Anton Raphael Mengs

Anton Raphael Mengs (12. mars 1728–29. juni 1779) var ein tysk målar og kunstteoretikar som var aktiv under nyklassisismen. Han var fødd i byen Aussig, dagens Ústí nad Labem, i det dåverande kurfyrstedømmet Sachsen. Mengs var mykje etterspurd som målar av religiøse og historiske motiv og som portrettmålar. Størstedelen av livet arbeidde han enten i Roma eller ved det spanske hoffet.

Anton Raphael Mengs
Statsborgarskap	Tyskland
Fødd	22. mars 1728, 12. mars 1728 Ústí nad Labem
Død	29. juni 1779 (51 år) Roma
Yrke	kunstmålar, kunsthistorikar
Sjanger	portrett
Far	Ismael Israel Mengs
Born	Anna Maria Mengs
Anton Raphael Mengs på Commons

Liv og gjerning

Persevs friar Andromeda, 1773-76

Mengs gjekk i lære hos faren, den dansk-saksiske miniatyrmålaren Ismael Mengs i Dresden. Åra 1741-44 var far og son i Roma, der dei studerte den antikke kunsten. Etter han vende heim til Dresden vart Mengs utnemnd til hoffmålar.

I 1749 vart han utnemnd til kurfyrst Fredrik August II sin førstemålar, men kom til å opphalde seg lengre tid i Roma enn i Dresden. Mengs høyrde til krinsen rundt Winckelmann og vann internasjonalt ry som målar.

Mengs konverterte i Roma til katolisismen, og Vatikanet utpeika han i 1754 til leiar for kunstnarskulen sin. Han heldt seg for det meste i pavebyen, trass i at han i to tilfelle lydde når Karl III av Spania kravde at han skulle kome til Madrid. I Madrid laga Mengs nokre av dei beste verka sine, til dømes Persevs friar Andromeda (1773-76). Då han så reiste tilbake til Roma i 1777, var han heilt ruinert og døydde i små kår i 1779.

Som kunstteoretikar var Mengs eklektikar, og ville kombinere antikk gresk stil med Rafaels uttrykk, Correggios chiaroscuro og Tizians fargeskala.

Kjelder

• Denne artikkelen bygger på «Anton Raphael Mengs» frå Wikipedia på engelsk, den 18. september 2012.

Bakgrunnsstoff

Wikimedia Commons har multimedia som gjeld: Anton Raphael Mengs