From Wikipedia, the free encyclopedia
Lo movement dels agricultors de 2024 es una seguida de manifestacions e de barratges rotièrs organizats mai que mai pels sindicats agricòlas (d'en primièr per la FNSEA, los Joves agricultors e la Coordinacion rurala, mai tardivament seguits per la Confederacion paisana)[1][2] qu'a sustot pres de vam a partir del 18 de genièr de 2024.[3]
.jpg)
.jpg)
Los agricultors protèstan contra la feblesa dels prèses dels aliments, contra las reduccions prepausadas de las subvencions governamentalas al carburant diesèl destinat als agricultors (lo GNR) e contra un projècte d'acòrdi de liure-escambi entre l'Union Europèa e lo Mercosur.
Lo movement, que fasiá resson a çò que se passava en Alemanha,[4] comencèt en Occitània[5] d'en primièr per una manifestacion a Tolosa lo 16 de genièr de 2024,[6] manifestacion qu'a pas agut l'efièch escomptat. Los agricultors d'Occitània decidisson alavetz de blocar l'autorota A 64 al nivel de Tarba e de Carbona[7] a l'iniciativa de l'elevaire occitan del Volvèstre, Jiròni Baile,[8][9] lo 18 de genièr de 2024.
Cal notar qu'en amont, lo movement dels agricultors d'Occitània aviá en realitat ja començat tre octobre de 2023 per una accion simbolica de virament dels panèls de senhalizacion,[10][11] e en novembre per d'accions virulentas dels viticultors[12] (en particular lo Comitat d'Accion Viticòla) en Lengadòc e ja per d'accions de blocatge de Tolosa pels elevaires e cerealièrs.[13]
Las rotas màgers d'Occitània son aital estadas blocadas[14][15][16][17][18] a partir del 18 e 19 de genièr de 2024,[19][20] puèi en seguida del blocatge de l'autorota d'Agen per la Coordinacion rurala (Karine Duc e José Pérez) lo 22 de genièr de 2024,[21] aquela mena d'accion s'espandís alavetz aval la França entièra los 23 e 24 de genièr de 2024.
Lo 23 de genièr, un accident dramatic sus un barratge a Pàmias (Lengadòc) provòca la mòrt d'una agricultritz e de sa filha, percutidas per una auto.[22][23]
Lo movement a damatjat bastiments publics[24]; en Lengadòc, qualquas degradacions son atribuïdas mai especificament al Comitat d'Accion Viticòla (CRAV) a Carcassona[25] e a Narbona.[26]
En responsa a las protèstas, lo primièr ministre Gabriel Attal anèt en Occitània lo 26 de genièr,[27] i rencontrèt Jiròni Baile, e a promés de renonciar a la reduccion de las subvencions publicas al carburant diesèl agricòla (GNR); s'es tanben engatjat a prene d'autras mesuras qu'an per mira de reduire lo pes financièr e burocratic dels agricultors. Se lo barratge tengut a Carbona e qualques autres son estats tirats en Occitània en seguida d'aquelas promessas,[28] una bona partida del movement dels agricultors a pasmens contunhat, e s'es quitament amplificat endacòm mai.[29]
D'occitan qu'èra a la debuta, lo movement ven alavetz un movement francés: aqueste còp, los agricultors franceses reclaman de melhoras condicions de trabalh, los del Maine decidisson alavetz de blocar París a partir del diluns 29 de genièr, en barrant las rotas principalas de la capitala de França,[30] mentre que los de Franca Comtat qu'ensajan de blocar lo grand mercat de París a Rungis.[31][32]
Lo 1èr de febrièr de 2024, lo primièr ministre Gabriel Attal fa de novèlas anóncias. Entre autres, promet 150 milions d'euros d'ajudas pels agricultors. Los Joves agricultors e la FNSEA demandan alavetz a lors militants que tirèn los barratges.[33][34]
Lo 3 de junh, los sindicats païsans franceses (Los Ultras A64 de Jiròni Baile e la Coordinacion rurala) e la plataforma catalana Revolta Pagesa ambe d'autres sindicats païsans espanhòls an blocat la frontièra entre França e Espanha.
A partir del 18 d'octobre,[35] ambe l'eslogan pas de pays sans paysans (pas de país sens paisans), lo movement dels agricultors torna, ambe aqueste còp una accion de desbolonatge del panèls de las dintradas de las vilas e dels vilatges,[36] panèls depausats en seguida al pès dels bastiments publics,[37] o ambe l'ocultacion per de tendas[38] dels radars rotièrs.[39]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
