Bärmesens (aa Bermesens oda Bärmasens) is e kraisfrai'i Schdadt in Rhoilond-Palz, Daitschlond. Sie is Verwaltungssitz vum Londkräs Siedwestpalz, vun dämm se a umschloss is, un lait om Westrond vum Pälzerwald. Ihr Nome geht uff de hailische Pirminius zurick, der, wo es Kloschder Hornbach baue geloss hat.
Wappe | Daitschlandkard |
---|---|
![]() |
![]() |
Basisdate | |
Dialekt: | Rhoifrängisch |
Hääptvariant: | Pälzisch |
Bunnesland: | Rhoiland-Palz |
Landkrääs: | Kraisfraii Schdad |
Heche: | 387 m ü. NHN |
Fleche: | 61,4 km² |
Aiwohner: | 40.808 |
Bevelkerungsdicht: | 665 Eiwohner je km² |
Boschtläätzahle: | 66953–66955 |
Voawahl: | 06331 |
Kfz-Kennzääche: | PS |
Gmäändschlüssel: | 07 3 17 000 |
Stadtgliderig: | 8 Schdadbezirk |
Adress vun de Stadtvawaltung: |
Exerzierplatzstraße 17 66953 Pirmasens |
Websait: | |
Owabirgaschameschda: | Bernhard Matheis (CDU) |
Laach vun Bärmesens in Rhoiland-Palz | |
![]() |
Bärmesens hat mer longi Zait die daitsch Schuhmetropole genennt. Awwer mittlerwail wern in Bärmesens bai waidem nimmi so viel Schuh gemach, wie in de beschde Zaide.
Im Oschde, wie gesaat, de Pälzerwald. Im Weschde vun Bärmesens lait die Schdadt Zweebrigge unn de Saar-Palz-Kräs. Im Norde lait die Schdadt Lautre un de Londkräs Lautre. Im Nordoschde grenzt de Londkräs Derkem ò. Im Oschde lait de Kräs Siedlichi Woischtroß un im Siede die Grenz zu Frongraisch mit de Départments Moselle un Bas-Rhin.
Schtadtgliederung
Die Kernschdatd is in acht Dääle gegliedert. Alles ògefong hat's emol om Horeb, donn gäbbt's noch de Kerschberch, es Winzler Verdel, de Schache un die Huschderheh. Außerum lait noch im Norde de Summerwald (hat mol Moler-Birgel-Siedlung gehäß), im Siedoschde die Ruhbonk un im Weschde de Erledaich un de Waißhof. Außerdäm gäbbts noch so e paar klännere Verdelscher, wie die Hohneruh oder die Parkwaldsiedlung.
Donn gäbbts noch siwwe Ordsbezirke: Erlehof, Fehrbach, Gerschbach, Hengschberch, Niedersimde, Winschberch un Winzle. Des sinn mol selbschdännische Derfer gewässt, die donn ingemaindet wor sinn. Saitdämm honn se schdatt em Boiemäschder e Ordsvorschdeher. Die Aufgabe vum Gemänerad hat de Schdadtrad Bärmesens iwwernumm, awwer e bissel mitredde derf a de Ordsbairad noch. Frier ware a mol die Huschderheh un die Ruhbonk aichene Derfer, awwer e Ortsvorschdeher odder e Ordsbairad honnse nät behall.
Klima
Es gäbbt relativ viel Niederschläch, des lait im owwere Värdel vun Daitschland: On 77% vun de Messschdatzione vum Daitsche Wedderdienscht sin die Werde niedrischer. Am druckenschde isses im Abril, om maischde Niederschlach gäbbt's im Dezember, nämlich 1,4 mol so viel. Insgesomt sin die Niederschläch aber ziemlich glaichmäsich iwwers Johr verdält. Nur bai 8% vun de Messschdazione gäbbts wännischer johreszaitliche Schwonkunge.
Do gäbbts e extra Artiggel: Gschischd vun de Schtadt Bärmesens
Bis 1900
![Thumb](http://upload.wikimedia.org/wikipedia/commons/thumb/b/b5/Pirmasens-1910.jpg/320px-Pirmasens-1910.jpg)
Bärmesens is 860 zum erschde mol in ännre Urkunde erwähnt wor, un zwar als „pirminiseusna“, des war e Siedlung wo zum Kloschder Hornbach geheert hat. De Nome kommt vum Hailische Pirminius, der des Kloschder baue geloss hat.
