inderiorità e indegrità, in condraste a 'a priggionie e a 'a schiavitù ca 'a suggettate imbone jndr'à 'u nome de 'na false emangipazione d'a barbarie.
Turnà a 'a nature signifeche restituì l'omme a le forze de stu processe naturale, mettennele fore da le legame oppressive e de le pregiudizie d'a civiltà. Ste urteme idèe fanne de Rousseau 'na figure particolarmende 'mbortande jndr'à 'u Romandicisme e allore fondamendalmende condre a lIlluminisme, d'u quale comungue, pe 'nu sacche de otre fatte, faceve parte.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.