From Wikipedia, the free encyclopedia
Der Urglaawe iss en heidischer Paad, wu deel Aehnlichkeit zum Asatru un annere Paade draagt, un wu aaverwandter zum gschichtliche Teitonische Heideland iss. Er entnimmt sei Grutze aus der Deitsche Heeliewing, Braucherei,[1] aus Deitsche Volksaage un Gebreich, un aus annere Germanische un Skandinavischen Urschprung. Der Urglaawe benutzt allebeed die Englisch un Deitsch Schprooche.
Wie bei annere Teitonische Glaawe un philosophische Paad kenne Urglaawische Aahenger unnerschittliche Iwwerzeigunge haawe,[2] die vum vielgedderische Widderuffbau zu sammegemischde (auswaahlendische), pragmatische psychologische, adder mystische Schtandpunkde rumwandre.
Die Urglaawe sinn Vielgedderdiener. Menscht glaawe, ass es gedrennde, deitliche Gottheide gebt; yeder hot sei eegne Gemietsort, Fehichkeede, und Schwachheide. Die Gottheide sinn net as allwissend un allmechtich bedracht. [3]
Die Aagschtalde un die Ethike im Urglaawe warre beim Lehr vum paerseenliche Urleeg adder Wurt gefiehrt. Sell iss en Lehr, wu zu beede em Glück un em Schicksaal verbinne iss, awwer drin iss die Zukunft net vorhaerbeschtimmt; Sie iss sonner uff em waahrscheinlichschde Erfolk vum Zuschtand in der Gegewart uffgebaut. [4]
Urglaawe erkennt der Verhaldegrundsatz vun der Asatru Folk Assembly un der Odinic Rite. Der Grundsatz watt im Urglaawe "Die Reenheide" genennt. Zusetzlich zu de neine Reenheide, fiegt der Urglaawe die Weisheit, die Selbschtvisidiering, die Verwandschaft, zweckmaessiches Mitleid, un die Neigierheit, fer meh iwwer der Welt um uns zu lanne." [5]
En ausgeschprocher Sinn fer ekologischi Verwaltung[5][6] un Geischtlichkeit ermuntert watt, so wie der Lehr vum Friede.[7]
Im Urglaawe sinn die Gottheide gleich die in der Naddische Mythologie. Yedoch kann der Begriff vun eenzeler Gottheit unnerschittlich sei. Zum Beischpiel: im Urglaawe iss die wichtichscht Gottheit die Holle.[8]
Der Urglaawe hot aa en Aablick vun der Voreldreverehrung. Die Gedder un Gedderinne sinn wie eldere Freindschaft bedrachtet.[3] Es gebt zaahlreiche Wese, wie Wichde, Zwariche, un Elwe, die aa verehrt warre.
Der Sege aardet em Asatru Blot un bschteht aus der Verheelichung vum Drankopfer (gwehnlich Med, Eppelwei, Bier adder Hollebeer-Garyel[9]), es im Bierschtee zwische de Mitdiener iwwergewwe watt. En anneri Gottheit (adder en Drupp vun Gottheide) iss bei verschittene Vorfall zum Zweck vum Sege geehrt. Nochdem eener Saufe watt es Rescht vum Drankopfer aus em Schtee in en Schissel rausgschitt. Die Mitdiener warre mit en bissel vum Rescht as en Sege vun der Gottheit aagschpritzt. Es watt dann in der Bau adder in en Bach as Opfer zu geehrter Gottheit nausgschitt.[10]
Em Sammel sei Kennzeech (adder die Versammling) warre uff der feierliche Bedingung in der Braucherei un warre vum Sumble im Asatru beeiflusst. En gsegentes Drankopfer (gwehnlich Med, Eppelwei, Bier adder Hollebeer-Garyel), es im Bierschtee zwische de Mitdiener fer drei Runde iwwergewwe watt. Die aerscht Rund bschteht gwehnlich vum Drinkschpruch zu einer Teitonische Gottheit; die zwett watt gwehnlich zu de Voreldre adder Helde; die dritt ist zum ennichebber. Am End vun yeder Rund watt en bissel vum Drankopfer in en Schissel gewwe, die schpeeder in der Bau adder in en Bach as en Opfer fer die teitonische Gedder un die Wichde nausgschitt watt.[11]
Heit iss der Urglaawe im Pennsilfaani, Illinoi, Mischigaan, Flooridi, Massatschusetts, und Luuisiani ausgeiebt. 'S gebt Druppe un Iewer aa in annere Weltdeele. Die genaa Zaahl der Aahenger weltweit iss unbekannt, besonners as Aahenger kenne gleichzeitich der Urglaawe un aehnliche Paade, wie der Asatru, folye.
Der Urglaawe kann in der Eisamkeet adder in Druppe ausgeiebt warre. Organizierde Druppe heesse Sippschafte und kenne entwedder schteife un rechmaessiche heidische Karriche adder eefach nominalische Uffbaue warre. Ebwohl der Urglaawe sich uff die heidische Elemente konzentriert, die im Deitsche Wandel[12] iwwerlewe, un iss en schtammischi Bewegung, es gebt wennicher Eidruck uff die Herkunft vun eem vornemliche Mensch.
Wie die Deitsch Heeliewing, die Braucherei, schutzt viele heidische Kunde, doch net vollschtennich waer, zieht der Urglaawe, was er vun der Braucherei kann un baut es Rescht uff germanischi Iwwerliefering nuff. So as mit aehnliche Weise wie Folketro finnt der Urglaawe sei Grutz im ordliche Wandel un finnt dann zusetzlichi Hinnergrundauskunft vun Eiropisch-Germanische un Skandinavische Urschprunge.[13]
Der Urglaawe benutzt die zaahlreichen Hexezeeche, adder Scheierschtanne, wu in der Deitscherei allgemee sinn. [14]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
