Anselmus Theodoor (Boy) Dap (☆ 25 di òktober 1933 na Otrobanda - † 2 di novèmber 2021 na Kòrsou) tabata un músiko, kantante i kompositor kurasoleño. E tabata konosí komo Tata di Tumba, un título di honor pa logra gana e Festival di Tumba di Kòrsou na no mas ku dies okashon.[1] El a bai den historia komo un artista legendario ku a popularisá e ritmo di tumba.
E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Boy Dap
| Pais di nashonalidat | Reino Hulandes  |
|---|---|
| Nòmber di nasementu | Anselmus Theodoor Dap |
| Nòmber di dilanti | Boy |
| Fecha di nasementu | 25 òktober 1933 |
| Lugá di nasementu | Otrobanda |
| Fecha di fayesimentu | 2 novèmber 2021 |
| Lugá di fayesimentu | Kòrsou |
| Okupashon | musiko, kantante, kompositor |
| Género | Tumba |
Boy Dap a nase i lanta na Otrobanda den un famia musikal. Su mama Carmen Rosalina tabata kanta i toka tambú i su tata Johannes Dap, nasé na Sürnam, tabata un konosido músiko ku tabata toka saksofon, drùms, klarinèt, piano i flùit. E tabata praktiká na kas ku su grupo musikal, Bright Star Band. Na e edat di shete aña Boy ta kuminsá kanta den koro di misa di Pietermaai.[2] Na 1949 e ta debutá na Hòfi Marchena kantando e bolero, It wouldn’t happen again na spaño ku e konhunto ‘Estrellas Curazao’.[3] Poko despues e ta saka un kansion na papiamentu ku ritmo di merengue, titulá Teine tur Coloresh of mihó konosí komo Palufriu, den kual e ta kanta di un bendedó di palufriu portugues. Na final di dékada sinkuenta di siglo binti Boy Dap i e orkesta Estrellas del Caribe ta hasi furor ku e tumba Sota di bulpees.[3] Ku e kansion akí e ta reintrodusí e pregon den tumba, esta e diálogo entre e kantor i e koro, manera sa ta komun na Afrika i den tambú. Despues di Trinta di Mei e ta lansa e tumba Huma ku un letra yen di sátira i humor. E susesonan akí tambe ta duna empuhe na buska e identidat krioyo den músika. Komo miembro di Asosiashon di Músiko Dap a boga ku éksito pa tumba bira e ritmo nashonal di Karnaval.[3]
Dap tabata un intérprete di práktikamente tur género di músika, ounke e tabata mas konosí komo tumbero. Su promé hit grandi tabata e tumba "E Djaka" ku a graba huntu ku e konhunto Lluvia Musikal.[4] Na Festival di Tumba di Kòrsou e ta partisipá 22 biaha. E ta sali ganadó di e promé festival na 1971 ku e komposishon Bashé. Aki ta kuminsá su trayektoria di éksito den e festival di tumba logrando koroná "Rei di Tumba" nuebe biaha mas. Su tumbanan ganadó ta: Dal'e Kos (1973), Mandé (1974), Sigi Awor (1979), Tur hende kompañé (1981); Un biaha mas (1983), Despensa e ta bini (1985), Waya pasa bai (1989), Bolt'e blachi (1992) i Klab'é (1997). Na aña 1988, 1990 i 1995 e ta titulá promé finalista. Den su promé komposishonnan di tumba ainda tabatin influensia musikal di kalipso, un ritmo karibense masha popular den e époka promé ku tumba. Na e islanan ABC su tumbanan na papiamentu ta bira masha popular i konosí. Na 1989, den e promé festival di tumba di Islanan ABC na Aruba, e ta keda elegí e promé "Rei di Tumba di Antias i Aruba" ku su tumba Waya pasa bai.[5]
Anselmus (Boy) Dap a fayesé na edat di 88 aña. Dia 14 di novèmber el a wòrdu derá na santana di Bethania na Brievengat. Un akto ku tabata presidí pa un programa konmemorativo ku rekorido di e ruta di Karnaval.[6]
Na Bonam, bario kaminda diferente kaya a haña nòmber di artista lokal, el a wòrdu honrá ku Kaya Anselmo T. (Boy) Dap.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
