Guèrra d'Argeria
From Wikipedia, the free encyclopedia
La guèrra d’Argeria o Revolucion argeriana (mas tanben guèrra d'independéncia argeriana o guèra de liberaciion nacionala)[1] es un conflicte armat que se debanèt de 1954 a 1962 en Argeria, colonia francesa dempuèi 1830 e divisida en departaments dempuèi 1848, e que la fin es la reconneissença de l'independéncia del territòri lo 3 julhet de 1962[2].
Coma guèrra d'independéncia e de decolonizacion, opausa de nacionalistas argerians, subretot amssat jos la bandièra del Front de Liberacion Nacionala (FLN), a la França. Es a l'encòp un doble conflicte militar e diplomatic e tanben una dobla guèrra civila, entre las comunautats d'una partida e a l'interior de las comunautats d'autra partida[3]. Se debana subretot sul territòri de l'Argeria francesa, amb tanben de ressons en França metropolitana.
Provòca de grevas crisis politicas en França, amb per consequéncias lo retorn al poder de Charles de Gaulle e la casuda de la Quatriena Republica, remplaçada per la Cinquena Republica. Après aver donat de temps a l'armada francesa per lutar contra l'ALN en utilisant totes los mejans a sa disposicion, De Gaulle opta fin finala per l'autodeterminacion coma sola eissida possibla al conflicte, çò que mena una fraccion de l'armada francesa a se rebellar e dintrar en oposicion obèrta amb lo poder, rapidament matada. La guèrra d'Argeria presenta un bilanç pesuc e los metòdes emplegats pendent la guèrra per l'armada francesa (tortura, repression de la populacion civila argeriana) foguèron controversiadas. Lo conflicte desbocar, après los accòrdis d'Evian del 18 de març de 1962, sus l'independéncia de l'Argeria lo 3 de julhet seguent, e precipita l'exòde dels abitants d'origina europèa, dich Pés Negres e dels Josieus, coma lo chapla de desenas de millièrs de harkis.