Antiparticula

Una antiparticula es un tipe de particula elementària dau modèl estandard. A la meteissa massa e lo meteis espin que sa particula correspondanta mai sei nombres quantics son opausats.

Esquèma mostrant lei proprietats de l'electron, dau proton, dau neutron e de seis antiparticulas respectivas.

Istòria

La premiera prediccion de l'existéncia deis antiparticulas foguèt l'òbra dau matematician e fisician britanic Paul Dirac (1902-1984) en 1928. D'efiech, durant un estudi de l'electron, descurbiguèt l'existéncia d'una particula, encara teorica, de massa identica mai de carga electrica opausada^[1]. Pasmens, aquela antiparticula, dicha « positron », foguèt identificada tre 1933 per lo fisician estatsunidenc Carl David Anderson (1905-1991)^[2]. Puei, foguèt descubèrt lo fenomèn d'anihilacion entre una particula e son antiparticula.

Durant lo rèsta dau sègle XX, lei progrès tecnologics en matèria d'accelerator de particulas permetèron de descubrir l'antiproton, l'antineutron e divèrseis antiparticulas dau modèl estandard. En 1995, foguèt sintetizat lo premier atòm d'antiidrogèn. Pasmens, l'isolament de l'antimatèria e deis antiparticulas demòra una causa malaisada amb lei tecnicas e lei sabers actuaus.