Em Londgraf Lui IX. vun Hesse-Darmschdadt hats im Jachtschloss vun soim Vadder in Bärmesens so gut gefall, dass er de Siedlung 1763 die Schdadtrechte gäb hat un soi Residenz doher verlet hat. Er hat in Bärmesens e Garnison uffgebaut, wail er im elsässische Buchswailer kä bewaffnede Soldade schdationiere gederft hat. Die Schdadt hat e Schdadtmauer kriet, e Schloss, e Exerzierplatz un die grescht Exerzierhall in Euroba no der im russische Sonkt Pedersburch. [1] Als de Londgraf 1790 geschdorb war, hat ma die Garnison uffgelest un Schluß war mit de kurze Blied vun de Schdadt. Die Fraue honn dann ògefong, zuerschd aus de alde Uniformreck, Schdoffschlabbe zu nehe. Des war de Òfong fun de Schuhschdadt Bärmesens.
1793 honn die Praiße un die Braunschwaicher die fronzesisch Moselarmee in de Schlacht bai Bärmesens besiecht. Trotzdämm is Bärmesens vun 1793 bis 1815 on Fronkraich gefall. Dodenoh is die Schdadt mit de iwwrich Palz zu Bayern komm.
Sait 1900
Die Encyclopædia Britannica aus'em Johr 1911 schraibt unner'm Stichwort "Pirmasens":
"Schdadt in Daitschlond, in de bairische Palz; 40 Maile westlich vun Schbeyer, 34.002 Inwohner (1905), on de Aisebohnlinie vun Biebermiehl. Die änzische bemerkenswerde Gebaide sinn es Rodhaus un die evangelisch Hauptkerch, in der e schänes Denkmal vun Lui IX (geschd. 1790), em Londgraf vun Hesse-Darmschdadt is. Hauptinduschdrie is die Produktion vun Schdiwwel un Schuh, awwer es werre a Mussiginschdrumende, Lädder und Maschine gemach."
1923/24 honn pälzische Separatischde vasucht, in Bärmesens dauerhaft Fuß zu fasse, sinn aber om 12. Februar 1924 geschaidert: Es Bezirksomt, de Sitz vun de Schdadtregierung, is vun de Bircher geschdirmt wor. Es hat uff baide Saide etliche Dode gäbb.
Om 9. November 1938 is die Synagog während de Novembepogrome zerschdert wor. Haid gäbbt's dort e Gedenkdafel in de Synagogegass. Bai äm erschde alliierde Bombeògriff om 9. Auguschd 1944 sin e Haufe Lait geschdorb. Om 15. März 1945 hat's e zwätti Bombardierung gäb, bai der die Inneschdadt praktisch komplett kabuttgeschmiss wor is. Acht Da schbeder, om 22. März 1945 sinn donn omerigònische Truppe in die Schdadt inmarschiert, domit war fa die Laid de Zwätte Weltkriech vorbai.
1946 is Bärmesens zum naie Bundeslond Rhoilond-Palz komm. Mit de rhoilond-pälzische Verwaltungsreform sinn 1969 de Erlehof, Fehrbach, Hengschberch, Niedersimte und Winzle ingemoindet wor, 1976 sinn dann noch Gerschbach un Winsberch dezu komm.
1989 hat die Fachhochschul Lautre in Bärmesens e Schdandort uffgemach. 1997 ware die US-Truppe, die sait'em Kriech do ware, fascht vollschdändich vun de Huschderheh abgezo.
Inwohnerentwicklung
|
|
|
Ä Grund fa de Rickgong vun de Inwohnerzahl sait 1970 war de Abzuch vun de omerigònische Schdraitkräft. Awwer a die Aldersschdrugdur un de Mongel on Arwaitsblätz tran dodezu bai.
Ma siet a daitlich, wie schdark sich des ausgewirkt hat, als de Lui IX. im achzehnde Johrhunnerd seu Residenz do gehatt hat.
Schdadtrad
De Schdadtrad in Bärmesens beschdeht aus 44 Radsmidglieder, die bai de Kommunalwahl om 7. Juni 2009 gewählt wor sinn.
