Arikok

Arikok ta un sero na Aruba, situa den e seccion central di e isla den Parke Nacional Arikok. E ta midi 185 meter riba nivel di laman, loke ta hacie e di dos sero mas halto despues di Jamanota.

Arikok
Imagen desea: Arikok
Haltura	185 m
Coordinatonan	12°31′0″N 69°56′0″W
Pais	Aruba
region	Paradera
Area protehi	Parke Nacional Arikok
[Edita Wikidata] · [Manual]

Su structura geologico ta consisti di diabaas, e piedra volcanico mas bieu presente riba e Islanan ABC.^[1] Pintura indjan a wordo haya den e formacionnan di baranca na pia di a sero.^[2]

E origen di e nomber Arikok no por wordo establece cu exactitud. Algun ta asumi cu e ta trata di un palabra indjan,^[3] mientras otronan ta indica cu e ta bin di Arie Kok. Den pasado e tabata propietario di un plantashi chikito cu un cas di torto den e region aki. Alrededor di e cas tabatin un hofi cu diferente sorto di mata comun na Aruba, cual sitio awendia ta hiba e nomber Cunucu Arikok.

Sero Arikok ta ocupa un posicion strategico door di su ubicacion y elevacion. Riba e top tin desde aña 1971 ekiponan instala di tipo "VHF Omnidirectional Range" (VOR) pa transmiti señalnan esencial pa radionabegacion di aviacion.^[4]

Tanto e area como e top di Arikok ta accesibel pa publico, cu por yega na pia of cu vehiculo 4×4 via un caminda no asfalta.