Florent Pagny
From Wikipedia, the free encyclopedia
Florent Pagny es un actor sustot conegut coma cantaire popular francés. Canta mai que mai en francés, mas tanben en italian (Caruso), en espanhòu, e quitament un petit pauc en anglés (Oh Happy Day). Nascut lo 6 de novembre de 1961 a Chalon de Sòna en Borgonha (França), passa son enfància en Borgonha fins a sos onze ans, puèi sa familha muda en 1972, passa per Divonne-les-Bains, puèi s'installa a Bonneville, en Savòia.[1]
A començat a partir de 1980 de far actor coma mestièr amb qualques ròtles pichons còsta Coluche (Inspecteur la Bavure, 1980), Jean-Paul Belmondo (L'As des as, 1982) o Gérard Depardieu (Fort Saganne, 1984), pr'aquò se fa vertadièrament conéisser dins la cançon en 1988 amb lo títol N'importe quoi, single que foguèt n°1 de las vendas de disques en França, succès que serà seguit per un fum d'autres coma Si tu veux m'essayer, Bienvenue chez moi, Caruso (represa d'una cançon en italian de Lucio Dalla), Savoir aimer (n°1 tanben, en 1997), Chanter, Et un jour une femme, Ma liberté de penser (n°1 un còp de mai, en 2003), o encara Là où je t'emmènerai. En tot, a vendut mai de 15 milions de disques.
Es tanben una personalitat de la televison francesa, fa partida de la jurada de The Voice : La plus belle voix en França de 2012 a 2018, e tanben de 2021 a 2022.
En 1988, se botèt en coble amb Vanessa Paradis, ela tanben cantaira francesa plan populara a n'aquel moment (Joe le Taxi). Mas la diferéncia d'edat (11 ans) e lo fach que siá encara menora (a pas que 15 ans en 1988) farà escandal dins los mèdias : sa cançon Presse qui roule, sortida en single fin 1990, serà sa responsa a n'aquelas atacas rapòrt a sa relacion amorosa. Se separan fin finala en 1991.