Sitzverdälung:[3]
CDU | 36,6 % | -9,4 | 16 Sitze | (-5) |
SBD | 23,8 % | +2,5 | 12 Sitze | (+1) |
FWG | 12,6 % | +1,8 | 6 Sitze | (+1) |
REB | 6,2 % | -4,0 | 3 Sitze | (-2) |
LINKE | 5,7 % | +3,1 | 2 Sitze | (+2) |
FDB | 5,6 % | +3,1 | 2 Sitze | (+2) |
Griene | 5,4 % | +1,1 | 2 Sitze | (=) |
NBD | 1,5 % | +1,5 | 1 Sitze | (+1) |
Boiemäschder
- Dr. Bernhard Matheis (CDU), Owwerboiemäschder
- Peter Scheidel (CDU), Boiemäschder
- Michael Schieler (pardailos), hauptomdlicher Baigeordneter
- Helga Knerr (FWG), ehrenomtlichi Baigeordneti
Partnerschdädte
Mit'm fronzesische Poissy werd sait 1965 e Schdädtepardnerschaft gepflecht.
Muse'e
- Es Dynamikum im alte Rhoibäer is e Technikmuseum zum Mitmache
- Die Galerie mit Werke vum Bärmesenser Moler Hoinrich Birgel
- Die Hugo-Ball-Sommlung
- Es Schereschnittkabinett vun de Emmler Lisbeth
- Es Schuhmaschinemuseum
- Es Schuhmuseum
- Es Weschdwallmuseum in Niedersimde
Bauwerge
- Alter Friedhof mit Caroline-Saal (ehemalichi Laichehall, benonnt noh Londgräfin Karoline, awwer mit C sieht's vohrnähmer aus)
- Ehemalichi Könichlich-Bayrischi Kraftposchd (jetzd Museum un Veranschdaldungsord)
- Unnerer Schloßplatz mit aldem Radhaus
- Schuschder-Brunne
- Nai'i Schloßdrepp mit Schlossbrunne un em Schdier
- Ehemalichi londgräflichie Garnisònskärch (proteschtantischi Luther-Kärch)
- Exerzierplatz ("Exe") mit Naiem Radhaus
- Neiffer om Park (ehemalichi Schuhfabrik)
- Poscht-Dreieck (e paar Haiser aus de Grinderzait)
- Rhoibäer (ehemalichi Schuhfabrik, do drin is es Dynamikum un verschiedenes onneres)
- Feschdhall (Theadersaal fa verschiedene Veroschdaldunge)
- Johanniskärch
- Gebäude vun de ehemalische "Bayrische Schdaatsbonk"
- Die Schdreckbrick zwische Schache und Winzler Verdel is so e bissel es Wohrzaiche vun de Schdadt.
On de Zufahrsschdroße in die Schdadt un in de domolische Außebezirke vun Bärmesens schdehe noch e paar schäne Wòhnhaiser aus de Grinderzait (Zwäbrigger Schdroß, Londauer Schdroß, Lembä'er Schdroß, om Alde Friedhof). Im Zwätte Weltkriech is awwer viel kabutt gong, die gonz Inneschdadt war in Trimmer gelä. Aus em 18. Johrhunnerd gäbbt's noch e paar sogenonnde Grenadierhaiselcher, wo die Lui IX. fa soi Soldate hat baue losse. Noch älder is aigendlich nix, Bärmesens wa dodevor jo nur e klännes Baurekaff.
- Bärmesens - Pirmasens
- Foucaultsches Pendel im Dynamikum
- Hugo Ball im Forum Alte Post
- Caroline-Saal uffm Alde Friedhof
- Könichlich-Bayrischi Kraftposchd
- Aldes Radhaus
- Wabbefeld im Gäwwel vum „Alde Radhaus“
- Schuschder-Brunne
- Schloßdrepp
- Luther-Kärch
- De Exe
- Neiffer om Park
- Poscht-Dreieck
- Rhoibäer
- Feschdhall
- Johanniskärch un "Bayrische Schdaatsbonk"
- Schdreckbrick
Nadurdenkmäler un Parks
Zu de greßere Parks in Bärmesens gehere de Alde Friedhof, der zum Park umgewidmet wor is, nodämm de Waldfriedhof uffgemach wor war. Die frieher Insechnungshall werd inzwische als Carolinesaal fa kuldurelle Veròschdaldunge genutzt. De Neiffer-Park is vum Neiffer Emil näwer soiner Schuhfabrik ogelet wor, es schdehe viel alde Bäm drin. De Schdreckdalpark is entschdonn, als ma sich fa die Londesgadeschau 2000 beworb hat. Aus der is zwar nix wor, awwer ma hat es Gelände vun enner alde Gerwerai mol widder in die Raih bringe känne. Jetzt is e gonz netter Park entschdonn, wo a fa Kinner un Juchendliche viel gebott is. Om Aiswaiher gäbt's a noch e bissel Fraizaitgelände, wo ma schbaziere gehe konn, un Kinnerschbielblätz un e Schbortplatz gäbts do a. Außerdem kommer Minigolf do schbiele. De Aiswaiher hat ma mol ògelet, damit die Braueraie im Winder Ais hacke un inlachre gekennt hon, des ma im Summer gebraucht hat, um baim Braue es Bier zu kiehle. De Schdadtwald owwerhalb vum Aiswaiher is jetzt net direkt e Park. Aber im dem Waldschdick gäbt's a euniches mit Erholungswert. Schbazierwege nadierlich, interessonde Felsformatione, de Waldlehrpad, e Schbielblatz fa die Kinner, un ab un zu sieht ma a mol e paar Rehe, wonn a nätt grad om Schbielblatz.
