Eligio Melfor
eskritor, direktor teatral, aktor i kómiko yu di Kòrsou From Wikipedia, the free encyclopedia
Eligio Melfor, nòmber artistiko di Julio Constantino Hermanus (☆ 12 di aprel 1940 na Kòrsou - † 25 di mart 2023 na Kòrsou) tabata un eskritor, produktor, direktor teatral, aktor i kómiko yu di Kòrsou.[1] E tabata e eskritor di mas grandi di obranan teatral di Kòrsou i un di e komediantenan mas konosí di Karibe Hulandes.[2] E tabata skirbi na Papiamentu.
E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Eligio Melfor
| Pais di nashonalidat | Reino Hulandes  |
|---|---|
| Nòmber di dilanti | Eligio |
| Fam | Melfor |
| Fecha di nasementu | 12 aprel 1940 |
| Lugá di nasementu | Kòrsou |
| Fecha di fayesimentu | 25 mart 2023 |
| Lugá di fayesimentu | Kòrsou |
| Okupashon | aktor |
| Distinshon | Premio Cola Debrot |
Komo hóben Eligio Melfor tabata ke bira kantante. Sinembargo, el a realisá ku su talento tabata mas den teatro, pasobra e tabata hasi hende hari fásilmente. P'esei el a disidí di busk'é den e direkshon ei.[1] E tabata ke bai Hulanda pa studia drama, pero su mama a strob'é.[3] Na aña 1959 Melfor a optené su diploma di Mulo i un aña despues ta kuminsá su karera na “bedrijfschool” na Shell. Promé ku esey e tabata deklamá poesia di fábula ku hopi éksito tur djaweps anochi na Radio Hoyer. Durante di e periodo aki el a kuminsá ku teatro i tabata skirbi fábula imitando zonidonan di instrumentonan i di bestia. E tabata outodidakto. Desde dékada 1960 e tabata usa e nòmber Eligio Melfor i tabata presentá su obranan di fábula, chiste i komedia na Club di Shell, sigui despues pa Roxy, Sentro Pro Arte (CPA) i mas resien Teater Luna Blou i Because Entertainment Centre.
Su promé éksito e ta kosecha ku su presentashon musikal Dushi Corsow den Teatro Roxy na 1968, kual a dun'e e título di ‘kómiko numero uno’.[4] E mesun aña e tabatin éksito na CPA ku Amor sin Pasaporte i na 1971 ku Berberin den Politik. Su komedia hopi biaha tabata tin un mensahe mas profundo i tabata mas aksesibel pa mas hende.[1] E tabata e promé persona di koló di Kòrsou ku a presentá den e CPA elitario i a hasi e teatro aki aksesibel pa komedia popular pa un públiko di koló for di tur skina di e poblashon.[1] Komo aktor Melfor tabatin e talento pa pone hende hari, mediante su aksènt y su expreshon di kara.[1]
Komo eskritor el a produsí mas di 32 obra teatral. Den su obra Beberin den Politik, un seri di sátira polítiko, e ta laga diferente personahe kómiko refleha riba polítika na un manera mahestral. Banda di e protagonista Beberin, tambe e personahenan Kechap i Chiwawa ta aparesé den e obranan. Melfor mes a yega di aparesé komo kandidato riba lista di URA pa elekshon di Parlamento di Antias Hulandes na 1966. Desde aña 1971, durante diferente elekshon ku a bin despues, Melfor a aktualisá i presentá e obra di nobo. Su produkshonnan di komedia no tabata pone hende hari so, pero tabata trese un mensahe pa pueblo por sigui pensa riba i siña di dje na final di e komedia. Entre su obranan Hulanda mi ta bai a bati tur rèkòrt ku mas di 150 presentashon na Kòrsou, Aruba i Hulanda durante 2003/2004.[5] Inspirá pa e fluho di migrashon den dékada 1990 Melfor ta aserká ku humor e tema serio aki. E storia ta trata di un soño den kual hendenan di paisnan bisiña di Kòrsou, manera Venezuela i Haiti, ta muda pa e isla despues ku tur yu di Kòrsou a bandona esaki pa bai biba na Hulanda. Despues di un par di aña, ora dos persona di Kòrsou kier a bolbe, nan a ser detené i pone riba e avion pa Hulanda. Na final ta resultá di ta un soño.[4]
Pa televishon Melfor a traha spotnan, skirbi vários komedia di un akta i a produsí programanan éksitoso manera: Hari, hari (1977), Humor ku Eligio (1991) i Famia Fecunda.
Eligio Melfor a skirbi i dirigí pa teatro te na ultimo di su bida.[3] E ta fayesé dia 25 di mart 2023 a konsekuensia di kanser di pulmon na edat di 82 aña.[2]
Melfor a risibí un plakat "Ekselensia den Kòrsou" di MCB (1989) i pa su obra Hulanda mi ta bai e Premio MCB. El a risibí e Premio Cola Debrot (1976), Krus di Mérito Kòrsou (2020) i e kondekorashon komo Kabayero (ridder) den Orden di Oranje-Nassau (2021).[6] Na 2007 Arte di Palabra ta otorg'é e Tapushi Literario rekonosiendo su kontribushon na idioma Papiamentu.[7] Na 2014 a marka su man den sement na "Boulevard of Fame" di Teatro Luna Blou.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
