Organizacion militara
From Wikipedia, the free encyclopedia
L’organizacion militara descriu lei principis d'organizacion dei fòrças armadas d'un Estat o d'una entitat similara (rebellion, territòri independentista...). Dèvon integrar de dimensions variadas destinadas a assegurar la disciplina militara (mesa en plaça de rengs militars), a crear d'unitats administrativas permetent de gerir lei ressorsas umanas e materialas (basas militaras, regiments...) e a crear lei condicions permetent lo mantenement dei foncions necessàrias a una accion militara (comandament, ensenhament, combat, logistica, formacion, medecina...).
Es una question anciana qu'es probablament apareguda amb lei premiereis armadas organizadas durant l'Antiquitat. Per exemple, l'Estendard d'Ur, una gravadura dau milleni III avC, mòstra d'unitats diferenciadas e especializadas dins d'aspèctes donats dau combat (arquiers, carris...). Lei modèls utilizats conoguèron fòrça evolucions e foguèron lòngtemps especifics a una cultura o una civilizacion donada. Lo sistèma modèrne, basat sus la division o la bregada per lei fòrças terrstres e l'esquadra per la marina o l'aviacion, es eissit dei reflexions francesas menadas après la Guèrra de Sèt Ans (1756-1763) sus l'interès de combinar diferents tipes d'armas au sen d'una meteissa unitat. Adaptat amb succès per leis armadas revolucionàrias, se difusèt lentament dins lo rèsta dau mond amb la colonizacion e lei doas guèrras mondialas.