Schbord
Es Aushängeschild vum Logalschbord is de FK Bärmesens. No'm Kriech waren'se ziemlich gut, honn a schunn e mol gonz vorne mitgeschbielt. Zwischedrin hat's eher e bissel beschaiden ausgesieh, ma war dann a mol in de Londesliga, awwer jetzt is ma in de Owwerliga Siedwest widder gonz gut debai.
Bildung
Bärmesens is jo e Middelzentrum vum Londkräs. Es hat drai Gymnasie: Es Hugo-Ball-Gymnasium (frieher Naischprachliches Gymnasium), es Immònuel-Kont-Gymnasium (frieher Altschprachliches Gymnasium, noch frieher sait 1836 die Ladoinschul) un es Laibniz-Gymnasium (frieher Owwerrealschul). Awwer ma konn a on de Berufschul soi Werdschaftsabi oder Technisches Abi mache. Außerdämm gäbbt's die Daitsch Schuhfachschul. Dezu komme acht Grundschule, drai Hauptschule, e Duali Owwerschul, e Realschul un de Sonnerschul Matzeberch. Sait 1989 gäbt's a e Ablecher fun de Fachhochschul Lautre.
Die Erwachsene kenne sich a bai de Volkshochschul waiterbilde.
Vereune
- Aero-Club Bärmesens
- ASB Kroisverbond Bärmesens
- 1. Carneval-Vereu Bärmesens, CVP
- 1. Mountain-Bike-Club Bärmesens e.V.
- Knubbe un Knode, Vereu fa alte Hondarbaitstechnike (Die honn iwrichens gar kä hochdaitscher Nome!)
- Oratoriechor Musikvereu Bärmesens
- Bezirgskontorai Bärmesens
- Donzclub Silwercasino e.V.
- Schdadtfaierwehrverband Bärmesens e.V.
- CVJM Bärmesens
- Wertschaftsjuniore Bärmesens-Zwääbrigge
- Pfadfinnergrupp e.V. Bärmesens
- VfB Poscht Bärmesens
- Turnvereu Bärmesens 1863 e.V.
- Bolizaischbortvereu Bärmesens
- Fraimaurerlosch "Zur Treue om Berch Horeb" #701 AFAM
- Mount Moriah Two Bridges Nahe Lodge #823 (english speaking)
- SSVP - Schbortschützevereunichung Bermesens 1887 e.V.
- SV 1907 Ruhbonk e.V.
- DLRG Bärmesens e.V.
- DRK Stadtverbond Bärmesens
- Photo Scene Bärmesens e.V.
- Reit- und Fahrvereun Bärmesens-Winzle
Regelmäsische Veròschdaldunge
- Londgrafe-Da, zwättes Wochenend im Abril
- Open-Air-Konzerde uffem Exe (Ober, Musical, Rock, Pop, Hip Hop)
- Schlabbeflicker-Feschd om zwätte Wochenend im Auguschd
- Exe-Feschd om zwätte Wochenend im Sebdember
- Feschdiwal Euroklassic (Zusomme mit Bitsch, Zwäbrigge, Blieskaschdel un de Verbondsgemä Zwäbrigge-Lond)
- Maimarkd, Ende Abril odder Òfong Mai
- Grenadiermarkd, maischdens Òfong Sebdember,
- Novembermarkd, Ende Okdober odder Òfong November
- Belznickelmarkd, e Woihnachtsmarkd in de Adventszait.
