Miguel de Cervantes Saavedra (Alcalá de Henares, 29 de setembre de 1547 - Madrid, 22 d'abril de 1616) foguèt un dels principals escrivans d'Espanha e de la literatura occidentala. Es tanben considerat coma
l'autor mai important en lenga espanhòla de totes los temps. Son roman pus conegut es Don Quichòte, publicat pel primièr còp en 1605 e qu'es actualament una de las òbras mai vendudas mondialament just aprèp la Bíblia.
Profession: | escrivan |
---|---|
País: | Espanha |
Data de naissença: | 29 de setembre de 1547 |
Luòc de naissença: | Alcalá de Henares, Espanha |
Data de decès: | 22 d'abril de 1616 |
Luòc de decès: | Madrid, Espanha |
Escriguèt tanben los Romans exemplars (Novelas Ejemplares), que lor tòca èra de mostrar la morala d'aquela epòca e d'autres romans coma La Gitanilla, El amante liberal, Rinconete y Cortadillo, La española inglesa, El licenciado Vidriera, La fuerza de la sangre, El celoso extremeño, La ilustre fregona, Las dos doncellas, La señora Cornelia, El casamiento engañoso e El coloquio de los perros. Aviá un gost grand pel teatre e la poesia.
Lo 21 de març de 1991 lo govèrn espanhòl creèt una institucion batejada en onor de l'autor Instituto Cervantes qu'a per tòca de far la promocion de la lenga espanhòla e de las culturas espanhòla e latinoamericana dins lo mond entièr. Demest los darrièrs omenatges a aqueste escrivan, una tièra de monedas espanhòlas de fraccions d'èuro (10, 20 e 50 cts.) foguèt facha amb son efigia.
La data e lo luòc de naissença de Cervantes foguèron l'objècte de mantas controvérsias, pasmens actualament se pensa que nasquèt a Alcalá de Henares que lai foguèt batejat e per çò qu'es de la data, se pensa que foguèt lo 29 de setembre, jorn de l'arcàngel Miquèl que la tradicion del país fasiá donar als nenons lo nom del sant del jorn que naissián.
Èra lo filh de Rodrigo de Cervantes, un cirurgian d'origina cordobesa, e de Leonor de Cortinas Sánchez. D'unes cercaires, coma Américo Castro e Daniel Eisenberg, pensan que sos dos parents èran d'origina jusieva mentre que d'autres estudioses s'opausan a aquestas ipotèsis.
Sa carrièra escolara es pas gaire coneguda e se crei qu'estudièt a Valladolid, Còrdoa o Sevilha. En 1566 s'installèt a Madrid ont assistiguèt a l'Estudio de la Villa qu'èra tengut per Juan López de Clòts, un intellectual influenciat per Erasme. D'aquela epòca, Cervantes se passionèt pel teatre al travèrs de las representacions de Lope de Rueda.
Qualques ans mai tard, en 1569, aguèt de s'escapar en Itàlia a causa d'un duèl contra Antonio Sigura. Coma o declara dins una de sos Romans exemplars, lo licenciat Vidriera, aiçò li porgiguèt una passion particulara per la literatura italiana. Ailà, dins la seguida del cardenal Acquaviva, legiguèt los poèmas de cavalariá de Ludovico Ariosto e los Dialògs d'amor del sefardita León Hebreo, d'inspiracion neoplatoniciana, qu'influencièron la siá idèa d'amor.
Participèt, malgrat que patiguèsse de fèbre, a la batalha de Lepant lo 7 d'octobre de 1571 dins l'armada de Joan d'Àustria, ont i foguèt nafrat per un bocin de plomb que li seccionèt un nèrvi del braç, çò que li faguèt pèrdre la mobilitat de la man esquèrra, rason per la quala lo coneguèron amb l'escais-nom del manpòt de Lepant.
S'anèt puèi repausar en Sicília. En 1575, pendent son retorn de Nàpols en Castelha, foguèt capturat amb son fraire per de corsaris d'Argièr, que fasiá partida de l'Empèri Otoman. Demorèt captiu pendent cinq ans. Foguèt liberat finalament en 1580, aprèp mai d'unas temptativas de fugida e lo pagament d'un rescat.
L'experiéncia de la captivitat inspira d'abondoses tròces de son òbra, coma l'istòria del captiu dins la primièra part del Don Quichòte, o dins lo drama Los Banhs d'Argièr.
Se moriguèt lo 22 d'abril de 1616, qualquas ores solament abans lo sieu e màger condisciple anglés, en William Shakespeare.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.