Mètre

Lo mètre (simbòl : m) es l'unitat de basa de longor dau Sistèma Internacionau. Se definís coma la distància percorreguda per la lutz dins lo vuege en un interval de temps de 1/299 792 458 s. Son nom vèn dau grèc μέτρον metron, «mesura». Es una unitat fòrça utilizada dins la vida vidanta per mesurar de distàncias pichonas. Per de longors pus importantas, lo quilomètre es preferit.

Istòria

Lei premierei definicions

La barra de platin-iridi utilizada per escandau dau mètre de 1889 a 1960

Lo mètre foguèt definit inicialament en 1791 per l'Acadèmia dei Sciéncias coma la dètz milionena partida dau quart dau meridian terrèstre (ansin, la circonferéncia de la Tèrra es de 40 000 km). Foguèt adoptat per França lo 7 d'abriu de 1795 per mesura de longor oficiala. Quauqueis annadas puei, en 1799, un mètre escandau de platin foguèt creat a partir d'aquela definicion e venguèt la referéncia.

En junh de 1792, Jean-Baptiste Joseph Delambre foguèt encargat de mesurar la distància de Dunquèrca a Rodés mentre que Pierre Méchain mesurava la distància de Rodés a Barcelona. Aquò permetriá d'establir precisament la valor dau mètre. En 1793, sus la còla de Montjuïc, Méchain s'avisèt d'una diferéncia de 3" entre la mesura geodesica e la mesura astronomica de la longitud de Barcelona. Aquel escart (qu'en fach s'apreniá pas a una error de manipulacion, mai ai tecnicas de l'epòca) lo desvarièt mai que mai. La Guèrra Francoespanhòla l'empachèt de reprendre sa mission ; en 1799, ne rendèt còmpte en fraudant sei resultats : lo mètre serà tròp cort de 0,2 mm ; la « frauda » serà descubèrta per Delambre ren qu'en 1806, l'an que resseguirà l'ensemble dei resultats au moment de la redaccion de Basa dau sistèma metric.

En 1889, lo Burèu Internacionau dei Pes e Mesuras tornèt definir lo mètre coma la distància entre dos ponchs sus una barra d'un aliatge de platin e d'iridi. Aquela barra se consèrva encara a Sèvres, en França.

L'adopcion de la definicion modèrna

En 1960, gràcias a l'arribada dei lasèrs, l'11^ena Conferéncia Generala dei Pes e Mesuras (CGPM) definís lo mètre coma 1 650 765,73 longors d'onda d'una radiacion aranjada emessa per l'isotòp 86 dau cripton.

Enfin la conferéncia de 1983 se fonda sus la lutz e tòrna definir lo mètre coma la distància percorreguda per la lutz dins lo vuege en 1/299 792 458 s. Estent que la velocitat de la lutz dins lo vuege es una constanta fondamentala de la fisica (segon la teoria de la relativitat), es una definicion universala e qu'es de bòn transmetre. Subretot, es una distància que se mesura pus aisadament que la distància entre dos ponchs, car la segonda es l'unitat mielhs coneguda de l'SI.

Multiples e sotamultiples dau mètre

10 N	Nom prefixat	Simbòl	Nombre en occitan	Nombre en chifras
1024	yottamètre	Ym	quadrilion	1 000 000 000 000 000 000 000 000
1021	zettamètre	Zm	triliard	1 000 000 000 000 000 000 000
1018	examètre	Em	trilion	1 000 000 000 000 000 000
1015	petamètre	Pm	biliard	1 000 000 000 000 000
1012	teramètre	Tm	bilion	1 000 000 000 000
109	gigamètre	Gm	miliard	1 000 000 000
106	megamètre	Mm	milion	1 000 000
103	quilomètre	km	mila	1000
102	ectomètre	hm	cent	100
101	decamètre	dam	dètz	10
100	mètre	m	un	1
10-1	decimètre	dm	desen	0,1
10-2	centimètre	cm	centen	0,01
10-3	millimètre	mm	milen	0,001
10-6	micromètre	μm	milionen	0,000 001
10-9	nanomètre	nm	miliarden	0,000 000 001
10-12	picomètre	pm	bilionen	0,000 000 000 001
10-15	femtomètre	fm	biliarden	0,000 000 000 000 001
10-18	attomètre	am	trilionen	0,000 000 000 000 000 001
10-21	zeptomètre	zm	triliarden	0,000 000 000 000 000 000 001
10-24	yoctomètre	ym	quadrilionen	0,000 000 000 000 000 000 000 001

Relacions e conversions amb d'autreis unitats

Relacions amb leis autreis unitats de longor

Lo mètre es egau a :

• 5,399568.10⁻⁴ mila marina.
• 6,21504.10⁻⁴ mila terrèstra.
• 1,05697.10⁻¹⁶ annada lutz.
• 39,37 poces.
• 3,281 pès.

Relacions amb d'autreis unitats de mesura

Existís una relacion entre lo mètre e leis unitats de superficia (m²) e de volum (m³) :

• lo mètre carrat (m²) es la superficia d'un carrat que sei caires son d'una longor egala a un mètre.
• lo mètre cube (m²) es lo volum d'un cube que sei caires son d'una longor egala a un mètre.