Wertschaftstrends
Bärmesens war sait'em 19. Johrhunnerd es Zendrum vun de daitsche Schuhinduschdrie. Sait de 1970er Johre isses allerdings immer schwierischer wor, sich in de Masseproduktion gäe die Kongurrenz aus'em Auslond zu behaupte. Die maischde òsässische Schuhfabrigge honn zugemacht, onnere hon ihr Produktiòn ins Auslond verlachert odder sich uf Nischesegmente schbezialisiert. De Lädderhonnel, de Maschinebau un a die Chemiebranche in Bärmesens sin urschbringlisch wäe de Schuhinduschdrie iwwerhaupt erschd endschdonn, endschbrechend honn die a Probläme kriet. So sin ungefähr 15.000 Arwaitsplätz verlor gong. Dann sin, als die Omerigòner abgezo sin, nochemol ungefähr 10.000 Soldade un Ògeherische fortgezo und 4.000 Arwaitsplätz fa Zivilbeschäftischde sin nochemol weggefall. 2002 hat's zum Baischbiel e Arwaitsloseòdäl vun 14,9% gäb.
Ma hat donn ògefong, es ehemolische Kasernegelände uf de Huschderheh und verschiedene leerschdehende Fabrigge wie de Neiffer om Park fa Naigrindunge oder a Òsidlunge vun Firme zu nutze. A im Rhoibäer is eunisches bassiert. Des war emol die grescht Schuhfabrig vun gonz Europa. Inzwische is es Dynamikum drin, die zwä Tageszaidungen Pirmasenser Zeitung' un Rheinpfalz [4][5]
Messeschdondord Bärmesens
Bärmesens is die änzisch Schdadt in Rhoilond-Palz, wo ma internationale Messe dorchfiehre konn. De Lui Kieffer hat es Gelände ab 1949 schbeziell fa die Pirmasenser Schuh und Lederwarenmesse uffgebaud. Die is no un no de Bach nunner gong, awwer diverse Messe gäbt's immer noch. Es sin 10 Halle mit 36.000 m2 iwwerdachter Fläche un 48.000 m2 Fraifläche inklusive Parkplätz. Außderdem gäbbt's e Kongressberaich mit 5 Konferenzräum, äm Sitzungssaal, 1.700 PKW- und 100 Busparkplätz. Es Gelände wärd a fa Ausschdellunge, Tagesveranschdaldunge, Schbordveranschdaldunge un Feschde genutzt.
Frier hat's hauptsächlich Schuhmesse gäb, zum Baischbiel die Pirmasenser Schuhmusterung (psm) un die plw (Internationale Messe für Leder, Schuh-Komponenten und mehr). Die hageha (Verbrauchermesse für Handwerk, Gewerbe und Handel, sait 1954), die Gesundhaitswelt un die Kulinaria sin noh un noh dezu komm, un e paar onnere Messe mit unnerschiedlicher Läwensdauer. Es Lond gäbbt immer mol widder Geld, um em Messeschdondort zu helfe, awwer es fallt nät laicht, mit Messe erfolgraich zu sinn, un gäbbt a immer mol wieder schdadtpolidische Turbulenze.[6] [7]
Sait 2005 hat ma versucht, a in onnere Schdätd Messe zu organisiere[8]. Des war awwer net grad rentabel. 2009 hat ma deshalb alle Mitarbaiter vun de Messegesellschaft entlosse misse, wail kä Geld mä do war. Die Messe in Bärmesens sin zuerschd mol vun de Schdadtverwaldung organisiert worre[9]; wischdische Veoschdaldunge wie die plw unn die hageha sollde awwa uff jede Fall weider in Bärmesens stattfinne.[10][11] Vun 2010 bis April 2012 hadd die Firma Mattfeldt & Sänger Marketing und Messe AG die Betroiung iwwanumm; said 2012 werd die Mess vun de Das AgenturHaus GmbH[12] ausgerischd, die a onnere Messe in de Stadt wie Anja - die Messe für Angeln und Jagen unn Kulinaria & Lifestyle[13] bedroie dud.
Vakehr
Vakehrsteschnisch dut sich nät besonners viel. Die B10 zwische de A8 bai Bärmesens un de A65 bai Londau wärd zwar noh und noh vierschburisch ausgebaut. Bis Rubberschwiller is ma schun komm, awwer des is wännischer wie e Verdel. Es wärd wohl noch Johrzehnde daure, bis alles ferdisch is. No Norde gäbt's die sogenonnte A62 no Londschduhl un donn waider in Richtung Trier, die awwer im Kräs nur zwäschburisch is, und die B270 no Lautre, die a net viel besser ausgebaut is. No Weschde die A8, do kommer nix sae. No Siede sinn nur Schdreselscha dorch de Wald, awwer uf de onner Said vun de fronzesisch Grenz sieht's a net onnerschd aus.
