Zerto
From Wikipedia, the free encyclopedia
Zerto, an geografie, ye ua region que recibe pouca chuba. Cumo cunsequéncia, ls zertos ténen la reputaçon de séren capazes de aguantar pouca bida. Cumparando-se cun regiones mais húmidas esto puode ser berdade, mas, eisaminando-se mais detalhadamente, ls zertos frequentemente abrígan ua riqueza de bida que normalmente quede scundida (specialmente durante l die) para cunserbar houmidade. Cerca de 20% de la superfice cuntinental de la Tierra son zérticos.
Las paisaiges zérticas ténen alguns eilemientos an quemun. L chano de l zerto ye percipalmente cumpuosto de arena, i dunas puoden star persentes. Paisaiges de tierra rochoso son típicas, i refleten l reduzido zambolbimiento de l suolo i la scasseç de begetaçon. Las tierras baixas puoden ser prainadas cubiertas cun sal. Ls porcessos de eroson eiólica (esto ye, probocados pul aire) son amportantes fatores na formaçon de paisaiges zérticas.
Ls zertos alguas bezes cunténen depósitos minerales baliosos que fúrun formados ne l ambiente árido ó que fúrun spostos pula eroson. Por séren lhocales secos, ls zertos son lhocales eideales para la preserbaçon de artefatos houmanos i fósseles. Sue begetaçon ye custituída por gramíneas i pequeinhos arbustos, ye rala i spaçada, acupando solo lhugares an que la pouca auga eisistente puode se acumular (fendas de l tierra ó ambaixo de las peinhas). Las maiores regiones zérticas de l globo quédan na África (zerto de l Saara) i na Ásia (zerto de Gobi).
La fauna predominante ne l zerto ye cumpuosta por animales roedores (ratos-cangurus), por rételes (queluobras i lhagartos), i por ansetos. Ls animales i plantas ténen marcantes adataçones a la falta de auga. Muitos animales sálen de las tocas solamente a la nuite, i outros puoden passar la bida anteira sin buber auga, straindo-la de l quemido que angíren.