Alfabet
From Wikipedia, the free encyclopedia
Un alfabet (d’alfa/alpha e bèta/bêta, las doas primièras letras de l'alfabet grèc), de còps cridat ABC o ABCD[1] o (a)beçaròla[1], es un ensemble de simbòls utilizat per representar mai o mens precisament los fonèmas d'una lenga.
A | B | C | D | ||
E | F | G | H | I | J |
L | M | N | O | P | |
Q | R | S | T | U | |
V | X | Z |
Cadun d’aquestes simbòls es apelat una letra ; cada letra, en teoria, deuriá notar un fonèma.
Cèrtas letras pòdon recebre un o mantun signes diacritics (coma à, ï, ç), e tanben las letras se pòdon combinar en grops (per exemple un grop de doas letras coma nh es un digrama) o encara se pòt crear de letras suplementàrias (coma ð en islandés). Tota letra, letra amb diacritic e combinason de letras es un grafèma.
L'aumentacion dels grafèmas permet de compensar lo nombre de letras s'aquel es insufisent per notar los sons de la lenga o permetre d'evitar las ambigüitats.
Las evolucions foneticas d'una lenga se produson a un ritme diferent de l'evolucion escricha, l'escritura alfabetica garentís pas de cap de biais la correspondéncia un a un entre los fonèmas e los grafèmas : en occitan, /s/ se pòt notar ç, s o ss. A contrario, s se pòt prononciar /s/ o /z/. Cèrtas lengas, coma l'ongrés, lo turc o lo sèrbocroat, an ça que la una escritura quasi fonetica. Dins la majoritat dels cases, i a de lengas escrichas dempuèi pauc e la transcripcion pel mejan de signes alfabetics n'a fach l'objècte d'una recèrca planificada.