Bombardament de Haiphong
From Wikipedia, the free encyclopedia
Lo bombardament de Haiphong se debanèt lo 23 de novembre de 1946 au començament de la Guèrra d'Indochina. Pòrt important dau nòrd de Vietnam, la vila èra un enjòc entre França, que voliá restaurar sa preséncia en Indochina, e lo Vietminh que voliá perseguir lo procès d'independéncia dau país. I aguèt donc de tensions entre lei dos camps a prepaus dau contraròtles dei doanas portuàrias e d'incidents entraïnèron quauqueis escaramochas. Pasmens, se lei camps èran a se preparar per una guèrra, lo viatge d'Ho Chi Minh en França durant l'estiu de 1946 aviá permés d'establir un dialòg.
Dins aquò, lo 20 de novembre, lei Francés decidèron d'intervenir après un incident novèu. Lo 23, mandèron un ultimatum a seis adversaris per ordonar l'abandon de sei posicions. Puei, tres avisos bombardèron la vila quand lei tropas terrèstras rescontrèron de ponchs de resisténcia dau Vietminh[1]. Lei Francés reconquistèron ansin lo pòrt mai l'amplor dei destruccions e lo nombre de victimas (entre 300 e 6 000 segon leis estimacions[2]) entraïnèron lo començament dei combats vertadiers de la Guèrra d'Indochina.