ଆସିର ପର୍ବତମାଳା

ଆସିର ପର୍ବତମାଳା (ଇଂରାଜୀରେ Asir Mountains^[1] ଆରବୀୟ ଭାଷାରେ جِبَال ٱلْعَسِيْر}}, ଜିବାଲ୍ ଅଲ୍ ଆସିର୍) ଦକ୍ଷିଣ-ପଶ୍ଚିମ ସାଉଦି ଆରବରେ ଲୋହିତ ସାଗର ସହିତ ସମାନ୍ତରାଳ ଭାବେ ଦଣ୍ଡାୟମାନ । ସାଉଦି ଆରବର ଆସିର ଅଞ୍ଚଳ ସହିତ ଏହି ପର୍ବତମାଳାର କିଛି ଅଂଶ ୟେମେନ ସୀମା ପର୍ଯ୍ୟନ୍ତ ବ୍ୟାପ୍ତ । ପର୍ବତଶ୍ରେଣୀର କ୍ଷେତ୍ରଫଳ ଆନୁମାନିକ ୧ ଲକ୍ଷ ବର୍ଗ କିଲୋମିଟର । ଏହି ଅଞ୍ଚଳ ମଧ୍ୟରେ ପର୍ବତ, ସମଭୂମି, ଉପତ୍ୟକା ଓ ମାଳଭୂମି ରହିଛି ।^[2] କହିବାକୁ ଗଲେ, ଆସିର ପର୍ବତମାଳା ସରୱାତ ପର୍ବତମାଳାର ଅଂଶ ।^[3] ସରୱାତ ପର୍ବତମାଳା ଲୋହିତ ସାଗର ସହ ସମାନ୍ତରାଳ ଭାବେ ସାଉଦି ଆରବ ଓ ୟେମେନରେ ଆରବୀୟ ଉପଦ୍ୱୀପର ପଶ୍ଚିମାଂଶରେ ଅବସ୍ଥିତ ।^[4][5][6] ଏହି ପର୍ବତମାଳାର ଆରବୀୟ ନାମର ଅର୍ଥ ହେଉଛି ‘କଷ୍ଟକର’ । ଉତ୍ତର-ଦକ୍ଷିଣ ଦିଗରେ ଏହି ପର୍ବତଶ୍ରେଣୀ ବ୍ୟାପି ରହିଛି ।

ଆସିର ପର୍ବତମାଳା جِبَال ٱلْعَسِيْر
جِبَال ٱلْعَسِيْر (ଆରବୀୟ ଭାଷା)
ଜବାଲ ସୌଦାଃ ଶିଖରରୁ ପର୍ବତମାଳାର ଦୃଶ୍ୟ
Location
ଆସିର ପର୍ବତମାଳା جِبَال ٱلْعَسِيْر Show map of Saudi Arabia ଆସିର ପର୍ବତମାଳା جِبَال ٱلْعَسِيْر Show map of Asia
Coordinates	21.6°N 39.8°E / 21.6; 39.8

ଭୂବୈଜ୍ଞାନିକ ତଥ୍ୟ

ପର୍ବତଶ୍ରେଣୀରେ ଥିବା ଏକ ପଥୁରିଆ ପର୍ବତ

ଆସିର ପର୍ବତମାଳା ମୁଖ୍ୟତଃ ଜୁରାସିକ୍, କ୍ରିଟେସିୟସ୍ ଓ ପାଲିଓଜିନ୍ କାଳର ସ୍ତରୀଭୂତ ଶିଳା, ଚୂନ ପଥର, ବାଲିପଥର, ଶେଲ୍ ପ୍ରଭୃତି ଶିଳାରେ ଗଠିତ । ପର୍ବତମାଳାର ଭିତ୍ତିଭୂମି ପ୍ରାକ୍-କାମ୍ବ୍ରିୟାନ୍ କାଳର ମୁଗୁନି ପଥରରେ ଗଠିତ ।^[2]

