Daley Thompson

Francis Morgan Thompson, kjend som Daley Thompson, (fødd 30. juli 1958) er ein britisk tidlegare friidrettsutøvar frå London som tevla i mangekamp og i sprintøvingar. Han vann to OL-gull, eitt VM-gull, to EM-gull og sette fire verdsrekordar i tikamp i tida 1980 og 1984. Thompson sin personlege rekord på 8 893 poeng stod som verdsrekord i ni år.

Daley Thompson
Statsborgarskap	Storbritannia
Fødd	30. juli 1958 (66 år) London
Idrett	friidrett, fotball
Tok del i	athletics at the 1988 Summer Olympics – men's decathlon, Friidrett under Sommar-OL 1984, Friidrett under Sommar-OL 1980, Friidrett under Sommar-OL 1976
Utmerkingar	kommandør i den britiske imperieorden, BBC Sports Personality of the Year Award

Aktiv

Thompson slo seg inn i verdseliten 20 år gammal, då han i 1978-sesongen vann tikampen under samveldeleikane og vart nummer to i europameisterskapen. Best var han i samveldeleikane i Edmonton, der han oppnådde 8 467 poeng. Andreplassen i EM var siste gongen på ni år at han ikkje vann dei tikamptevlingane han stilte opp i.

I mai 1980 forbetra Thompson verdsrekorden til 8 622 poeng i Götzis, vesttyskarane Guido Kratschmer og Jürgen Hingsen kom dei på to neste plassane. Sidan Vest-Tyskland boikotta Moskva-OL sommaren 1980 slapp Thompson å møte dei to vesttyske tikjemparane og han vann ein klar OL-siger framfor to utøvarar frå arrangørlandet.

Thompson pynta sin eigen verdsrekord til 8 704 poeng under meistermøtet i Götzis i mai 1982. Hingsen, som vart nummer to i Götzis, forbetra så verdsrekorden til 8 723 poeng eit par manåder seinare. Dei to møttest til dyst under EM i friidrett 1982 i Aten, der Thompson viste seg som den klart beste og tok tilbake verdsrekorden med sine 8 743 poeng. På tampen av 1982 vann han tikamp under samveldeleikane i Brisbane.

Etter at Hingsen i juni 1983 hadde oppnådd 8 779 poeng og sett ny verdsrekord, var det mange som rekna med ei tett tevling mellom Thomspon og Hingsen i den fyrste verdsmeisterskapen i friidrett. Men atter viste Thompson seg som den sterkaste utøvaren og sikra gullmedaljen med 105 poeng til gode på vesttyskaren. Nøyaktig den same differansen var det mellom dei to då OL-tikampen vart avvikla i Los Angeles i 1984. På ny vann Thompson gullet, men no med verdsrekordsummen 8 798 poeng (omgjort til 8 847 poeng då 1985-tabellen kom).

I 1986 vann Thompson tikampen i samveldeleikane for tredje gong på rad, leikane fann stad i Edinburgh. Under europameisterskapen same året vann han enno ein gong framfor Jürgen Hingsen. Skadar sette Thompson tilbake, og han nådde sidan ikkje opp til nivået i 1980-86-perioden. Han la opp i 1992.

Medaljar og plasseringar i internasjonale meisterskap

• OL 1976 i Montreal: Nr 18 – 7 434 poeng
• EM 1978 i Praha: Sølvmedalje – 8 289 poeng, bakom Aleksandr Grebenjuk (8 340 p)
• OL 1980 i Moskva: Gullmedalje – 8 495 poeng, framom Jurij Kutsenko (8 331 p)
• EM 1982 i Aten: Gullmedalje – 8 743 poeng, framom Jürgen Hingsen (8 517 p)
• VM 1983 i Helsinki: Gullmedalje – 8 666 poeng, framom Jürgen Hingsen (8 561 p)
• OL 1984 i Los Angeles: Gullmedalje – 8 798 poeng, framom Jürgen Hingsen (8 693 p)
• EM 1986 i Stuttgart: Gullmedalje – 8 811 poeng, framom Jürgen Hingsen (8 730 p). Sølvmedalje på 4 x 100 m stafett
• VM 1987 i Roma: Nr 9 – 8 124 poeng
• OL 1988 i Seoul: Nr 4 – 8 306 poeng, bakom Dave Steen (8 328 p)

Kjelder

• Denne artikkelen bygger på «Daley Thompson» frå Wikipedia på tysk, den 10. september 2015.