Whataboutism

Whataboutism kummd ausm englische (What about ...?, wu määnd „Was isch donn midd ...?“ unnem Ohängsel -ism (määnd „-ismus“) unn bzaischned ä Teschnigg inde Brobagonda unn Moinungsmanipuladzion, midderma vun uuliebsome Pungde, zum Baischbiel Gridigg ableng'ge konn. Do vasuchdmas Gschbräsch uff ähnlische odda awwa gons onnare wirglische, vamoindlische odda a konschdruierde Missschdänd uffde Said vum Gridigga odda Gschbräschgeschna zu bring'ge, alla abzuleng'ge. Die uusachlisch Gschbrächstechnigg hoddma urschbringlisch de UDSSR baim Umgong midde Gridigg vunde weschdlische Weld als Brobagondateschnigg vorkalde. Die Aad zu agumendiere isch awwa a än logische Feelschluss.

Dialegd: Schbaimarisch

Awwa des Ablehne vunnem Agumend als „Whataboutism“ konn a selwa widda monipuladiv soi unn konnen Ausdrugg vun Dobbelmoral, änna selegdive Auswahl vunn Pungde und än Mongel on kommunikativa Kompetenz soi, alla ä Taggdigg um die aischene Daidungshohaid abzusischare.

Vawonde B'zaischnunge unn ähnlische Manipuladzionsteschnigge sinds Ablenkungsmanöver (Ablenkungstaktik), Ondword midd änna Geschefrooch, Auswaischmaneva, Themwegsel, Tu-quoque-Agumend.

Wordbdaidung unn Herkunfd

„Whataboutism“ isch nochde Definizion vum Oxford Living Dictionary ä Teschnigg odda Braxis, um uff ä Oschuldischung odda a schierischi Frooch midd änna Geschefroch zu ondworde odda ä onnared Thema uffzugraife. De Bgriff kummd noch dem Werdabuch ausde 1990a Johr unn isch än onnare Bgriff fa „whataboutery“, wu inde 1970a Johr uffkomme isch.^[1] De Bgriff werd a in daidschschbrochische Adiggl bnudzd.^[2][3]

Logischa Feelschluss unn retorischa Gniff

Des Ziel vum „Whataboutism“ als än retorische Gniff isches unna onnarem^[4] die Positzion vum Geschna odda de Geschna selwa zu unnagraawe, ohne dassma soi Agumend widdalesch ded. De Glassigga unn zum Schbrischword worrene Baischbiel vum Whataboutism isch die inde UDSSR Endgeschnung uff Gridigg om Sozialismus haifisch gsachde Sadz „Unn in Omerika linschense Schwadze“.^[5][6]

Midd der Ondword blaiwdma ä saschlischi Onword schuldisch, konn awwa a die Rischdischkaid vunde Vorwirf direggd odda indireggd oigschdeje. Middm vorwurfsvolle „Whataboutism“ komma soim Gescheniwwa die Bereschdischung zu soina Griddigg abschbresche.^[3][7][8]

Whataboutism ischä Variond vum tu quoque (lat. du a, Bzaischnung fa än Geschevorwurf), was ä Unna'aaad vum Argumentum ad hominem isch.^[9]

Vorwurf unn Geschevorwurf valachan des Thema vum Inahldlische zum Organisadorische unn vasuchen zu gwischde unn Theme onnaschda zu ordne.^[10]

Korz

	De A saachd, de B machd P.
	De B saachd, ja unn, de A machd doch do a P.
Druchschluss:	Deswesche isch P irrelewond.

Brobagonda

De „Whataboutism“ als retorischa Gniff isch a schun frija inde Brobagonda oigsedzd worre. Zum Baisbiel hodd die Nazi-Bress 1938 nochde Reichskrischdallnachd den Gniff gnumme unn hodd inde esdaraischische Volgszaidung als Schlaachzail om 12. Novemb 1938 gschriwwe: „Londoner Hetze wegen Glasscherben. Aber kein Wort über zerstörte Araberdörfer! Wieder empörende Anpöbelungen in der jüdischen ‚Weltpresse‘.“^[11]

Alsmade Oskar Lafontaine uff die Mauwadoode ogschbroche hodd, hodda die Geschefrooch gschdelld: ‚Was ist mit den Toten im Mittelmeer‘?“^[3][2] A inde US-omerikonische Bräsidendschafdswahl 2016 komma oinische Baisbiel finne.^[8][12] Em Donald Trump hoddma vorkalde, dassade Whataboutism bnudzd.^[13] De Alan Cassidy hodd im Vaglaich vum Donald Trump middm Wladimir Putin g'määnd, dassde Putin de Whataboutismus „perfeggzionierd“ hedd.^[14] So määnd zum Baischbiel a die russisch Nowaja Gaseta innem Indawiew middem ORF om Juni 2018, dassde Putin uff die vier Kerfrooche midd Geschevaglaisch reagierd hodd.^[15] Im Unnaschied zuäm Schudzvaglaisch määmd de Harald Martenstein awwa, dassde Putin des als Gescheogriff machd.^[16]