Шлямочи

Шля́мочи^[1], лиякс: субута^[1][2]— таргонь чись кона ашти сюконьчинть ды таргочинть юткова. Шлямочи валось тееви кавто валсто: "шлямо" ды "чи" валтнэнь эйстэ. Таргонь котоце читнестэ велесэ уштовить банят ды ломаньтне шлить-нардыть банясо тердить сэрдятненьгак шлямо. Секс те чинть лемезе Шлямочи.

Шлямочись кезэрень римляньтнень алтазель Сатурноньте. Рузкс шлямочинтень мерить суббота, конань юрозо саеви евреень «шаббат» валстонть, конась сравтововсь Вавилононь ковкерьксэнть ды хрестианстванть марто весэ Европавань.

Койтнень коряс, конат састь кезэрень иудаизмастонть, шлямочись — таргонь меельсе чись. Истямо ладямось кадовсь стандартокс Американь Вейтьсэндявкс Штаттнэсэ (АВШ) ды Израиль Масторсо, ансяк неень шкань Европассо шлямочинть ловови котоцекс (меельцень икеле молицякс) таргонь чис, таргочись — меельцекс. Неень шкань Эвропань арсемась сюлмазь-кемекстазь ISO 8601-со (1).

Лисьмапрят

1. Русско-эрзянский словарь / М-во образования и науки РФ, МГУ им. Н. П. Огарева ; [сост. : О. Г. Борисова и др. ; ред. М. В. Мосин] / О. Г. Борисова, М. Н. Живаева, Н. В. Казаева, А. М. Кочеваткин, М. В. Мосин, С. Г. Моторкина, Г. В. Рябова. – Саранск : Тип. «Крас. Окт.», 2012.– 624 с. ISBN 978-5-7493-1654-4(руз.),(эрз.)
2. Эрзянско-русский словарь: Ок. 27 000 слов / НИИ языка, литературы, истории и экономики при Правительстве Мордовской ССР; под ред. Серебренникова Б.А., Бузаковой Р.Н., Мосина М.В. — М.: Рус. яз., Дигора, 1993. 803 с. — ISBN 5-200-01585-5 (руз.), (эрз.)

Атяньчи | Вастаньчи | Куншкачи | Калоньчи | Сюконьчи | Шлямочи | Таргочи