Bufo periglenes

Lo grapaud daurat o grapaud de Monteverde (Bufo periglenes) es un pichon grapaud (d'environ 5 centimètres) de la familha dels bufonids que viviá dins una punhada d'endreches del bòsc de Monteverde, al Còsta Rica, en America Centrala^[1]. Es classificada per l'IUCN coma espècia atuda dempuèi 2001. Pas un sol especimèn de grapaud daurat es pas estat apercebut dempuèi 1989. Aquela espècia, que foguèt descobèrta en 1960, èra confinada a una pichona region de nauta altitud del bòsc de nívols de Monteverde, dins un airal de 10 km². L'escantiment del grapaud daurat es citat coma partida del declin de las populacions d'anfibians, e es vengut l'emblèma d'aqueste declin. Lo cambiament climatic degut al rechalfament global es una de las causas avançadas per explicar sa desaparicion^[2],[3].

Incilius periglenes

Classificacion segon ASW

Règne	Animalia
Embrancament	Chordata
Sosembr.	Vertebrata
Classa	Amphibia
Sosclassa	Lissamphibia
Superòrdre	Salientia
Òrdre	Anura
Sosòrdre	Neobatrachia
Familha	Bufonidae
Genre	Incilius

Nom binominal

Incilius periglenes
(Savage, 1967)

Sinonims

• Bufo periglenes Savage, 1967

Estatut de conservacion UICN

EX  : Atudat

Estatut CITES

Annèxe I , Rev. del 16/02/1995

Biologia

Lo grapaud daurat es una espècia del genre Bufo (familha Bufonidae) que compren mai de 250 espècias. Viviá dins la resèrva del bòsc dels Nívols de Monteverde, al Còsta Rica, dins un airal de 10 km² a 1500 m d'altitud mejana^[4].

Morfologia

Los adultes mascles mesuran a pena 5 cm en longor. De color jaune iranjat fosforescent^[5], se distinguián de la màger part dels grapauds per lor pèl brilhanta e lusenta. Son descobreire, Jay Savage, èra tant surprés quand los vegèt pel primièr còp, que ne'n cresiá pas sos uèlhs ; es citat disent : « me cal confessar que ma reaccion quand los ai vistes pel primièr còp èra una mescla d'incredulitat e de dobte, coma se qualqu'un los aviá trempats dins de pintura esmaltada »^[6]. La femèla de l'espècia èra leugièrament mai granda que lo mascle, e son aspècte èra pro diferent. Al luòc d'èsser brilhantas, las femèlas èran de color verd oliva o negras amb de tacas escarlatas enrodadas de jaune.