Woodstock
From Wikipedia, the free encyclopedia
Woodstock – u cun num entir Woodstock Music & Art Fair – 3 Days of Peace & Music – è stà in festival da musica al liber ch’ha gì lieu dals 15 fin ils 17 d’avust 1969 en vischinanza da Bethel en il stadi federativ american New York. Il festival vala sco culminaziun dal moviment da hippis en ils Stadis Unids; a medem temp marchescha el il punct final da quel, damai ch’il moviment era uss arrivà en il mainstream.
Impressiuns dal festival |
Davant radund 400 000 aspectaturs èn sa preschentadas 32 bands da las direcziuns stilisticas folk, rock, psychedelic rock, blues e country, tranter els stars sco Jimi Hendrix, Janis Joplin e The Who. Il dumber d’aspectaturs è stà pli che duas giadas uschè grond sco quai ch’ins aveva quintà; ultra da quai èn blers giuvenils stads bloccads en las lungas colonnas da traffic ch’eran sa furmadas. Sin l’areal da l’occurrenza regivan pervi da la trid’aura e problems organisatorics per part relaziuns catastrofalas. Malgrà las cundiziuns disfavuraivlas è il festival da Woodstock vegnì enconuschent per si’atmosfera paschaivla. Numerus musicists, collavuraturs e visitaders han passentà la fin d’emna sut l’influenza da drogas sco LSD, mescalin, hasch e mariuana.
Cumbain ch’ils organisaturs, managers e blers musicists han tuttavia persequità cun il festival da musica interess commerzials, represchenta Woodstock fin oz il mitus mistifitgant d’in’‹autra› America, paschaivla e creativ-artistica. Quella è sa posiziunada en cuntrast tar ils Stadis Unids che sa chattavan amez la Guerra dal Vietnam e ch’era schoccada d’assassinats politics (John F. Kennedy, Malcolm X, Martin Luther King e Robert F. Kennedy) e steva sut l’influenza dals conflicts da la societad ch’il moviment dals sessantotgers aveva tematisà.
Il film ‹Woodstock› ch’è vegnì filmà durant il festival e che dueva vegnir onurà cun in Oscar, vala sco in dals films documentars cun il pli grond success insumma. Quel dueva gidar a moda decisiva a transportar il mitus da Woodstock en tut il mund.