![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/e9/Dosso_Dossi_%2528Giovanni_di_Niccol%25C3%25B2_de_Lutero%2529_%2528Italian_%2528Ferrarese%2529_-_Mythological_Scene_-_Google_Art_Project.jpg/640px-Dosso_Dossi_%2528Giovanni_di_Niccol%25C3%25B2_de_Lutero%2529_%2528Italian_%2528Ferrarese%2529_-_Mythological_Scene_-_Google_Art_Project.jpg&w=640&q=50)
Mitus
From Wikipedia, the free encyclopedia
In mitus (dal grec vegl μῦθος, ‹sun, pled, discurs, raquint, istorgia legendara, ditga›, latin mythus) è en sia muntada oriunda in raquint. En il mitus religius vegn l’existenza dals umans colliada cun il mund dals dieus u spierts.[1]
![Thumb image](http://upload.wikimedia.org/wikipedia/commons/thumb/e/e9/Dosso_Dossi_%28Giovanni_di_Niccol%C3%B2_de_Lutero%29_%28Italian_%28Ferrarese%29_-_Mythological_Scene_-_Google_Art_Project.jpg/640px-Dosso_Dossi_%28Giovanni_di_Niccol%C3%B2_de_Lutero%29_%28Italian_%28Ferrarese%29_-_Mythological_Scene_-_Google_Art_Project.jpg)
Mitus fan valair che quai ch’els expriman correspundia a la vardad. Envers questa pretensiun d’esser vardaivels è gia sa drizzada la critica da l’illuminissem grec dal temp dals presocratichers (p.ex. Xenophanes, enturn 500 a.C.). Per ils sofists furma il mitus il cuntrast tar il logos, il qual emprova da giustifitgar a basa da cumprovas raziunalas la vardad da sias pretensiuns.[2]
En in senn pli vast designescha il term ‹mitus› er persunas, chaussas u eveniments da gronda muntada simbolica. En la lingua da mintgadi vegn l’adjectiv ‹mitic› savens duvrà en il senn da ‹fabulus, legendar›. Sco ulteriura muntada pussaivla da ‹mitus› è la finala da numnar in’imaginaziun faussa u ina manzegna (p.ex. «il mitus da la creschientscha economica infinita»).[3]
La summa da tut ils mitus d’in pievel, d’ina cultura, d’ina religiun vegn numnà mitologia (dal grec vegl μυθολογία).[4] Uschia discurr’ins per exempel da la mitologia dals Grecs, dals Romans, dals Germans.