Abadiá de Sent Marçau de Limòtges
From Wikipedia, the free encyclopedia
L'abadiá de Sent Marçau es un ancian establiment religiós de la vila de Limòtges, en Lemosin, dins lo departament de Nauta Vinhana. Fuguet fondat en 848 e dissolgut en 1791. Naisset de la transformacion d'un chapítol de chanonges que velhavan la tomba de Sent Marçau de Limòtges en un establiment benedictin en 848 sos l'òrdre de Loís lo Piós.
A la mòrt de Sent Marçau, sens dobte vers lo començament dau segle IV, los prumiers crestians de Lemòtges lo sebeligueren dins la necropòli de la vila. Situada a l'exterior daus barris de la ciutat, s'era desvolopada de long de la Via Agrippa Lion-Santas. D'aquí endavant comencet a l'entorn de la tomba dau sent un culte rendut au començament per daus simples preires.