En 1874, la comuna d' Ornolac prenguèt oficialament lo nom d' Ornolac-Ussat-les-Bains. Patrici Pojada a donat lo nom occitan d'Ornolac (meteis nom qu'en francés) e lo nom occitan d'Ussat (Pojada dona lo meteis nom qu'en francés). Mès s'es pas prononciat sul nom d' Ornolac-Ussat-les-Bains[5]. Es donc malaisit de donar lo nom occitan de la comuna, estant que Ussat es una comuna diferenta: Ornolac e los Banhs d'Ussat?
Ornolac. Ni Dauzat, ni los Féniés dison pas res d'Ornolac, çò qu'es un signe que lo nom correspond a res de conegut. L'idèa ven qu'una deformacion empacha los toponimistas d'i trobar un sens e una etimologia. Pòt pas èsser una assimilacion vocalica, perqué l'occitan coneis mai que mai de dissimilacions (coma Ornalac sus la mapa de Cassini [6]). Mès pòt èsser una dissimilacion consonantica, coma *OrNoNac > Ornolac. La dificultat es que caldriá un doble sufixe, o puslèu dos sufixes successius, al latin ornus, «fraisse», o al nom de persona latin Orinus, d'abòrd -onem (cf. Ornon[7], Vilanava d'Ornon), puèi -acum, , latinizacion del sufixe gallés -āco(n). O cal prene coma una ipotèsi azardosa, en l'abséncia de fòrmas ancianas (lo siti histariège ne dona pas).
Ussat (dins la comuna se tracta de Ussat-les-Bains e non pas d'Ussat, qu'es una autra comuna) es interpretat per Dauzat coma lo resultat del nom d'òme latin Ulcius o Uccius, ambe lo sufixe -acum[8], latinizacion del sufixe gallés -āco(n). Ussat èra donc benlèu una anciana granda propietat antica qu'aviá per mèstre Ulcius o Uccius. Per Ussac, un cas un pauc semblable, los Féniés aiman mai Ursius, derivat d' Ursus, ambe'l meteis sufixe [9]. Ulcius o Uccius aurián forçat d'escriure *Uçat, mès lo dobte fa causir la grafia pus simpla. Cal explicar tanben la finala -at, per -ac esperat. En realitat, i a pas de certitud sul sufixe d'origina. L'autre Ussat es atestat Ussaco, en 1272 [10], mès aquò fa una sola atestacion.
Entre 1790 e 1794, Lugeat (nom francés) foguèt annexat a Ornolac [11].
Abans la refòrma cantonala de 2014, aplicada en 2015, la comuna èra del canton de Tarascon d'Arièja; es ara del canton de Haute-Ariège (en francés), donc de Nauta Arièja.