ଜଳବାୟୁ ଓ କୃଷି

ସାଉଦି ଆରବର ସମସ୍ତ ଅଞ୍ଚଳ ମଧ୍ୟରୁ ଏଠାରେ ବାର୍ଷିକ ସର୍ବାଧିକ ବୃଷ୍ଟିପାତ ହୋଇଥାଏ । ଆର୍ଦ୍ର ଅଞ୍ଚଳରେ ବାର୍ଷିକ ହାରାହାରି ୬୦୦ ମିଲିମିଟରରୁ ୧୦୦୦ ମିଲିମିଟର ବୃଷ୍ଟିପାତ ହୋଇଥାଏ । ପର୍ବତମାଳାର ପୂର୍ବସ୍ଥ ସମଭୂମି ଓ ମାଳଭୂମିରେ ବାର୍ଷିକ ସର୍ବାଧିକ ହାରାହାରି ୫୦୦ ମିଲିମିଟର ଓ ସର୍ବନିମ୍ନ ୧୦୦ ମିଲିମିଟର ବା ତାହାଠାରୁ କମ୍ ବୃଷ୍ଟିପାତ ହୋଇଥାଏ ।^[2] ପର୍ବତମାଳାର ପଶ୍ଚିମ ପଟରେ କୁହୁଡ଼ି ଓ ମେଘ ସୃଷ୍ଟି ହେବା ବେଳେ ପୂର୍ବ ପଟ ଅପେକ୍ଷାକୃତ ଶୁଷ୍କ ।

ସୋପାନ ପଦ୍ଧତି ଅବଲମ୍ବନ କରି ଏଠାରେ କିଛି ମାତ୍ରରେ କୃଷି କାର୍ଯ୍ୟ କରାଯାଇଥାଏ । ଗହମ, କଫି, କାର୍ପାସ, ନୀଳ, ଅଦା, ପନିପରିବା ଏବଂ ତାଳ ଇତ୍ୟାଦି ଏହି ଅଞ୍ଚଳର ପ୍ରମୁଖ କୃଷି ଉତ୍ପାଦ । ଏଠାକାର ଅଧିବାସୀ ଗୋରୁ, ମେଣ୍ଢା, ଛେଳି ଓ ଓଟ ପରି ଜୀବ ମଧ୍ୟ ପାଳନ କରିଥାନ୍ତି ।

ଜୈବବିବିଧତା

ଏଠାକାର ଭୂଗଠନ ଓ ଉଚ୍ଚଭୂମି ଯୋଗୁଁ ଏହି ଅଞ୍ଚଳର ଜୈବବିବିଧତାର ସ୍ୱାତନ୍ତ୍ର୍ୟ ବଜାୟ ରହିପାରିଛି । ଏହି ଅଞ୍ଚଳରେ ଅନେକ ନୂତନ ମିଜୋଗାଷ୍ଟ୍ରିଆ ଶିଉଳି ଓ ଛତୁ ଜାତୀୟ ଉଦ୍ଭିଦ ଆବିଷ୍କୃତ ହୋଇଛନ୍ତି ।^[7] ଏହି ଅଞ୍ଚଳରେ ରହିଥିବା ବଣରେ ମୁଖ୍ୟତଃ ଜୁନିପର୍ ଜାତୀୟ ଉଦ୍ଭିଦ, ଆକାଶିଆ ଜାତୀୟ ଉଦ୍ଭିଦ ଓ ଅନ୍ୟ ବୁଦା ଜାତୀୟ ଉଦ୍ଭିଦ ପରିଲକ୍ଷିତ ହୁଅନ୍ତି । ସମୁଦ୍ର ପତନରୁ ଉଚ୍ଚତା ଅନୁସାରେ ଆସିର ପର୍ବତମାଳାର ଉଦ୍ଭିଦମାନଙ୍କ ବିବିଧତା ପରିଲକ୍ଷିତ ହୁଏ । ୪୦୦ରୁ ୧୦୦୦ ମିଟର ଉଚ୍ଚତା ପର୍ଯ୍ୟନ୍ତ ଥିବା ପର୍ବତର ନିମ୍ନାଂଶ, ୧୦୦୦ରୁ ୧୬୦୦ ମିଟର ଉଚ୍ଚତା ପର୍ଯ୍ୟନ୍ତ ପର୍ବତର ଢାଲୁ ଅଞ୍ଚଳ, ୧୬୦୦ରୁ ୨୨୦୦ ମିଟର ଉଚ୍ଚତା ଅଞ୍ଚଳ, ୨୨୦୦-୩୧୦୦ ମିଟର ଉଚ୍ଚ ଅଞ୍ଚଳ ଓ ପୂର୍ବସ୍ଥ ବୃଷ୍ଟିଛାୟା ଅଞ୍ଚଳର ଉଦ୍ଭିଦ ପରସ୍ପରଠାରୁ କିଛି ମାତ୍ରାରେ ଭିନ୍ନ ।^[8]

