selebrashon di e firmamentu di Statuut From Wikipedia, the free encyclopedia
Dia di Reino (ingles: Kingdom Day, hulandes: Koninkrijksdag, antes Statuutdag) ta e selebrashon di e echo ku e firmamentu di e Statuut pa Reino Hulandes riba 15 di desèmber 1954 a pone fin na e époka kolonial den Reino Hulandes.[1] Dia 15 di desèmber ta un dia ofisial pa hisa bandera na tur edifisio públiko den reino.
Na 1956 a introdusí den Reino Hulandes, riba proposishon di Antias Hulandes, e asina yama "Statuutdag" komo dia pa konmemora firmamentu di statuut.[2] A skohe 15 di desèmber, fecha ku Reina Juliana a firma e akta di konfirmashon di e statuut den "Ridderzaal" na Den Haag. Komo representante di gobièrnu antiano a firma Efraïn Jonckheer. E statuut ta un lei di reino, ku ta regla e relashonnan entre Hulanda i e teritorionan ultramar bou di Reino Hulandes. Na 1954 e orden konstitushonal nobo a marka un punto di importansia históriko den e proseso di dekolonisashon hulandes, ku Reina Wilhelmina a anunsiá dia 7 di desèmber 1942 via Radio Oranje.[1] Na inisio tabata trata di e teritorionan ultramar Antias Hulandes, Nieuw Guinea Hulandes i Sürnam.
Despues di tempu Nieuw Guinea (1962) i Sürnam (1975) a bandona e Reino Hulandes, mientras Aruba (1986) a bandona Antias Hulandes pa bira un pais outónomo denter di reino. Finalmente na 2010 Antias Hulandes a wòrdu disolbí, kreando e paisnan outónomo Kòrsou i Sint Maarten. Awendia e statuut ta vigente pa e kuater pais di reino: Hulanda, Aruba, Kòrsou i Sint Maarten.
Kontrario na Hulanda, e fecha di 15 di desèmber tabata ofisialisá pa lei antiano komo dia di fiesta y pues tabata un dia liber.[3] Sinembargo, na aña 1985 a keda disidí di entrega e status aki na fabor di otro dianan konmemorativo, manera Dia di Bandera (Kòrsou) i Dia di Himno y Bandera (Aruba).[1][4] Mientras awendia e no ta un dia di fiesta na ningun parti di reino, ambtenar i skolnan na e islanan Bonaire, Sint-Eustatius i Saba si tin un dia liber, konforme loke tabata e kaso antes di a bira munisipio spesial di Hulanda na 2010.[5]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.