Iwwer die 6,97 km long Stichstreck Biewermiel (Bärmesens Nord) - Bärmesens Hauptbòhnhof is Bärmesens per Aisebòhn ògebunn. Vun Bärmesens Nord geht's waider no Lautre. Uf de Biewermiel kraizt die Schdreck vun Londau no Sabrigge. Fern- und Giederverkehr gäbbt's uff dänne Schdrecke nät. Die geografische Komplikazione honn zu ennre Schtroph in em Fasnachtslied gefiert: "Zwische Bärmesens un Biebermiel, do gäbt's e Tunell, wom'mer 'rinfahrt wärd's dunkel, wom'mer 'rausfahrt wärd's hell."
Vun 1905 bis 1943 hat Bärmesens e elektrischi Schdroßebòhn gehatt, was sellemols arisch fortschrittlisch war. Vun 1941 bis 1967 dann noch Owwerlaidungs-Omnibusse.
Òsässische Firme
Peter Kaiser (sait 1838) is die äldescht Schuhfabrig vun Daitschlond. Framas macht Läschde un Sohle unner onnerem fa Adidas un Nike. Profine macht Kunschschdoffpladde un -profile, unner onnerem fa Fenschder. Keck schdellt Induschdriefarwe her, z. B. fa Fußbäll. Die Park & Bellheimer, die unner onnerem aus de Parkbrauerai hervor gong is, gehert mittlerwaile zu de Monnemer Aichbaum-Brauerai. Convar is e Schbezialischd fa Datereddung.
Medie
Bärmesens hat zwä Tageszaitunge, die Bärmesenser Zaitung, die es sait 1832 gäbt, un die Rhoipalz mit ihrem Lokaldäl, de Bärmesenser Rundschau. Es gäbt dann doch es Schdadtmagazin P6 un e Wochebladd. In de Schlossgalerie sitzt es Radio Pirmasens. Donn gäbt's noch de Offene Kanal, e Kabelsender mit rechionale Baiträch.
Fraizait- und Sportòlache
De Pirmasenser Luft- und Badepark (Plub) is es schdädtische Schwimmbad. Es Hallebad is 1988 komplett modernisiert wor. Uff de Huschderheh is es schdädische Schdadion, des vorwiechend vum Fussballklub Bärmesens FKP genutzt wärd. Om Aiswaiher gäbt's e Schbord- un Fraizaitòlach mit Schbielplatz, Bolzplatz, Minigolf, Badminton un Volleyball, denäwe de Schbortblatz om Mordloch, denne ma de Auswärdische zulieb a Spesbach nennt. De Schdreckdalpark is aus ennrer Induschdriebrach entschdonn, un ännre Bewerbung zur Londesgardeschau, aus der zwar nix wor is, awwer die Schdadt hatt deswäe de Kopp nät hänge geloss un grad seläd doch e schäner Park draus gemach. Do is e Wasserschbielplatz fa Kinner, e Skateboard-Parcours fa die greßere un a nochemol Schbielfelder fa diverse Fraizaitschbordarde.
Bärmesens is ...
- de änzische internazionale Messeschdondord in Rhoilond-Palz
- es weltgreschde Schuhhondelszentrum
- Sitz vun de älteschd Schufabrig vun Europa (Peter Kaiser, gegrindet 1838)
- ähnlisch wie Rom uf siwwe Hichel gebaut (kommt halt druff ò, wie ma zehld)
- 2007 die Schdadt mit de maischde Privatinsolvenze in Daitschlond
- vor Johre die Schdadt mit de maischde Millionäre pro 1000 Innwohner in Daitschlond gewässt
- Sitz vum US-Sender "Bärmesens-Huschderheh", wo 1969 Signale vun Apollo 11 empfong un no Huston/Texas iwwertra wor sin
- zwar kä Woibauord, awwer Geburtsord vunn de ersche Pälzische Woikenischin Ruth Bachroth, gekiert 1931
- daitscher Sitz vun Convar, die no de Òschläch vum 11. Sepdember 2001 Feschdpladde vun de Computer aus de Tirm un Blackboxe unnersucht un Date rausgeläs honn.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.