ଲୋପ ପାଇ ଆସୁଥିବା ଆରବୀୟ କଲରାପତ୍ରିଆ ବାଘ ଉପପ୍ରଜାତିର ଶେଷ ପରିବାସ ରୂପେ ଆସିର ପର୍ବତମାଳା ଜଣା ।^[2][5][6] ଆରବୀୟ କଲରାପତ୍ରିଆ ବାଘ ସମୁଦ୍ର ପତନରୁ ୧୫୦୦ ମିଟର ଉଚ୍ଚ ଅଞ୍ଚଳରେ ରହନ୍ତି । କ୍ୟାମେରା ଟ୍ରାପିଂ ପଦ୍ଧତି ଅବଲମ୍ବନ କରି ଆସିର ପର୍ବତମାଳାରେ ଆରବୀୟ ଗ୍ୟାଜେଲ୍ ହରିଣର ସନ୍ଧାନ ମଧ୍ୟ ମିଳିପାରିଛି ।^[9] ଆସିର ପର୍ବତମାଳାରେ ଆସିର ଜାତୀୟ ଉଦ୍ୟାନ ମଧ୍ୟ ଅବସ୍ଥିତ । ଏହି ଜାତୀୟ ଉଦ୍ୟାନ ୪୫୦୦ ବର୍ଗ କିଲୋମିଟର କ୍ଷେତ୍ରରେ ବ୍ୟାପ୍ତ । ଏହି ପର୍ବତମାଳାରେ ହାମାଦ୍ର୍ୟାସ୍ ବବୁନ୍ ଓ ଚିଲ, ବାଜ, ଛଞ୍ଚାଣଙ୍କ ପରି ବିଭିନ୍ନ ପ୍ରଜାତିର ଶିକାରୀ ପକ୍ଷୀ ଦେଖିବାକୁ ମିଳନ୍ତି ।^[10]

ଚିତ୍ର ଗ୍ୟାଲେରି

• 
  ଅଭା ନିକଟସ୍ଥ ପର୍ବତମାଳା
• 
  ଅଲ୍-ହବାଲାଃର ଦୃଶ୍ୟ
• 
  ଅଲ୍-ସୌଦାଃ
• 
  ବାରେକ୍‍ର ହୱାଲାରୁ ଜବାଲ ଅଥେର୍ବର ଦୃଶ୍ୟ

ଆହୁରି ଦେଖନ୍ତୁ

• ସାଉଦି ଆରବ
• ୟେମେନ
• ସରୱାତ ପର୍ବତମାଳା
• ଆରବୀୟ କଲରାପତ୍ରିଆ ବାଘ

ଆଧାର

1. "Library of Congress Country Study: Saudi Arabia", The Library of Congress, archived from the original on 2008-09-23
2. "Southwestern Arabian montane woodlands". Terrestrial Ecoregions. World Wildlife Fund.
3. Overstreet, William Courtney (1977). Tertiary laterite of the As Sarat Mountains, Asir Province, Kingdom of Saudi Arabia. Vol. 2. Directorate General of Mineral Resources. pp. iii–2.
4. Nasr, Seyyed Hossein (2013). "1: The Holiest Cities of Islam". Mecca the Blessed, Medina the Radiant: The Holiest Cities of Islam. Tuttle Publishing. ISBN 978-1-4629-1365-7.
5. Judas, J.; Paillat, P.; Khoja, A.; Boug, A. (2006). "Status of the Arabian leopard in Saudi Arabia" (PDF). Cat News. Special Issue 1: 11–19.
6. Spalton, J. A. & Al-Hikmani, H. M. (2006). "The Leopard in the Arabian Peninsula – Distribution and Subspecies Status" (PDF). Cat News (Special Issue 1): 4–8.
7. Boulos, L. (1985), "Myxomycetes from the Asir Mountains, Saudi Arabia (abstract)", A contribution of the flora of the Asir Mountains, Saudi Arabia, vol. 3, Arab Gulf Journal of Scientific Research, pp. 67–94, archived from the original on February 29, 2012
8. "ଆର୍କାଇଭ୍ କପି". Archived from the original on 2020-11-27. Retrieved 2020-11-19. {{cite web}}: Cite has empty unknown parameter: |1= (help)
9. https://www.tandfonline.com/doi/pdf/10.1080/09397140.2012.10648957
10. https://www.lonelyplanet.com/saudi-arabia/asir-national-park-1342761

ଆହୁରି ପଢ଼ିପାରିବେ

• A Journey Through the Tihama, the 'Asir, and the Hijaz Mountains, by Wilfred Thesiger