From Wikipedia, the free encyclopedia
Lo ròck gotic es un sosgenre del ròck nascut en Anglatèrra a la tota fin de las annadas 1970 pauc après lo punk : atal, retrospectivament son considerats emblematics de l'estili grops precursors diches pòst punk o de còps cold wave (l'èrsa freda) coma Siouxsie and the Banshees, Joy Division, Killing Joke o encara The Cure. Al sens larg del tèrme, lo ròck gotic es donc afiliat a la new wave, vist qu'aqueles grops pòst-punk fasián part per definicion de l'èrsa novèla, la dels grops novèls venguts de la scèna ròck britanica e anglesa en particular, los qu'an començat, sens ne renegar l'influéncia culturala, a prene lors distàncias ambe lo mitan punk, e d'un punt de vista musical estricte, a integrar l'usatge de sintetizors dins lor musica.
Pasmens, malgrat que se'n referisca a n'aqueles grops pòst-punk lèu aparentats a la new wave, lo tèrme ròck gotic comencèt solament a èsser emplegat per definir coma tals grops angleses de la debuta de las annadas 1980 coma Bauhaus, The Sisters of Mercy, The Cult o Fields of the Nephilim.
Quitament anecdotica, l'influéncia de David Bowie es tanben perceptibla dins aquel genre musical, en tot cas, es citat coma referéncia musicala per Bauhaus, tanben per Siouxsie Sioux, la cantaira de Siouxsie and the Banshees, o encara per Robert Smith, lo cantaire de The Cure. Atal, sa cançon de 1980, Ashes to ashes, d'estetica nòu-romantica, se sarra fòrça d'autres tròcis contemporanèus etiquetats cold wave, çò que'n fa un títol d'esperit ròck gotic, quitament se, vist que canta dempuèi la fin de las annadas 1960, David Bowie es pas aparentat de la familha dels grops pòst-punk.
L'estetica del ròck gotic es dins la recèrca d'atmosfèras inquietantas (A forest de The Cure en 1980), funèstas, malenconiosas (Love Like Blood de Killing Joke en 1985), esotericas (Temple of Love de The Sisters of Mercy en 1983) quitament religiosas, e plan sovent epicas (Arabian Knights de Siouxsie and the Banshees en 1981).
La tematica del romantisme del sègle XIXen, de l'Èra Victoriana (Charlotte Sometimes de The Cure en 1981), es fòrça correnta, e es d'aquí justament que ven lo nom : l'estil arquitectural nòu-Renaissença caracteristic en Anglatèrra al sègle XIXen, es un derivat del nòu-gotic. De còps, l'esperit del sègle XIXen es emplegat dins sa version desvirada, en fasent d'empronts als romans fantastics, quitament macabras d'aqueste sègle : per exemple, la represa dels mites e legendas morbidas de vampirs, de demònis etc popularisats dins la literatura populara anglesa es causa correnta en çò de fòrça grops gotics coma per exemple Bauhaus o Christian Death.
Pertocant lo còdi vestimentari, lo punt comun entre totes los grops gotics es de portar de vestits escurs en simbiòsi ambe l'ambient sinistre de lor musica e la negror de lors tèxtes.
A l'ora d'ara, lo terme dark wave (l'èrsa sombra), escrich darkwave aus Estats Units, es de mai en mai emplegat al lòc de ròck gotic o cold wave per qualificar los grops actuals, coma per exemple Light Asylum o Lebanon Hanover.
Per contra, cal pas confondre lo ròck gotic ambe lo metal gotic qu'es un sosgenre del heavy metal.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
