Olaf Kortner

Olaf Erling Kortner (10. mai 1920–26. januar 1998) var ein norsk politikar for Venstre. Han var kyrkje- og undervisningsminister i Lyng-regjeringa i 1963, formann i Unge Venstre 1948-1950, stortingsrepresentant 1965-1970 og nestformann i Venstre 1966-1970.

Olaf Kortner
Fødd	10. mai 1920 Skien kommune
Død	26. januar 1998 (77 år)
Statsborgar av	Noreg
Parti	Venstre
Yrke	politikar
Medlem	Unge Venstre
Verv	Leiar av Unge Venstre 1948-1950
Føregangar	Helge Rognlien
Etterfylgjar	Helge Røed
Alle verv	stortingsrepresentant (fast møtande vararepresentant, 1965–1969) Norsk kyrkje- og undervisningsminister (1963–1963) vararepresentant til Stortinget (1965–1969) vararepresentant til Stortinget (1969–1973) stortingsrepresentant (fast møtande vararepresentant, 1969–1970)

Olaf Kortner vart fødd i Skien. Han vart student i 1940 og fullførte ein cand. philol.-grad i 1948. I 1948 vart han vald til formann i Unge Venstre for ein toårsperiode, men fungerte berre i eitt år, då han frå 1949 til 1950 var i England som programsekretær for den norske avdelinga til BBC. I 1950 begynte han å arbeida som lektor i Strinda, og frå 1951 til 1955 sat han i kommunestyret der. I 1957 begynte han å arbeida på Berg skole i Oslo, der han var til 1970. Frå 1955 hadde han òg verv i Norsk lektorlag, frå 1962 til 1965 som formann.

I 1963 vart Kortner statsråd og sjef for Kyrkje- og undervisningsdepartementet (kyrkje- og undervisningsminister) i den kortliva Lyng-regjeringa frå 28. august til 25. september. I 1965 vart han 1. vararepresentant til Stortinget frå Oslo, noko han var i to periodar. Han møtte fast frå 1965 til 1970 medan Helge Seip var statsråd i Borten-regjeringa. Frå 1966 til 1970 var han òg nestformann i Noregs Venstrelag.

I 1971 vart Kortner fylkesskolesjef i Akershus noko han var fram til 1989, og så utdanningsdirektør i Akershus til 1990. Han hadde òg ei rekkje verv.

Kjelder

• «Olaf Kortner». Stortinget.no.