parti west di Kòrsou From Wikipedia, the free encyclopedia
Bandabou òf Band'abou ta, den boka di pueblo, e nòmber pa indiká e parti west di e isla di Kòrsou ku ta situá pabou di bientu. E region aki ta ekstendé di Grote Berg te Westpunt i ta konosí pa su diferente seru i un paisahe natural i karakterístiko. Na kosta nort e laman ta kibra konstantemente riba e barankanan. Na kosta sùit ta situá e refnan di koral i un kantidat di boka i playa. Situá sentral den Bandabou ta Seru Kristòfel, e punto mas altu di Kòrsou.
Na 1925 Kòrsou a wòrdu reparti den tres distrito. Inisialmente e distrito urbanisá di Willemstad tabata limitá unikamente na e kapital Willemstad, pero desde 1930 esaki a expande supstansialmente ku zonanan residensial ront di dje. Banda di Willemstad tin dos distrito, e asina yama "distrito pafó" di Bandabou i di Bandariba.[1]
Den siglo 17 i 18 mayoria di e plantashi i esunnan mas grandi tabata establesé na Bandabou. E plantashinan tabata e promé sentronan di residensia den e zona. Despues di manumishon i e abolishon di sklabitut bario y lugánan a lanta unda eks-katibu tabata biba i tabata sa di kontinua pa un parti ku nan tradishonnan kultural afrikano. Barber a konverti den e lugá prinsipal di Bandabou.[2]
Mientras desaroyo tabata konsentra riba e distrito di Willemstad, e distritonan pafó a keda praktikamente isola pa largu tempu debi na e distansia i e eskases den konekshon.[3] Komo resultado, e region ta skars habitá den komparashon ku e restu di e isla i e edifisionan ta plamá.[4]
Ku e konstrukshon di kaminda pa Punda i konekshon riba retnan sentral di elektrisidat, awa i telekomunikashon desde meimei di siglo 20, Bandabou a konvertí gradualmente den un atrakshon turístiko importante. Banda di paisahe, lanthùis, pueblo i playanan, e region ta spesialmente konosí pa su herensia kultural, manera e fiestanan di seú i karnaval. E sistema di plantashi den e parti west di Kòrsou a wòrdu nominá na 2010 komo kandidato di Reino Hulandes pa e lista di patrimonio mundial di UNESCO.
Distrito di Bandabou | ||
---|---|---|
Lugá[5] | Habitante (2011) | |
Boca Samí | 5.732 | |
Souax | 5.114 | |
Tera Kòrá / Grote Berg | 4.388 | |
Barber | 2.412 | |
Soto | 2.233 | |
Lelienberg | 1.101 | |
Westpunt | 738 | |
Flip | 601 | |
San Willibròrdu | 588 | |
Pannekoek | 365 | |
Lagun | 321 | |
Tera Pretu | 271 | |
Wacao | 107 | |
Hato | 45 | |
Christoffel | 40 |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.