پاناما نہر
From Wikipedia, the free encyclopedia
پاناما نہر (انگریزی: Panama Canal)، وسطی امریکا دے مُلک پاناما وچ واقع اک بحری نہر اے، جیہدے ذِریعے بحری جہاز وڈا سمندر اوقیانوس تے بحر الکاہل وچکار سفر کر سکدے نیں۔ اس نہر دے اساری انجنیئرنگ دی تریخ دا سبھ توں مشکل ترین منصوبہ سی ، اس دے بنن نال علاقے ج جہاز رانی تے بہت چنگا اثر پیا کیونکہ پہلاں جہاز براعظم جنوبی امریکا دے دوالے چکر لا کے راس ہارن توں بحر الکاہل وچ داخل ہندے سن۔ اس نہر دی تعمیر نال نیویارک توں سان فرانسسکو دا بحری فاصلہ 9 ہزار 5سو کلومیٹر ہوگئیا جہڑا پہلے راس ہارن دے دوالے چکر لاؤن تے 22 ہزار 5 سو کلومیٹر سی۔
اس جگہ نہر دی تعمیر دا منصوبہ 16ویں صدی چ ساہمنے آئیا پر اس دی اساری دا کم فرانس نے 1880ء چ شروع کیتا پر اس نوں ناکامی ہوئی تے فیر 1904ء وچ ریاست ہائے متحدہ امریکا نے اس نوں شروع کیتا تے 1914ء وچ اس نوں بحری جہازاں لئی کھول دتا گئیا۔ 77 کلومیٹر لمبی اس نہر دی تعمیر وچ اڑیکے آئے، جیہناں وچ ملیریا، یرقان دی وباء تے زمینی تودےآں دا ڈِگھݨا شامل سی ۔ اس نہر دی اساری دے دوران اندازن 27 ہزار 5 سو مزدور ہلاک ہوئے، جیہدے وچ 1881ء توں 1889ء تک جاری رہن آلا فرانسیسی منصوبہ وی شامل اے، جیہدے وچ 22 ہزار مزدور مارے گئے سن۔ ساریاں احتیاطاں دے باوجود 1904ء توں 1914ء تک دے امریکی منصوبے وچ وی 5 ہزار 609 مزدور جانوں گئے۔ ایداں کُل مرن آلے مزدوراں دی تعداد 27 ہزار 5 سو توں ودھ گئی۔
ہُن نہر پاناما جگ دےآں اہم ترین بحری رستےآں چوں اک اے، جِتھوں ہر سال 14 ہزار توں ودھ بحری جہاز لنگھدے نیں ، جیہناں اُتے 29 کروڑ 30 لکھ ٹن سامان لدیا ہندا اے۔ 2002ء تک اس نہر توں 8 لکھ جہاز لنگھ چکے نیں۔
اس نہر لنگھن چ 9 گھینٹے لگدے نیں ۔ 2005ء وچ اس نہر توں 20 کروڑ 79 لکھ ٹن نال لدے 14 ہزار 11 جہاز لنگھے، جیہدا روزانہ دا اوسط 40 جہاز بݨدے نیں۔
اس نہر دے وچکار جھیل گیٹون کیونکہ سطح سمندر توں اچی اے اس لئی اس جھیل دے دونے پاسے لاک لائے گئے نیں جیہناں وچ پاݨی گھٹ یاں ودھ کرکے بحری جہاز نوں جھیل دے پاݨی دی پدھر دے برابر لیایا جاندا اے، اس جھیل نوں پار کرکے جہاز دوبارہ نہر تے فیر سمندر وچ پہنچ جاندا اے۔