From Wikipedia, the free encyclopedia
Lo carri M48 Patton es un carri mejan estatsunidenc desvolopat après la Segonda Guèrra Mondiala per remplaçar lo M47. Intrèt en servici dins l'armada estatsundenca en 1953 e foguèt exportat vèrs uneis aliats de Washington. Sièis versions principalas foguèron desvolopadas (M48, M48A1 fins a M48A5) ais Estats Units e d'autrei dins certanei país utilizaires. Demorèt en servici dins l'armada estatsunidenca fins a la fin de la Guèrra Freja e es totjorn utilizat au sègle XXI per certaneis armadas coma Colómbia, Grècia o Liban.
Participèt a unei conflictes majors durant la Guèrra Freja. Pendent la Guèrra de Vietnam, foguèt utilizat per sostenir l'infantariá e per durbir de passatges dins lei camps de minas. Durant la Segonda Guèrra Indopaquistanesa, lei M48 paquistanés obtenguèron unei victòrias còntra lei M4, Centurion e AMX 13 indians. Pasmens, lei combats mostrèron tanben la vulnerabilitat dau blindatge, compres còntra lo canon de 75 mm dau carri leugier AMX 13. Durant la Guèrra dei Sièis Jorns, lo M48 foguèt utilizat per Israèl e Jordania ambé de resultats diferents en causa de la supremàcia aeriana israeliana. Lei carris israelians, fòrça modernizats, capitèron de destrurre lei SU-100 e T-34 egipcians ambé de pèrdas limitadas. En revènge, lei carris jordinians foguèron victimas de M4 modernizat amb un canon de 105 mm e la màger part foguèt abandonada.