sosgenre musical de la house e trance From Wikipedia, the free encyclopedia
La dream ("sòmi") es una musica electronica, mai precisament un sosgenre de la house qu'es aparegut dins las annadas 1990 en Euròpa. Estili marginal de la tècno post-house de la primièra mitat de las annadas 1990, la dream es vengut una mòda efemèra de l'annada 1996. La capitada d'aquel estili prefigura la de la trance a la fin de las annadas 1990. Sa particularitat es son aspècte melodic a basa de sintetizor (quitament de còps un son de piano), ambe de capas planantes e plan solide una ritmica tècno. Aital, pauc de cant, la dream es avara de partidas vocalas, de còps, los tròces de dream son d'instrumentals sonque.
Lo costat fòrça melodic de la dream trenca francament ambe la house originala (la de 1987-1990) qu'èra un estili musical per natura descosut e escalabrós vist que resultant d'escapolons e de pegatges mai o mens uroses emprontats plan sovent al disco (Black Box, Yazz, S-Express), e ambe tanben son derivat dirècte, la tècno dance (1991-1996), sosgenre el clarament identificable pel dialòg votz femenina soul versus rap masculin (2 Unlimited, Snap!, Masterboy, Maxx, Culture Beat), e que, al contrari de la dream o la trance, s'apiejava mai sus l'aspècte escalabrós quitament tribal de la ritmica que sus la melodia.
Un tròç emblematic qu'a contribuït a popularizar lo genre foguèt lo tèma "Children" de l'italian Robert Miles, n°1 dins mantuns países europèus (quitament en França) en 1996. L'album de Robert Miles dins lo qual figura aquel títol coma son autre tube "Fable" s'apèla "Dreamland" (país de sòmi) : es benlèu lo títol d'aquel album qu'a contribuït a balhar lo nom a l'estili.
Demest las autras gròssas capitadas de la dream en 1996, se pòt tanben citar "Celebrate (The Love)" del grop alemand Zhi-Vago, l'adobament dream del generic de X-Files pel discjòquei italian DJ Dado, "Lovin' you" del grop francés Sarah, "Moon's Waterfalls" de l'Italian Roland Brant, o encara "A Neverending Dream" del grop alemand X-Perience.
Quitament al succès efemèr (mai que mai en 1996), la dream a agut una influéncia màger sus la musica electronica ; per exemple, a ajudat a popularizar la trance, genre vengut alavetz màger en discotèca a la fin de las annadas 1990 (Antiloop, B.B.E.) e al debut de las annadas 2000 (Darude, Armin van Buuren, Paul van Dyk, Tiësto). Se parla d'alhors d'arenlà puslèu de dream trance tant i a proximitat entre los dos estilis, distints unicament per la ritmica, una ritmica lenta e plananta "convidant al sòmi" per la dream, contra una ritmica rapida e brusca "metent en estransi" per la trance. D'unes veson quitament dins la ritmica lenta de la dream una filiacion ambe la new beat, e estiman que Age of Love, grop italo-bèlga de new beat tardiva de la debuta de las annadas 1990, aviá ja las caracteristicas d'un grop dream, quitament ja trance per las versions adobadas acceleradas de sos tròces.
S'estima tanben que d'una faiçon generala, fòrça tubes d'eurodance melodics e ambe una ritmica relativament lenta coma per exemple lo famós "Blue (Da Ba Dee)" d'Eiffel 65 son derivats dirèctament de la dream. Se remarca d'alhors tanben que la capitada de la dream (1996) coïncidís coma per asard ambe l'abandon del concèpte frasejat rap masculin versus votz femenina soul qu'èra pr'aquò la nòrma de la tècno dance.
D'unes an tanben vist dins la dream una filiacion dirècta a la musica sintetica de las annadas 1970 de Jean-Michel Jarre : los tenents d'aquela ipotèsi coma qué la dream seriá simplament la musica de Jean-Michel Jarre actualizada, adaptada a las annadas 1990, estiman alavetz que "Chronologie" de Jean-Michel Jarre en 1993 se pòt istoricament considerar coma gaireben lo primièr album d'aqueste estili. D'autres encara citan volontièr lo tròç "Dreams" de Quench en 1994 coma lo primièr vertadièr tube dream de l'istòria (quitament lo primièr tròç emblematic de la trance), o un pauc mai d'ora, "Power of American Natives" de Dance 2 Trance en 1993.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.