Term Bel (2156 m s. m.) è in culm el sid da la chapitala Cuira en il chantun Grischun (Svizra). Quest punct n'è betg in piz, ma retschaiva sia impurtanza sco lieu istoric: El era il sulet punct da cunfin tripel da la anteriura Republica da las Trais Lias.
Al lieu stat ina stela da l'onn 1915 che la secziun Rhätia dal Club Alpin Svizzer ha erigì.[1] L'anteriur crap da cunfin è exponì en il Museum Retic a Cuira.
La stela dad oz porta las trais vopnas da las lias istoricas. En quest lieu vegnivan ensemen ils cunfis da la Ligia Grischa (cumin Razén), la Lia da la Chadé (chastè Ortenstein) e la Lia da las diesch dretgiras (cumin Churwalden).
Tras il punct da culminaziun van ils cunfins da las vischnancas actuals Churwalden (enfin 2009 Malix), Tumleastga (enfin 2010 Veulden) e Domat.
Il territori appartegn grazia a l'access da las pendiculars da Brambrüesch tar la zona da recreaziun da la citad da Cuira. L'enviern è era la sutgera sil Furggabüel en fucziun, nua ch'è vegnida construida l'onn 1970. Il Furggabüel è bun 15 meters pli ault ch'il Term Bel e circa 400 meter pli el nord.
Il Term Bel è cuntanschibel or da tut las direcziuns sin sendas da viandar.
Ils 16 da november 1944 è crudà il bumbardader american B24 «Lady Patricia» el nord dal Term Bel, en il territori da cunfin tranter Domat e Malix. Il bumbardader era sin il sgol da return da Minca al sid da l'Italia, nua ch'el era staziunà. Tut las dudesch persunas da l'equipa han pudì bandunar la maschina avant la collisiun cun il paracrudada ed èn sa platgà senza blessuras. Ils umens èn vegnids internads suenter lur salvament ad Adelboden. Il motiv per la crudada era in donnegiament tras il fieu d'artigliaria tudestg.
Il num «Lady Patricia» sa referiva sin la pitschna figlia dal pilot Daryl R. Mason che sgulava normalmain la maschina. Damai ch'el era malsaun lez di, ha ses substitut Doyle R. Smith sgulà l'aviun.
L'onn 2004 è vegni scuvrì a chaschun dal 60avel anniversari, in crap commemorativ al lieu da crudada en preschientscha da la figlia dil pilot Patricia Mason Freel.
- Manfred Hunziker: Ringelspitz/Arosa/Rätikon, Alpine Touren/Bündner Alpen. Verlag des SAC, 2010, ISBN 978-3-85902-313-0.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
