From Wikipedia, the free encyclopedia
Pablo Diego José Francisco de Paula Juan Nepomuceno María de los Remedios Cipriano de la Santísima Trinidad Ruiz y Picasso, ó simplesmente Pablo Picasso (Málaga, 25 d'outubre de 1881 — Mougins, 8 d'abril de 1973), fui un pintor, scultor i zamhista spanhol.
Pablo Picasso | |
---|---|
![]() | |
Nome cumpleto | Pablo Diego José Francisco de Paula Juan Nepomuceno María de los Remedios Cipriano de la Santísima Trinidad Ruiz y Picasso |
Nacimiento | 25 de outubre de 1881 Málaga, Andaluzie ![]() |
Muorte | 8 de abril de 1973 (91 anhos) Mougins, Provence-Alpes-Cóte d'Azur ![]() |
Acupaçon | pintor i scultor |
Mobimiento stético | Cubismo |
Assinatura | |
![]() |
Fui recoincidamente un de ls mestres de la arte de l seclo XX. Ye cunsidrado un de ls artistas mais famosos i bersatles de to l mundo, tenendo criado miles de trabalhos, nun solamente pinturas, mas tamien sculturas i cerámica, ousando, anfin, todos ls tipos de materiales. El tamien ye coincido cumo sendo l co-fundador de l Cubismo, a la par cun Georges Braque.
Naciu an Málaga (Andaluzia) i recebiu l nome cumpleto de Pablo Diego José Francisco de Paula Juan Nepomuceno María de los Remedios Cipriano de la Santíssima Trinidad Ruiz Picasso, filho de María Picasso y López i José Ruiz Blasco..
Al redror de l sou nacimiento aparecírun bárias lhendas, alguas de las quales Picasso se sforçou a promober. Segundo ua deilhas, Picasso naciu muorto i la parteira dedicou la sue atençon a la mai acamada. Solo l médico, Don Salbador, l salbou dua muorte por asfixie soprando-le fumo dun xaruto na cara. L fumo fizo cun que Picasso ampeçasse a chorar. L sou nacimiento ne l die 25 d'outubre de 1881, a las onze i un quatro de la nuite, serie assi çcrito por Picasso als sous biógrafos, que la publicában de buona buntade[1].
Roland Penrose, un de ls mais coincidos biógrafos de Picasso, percurou nas sues ouriges la rezon de la sue genialidade i de la sue abertura a l'arte, algo natural na cumprenson dun génio. Na geraçon de ls sous pais son bários ls bruxedos. L sou pai era pintor i zenhista, de bien medíocre talento. Don José, dedicaba-se a pintar ls palombos que pousában ne ls plátanos de la Plaza de la Merced, acerca de la sue casa[1]. A las bezes, pedie al filho para le acabar ls quadros. La lhinhaige paterna possibelitou-se studar até al anho de 1841[1]. De la decendéncia materna pesquisada, Dona María cuntaba antre ls antepassados cun dous pintores. Las feiçones de Picasso son tamien aparecidas a las de la mai[1].
Ls purmeiros dieç anhos de bida de Pablo son passados an Málaga[1]. L salairo pequeinho de l pai cumo cunserbador de museu i porsor de zeinho na Escuela de San Telmo, a custo asseguraba l sustento de la família. Quando le ouferecírun ua colocaçon cun melhor paga ne l Anstituto Eusébio de la Guarda ne l norte de l paíç, a l'heisitaçon subrepuso-se la necidade, i cula família, don José parte pa la Corunha, capital de porbíncia a la beira de l Ouceano Atlántico[1].
Ls zeinhos d'anfáncia de Picasso repersentában cenas de touradas. Sue purmeira obra, perserbada, era un ólio subre madeira, pintada als uito anhos, ye chamada L Toureiro. Picasso cunserbou esse trabalho to la sue bida, lhebando-lo cun el siempre que mudaba de casa. Anhos mais tarde pintou outro quadro semelhante, La muorte de la mulhier çtacada i fútele. Picasso stá anrabiado i rebelde. Este quadro ye claramente ua spresson anjuriosa de la sue relaçon cula mulhier.
La priocupaçon percipal de l pai cul pequeinho Pablo era l sou aprobeitamiento scolar, mas nin por esso çpensou l'ouportunidade de oumentar l talento de l filho. Zenhar fui zde cedo la forma mais adequada de Picasso se spremir i, talbeç por esso, secundairo.[1]
Recusa claramente l'ansino ousual, i ancarrega-se el própio de la sue formaçon artística[1]. Cun treze anhos, i seguindo l modelo de l pai, Picasso atingira yá la perícia de l pai (que tamien nun era de grande refinamiento). Al cuntrairo de l qu'apuntan alguas lhistas, Picasso era canhoto, cumo se puode ber ne l célebre decumentairo The Mystery of Picasso.
La família trasferiu-se outra beç, desta beç a Barcelona, na Primabera de 1895, i la proba d'admisson na scuola d'arte La Lonja ye feita cun éisito. Ls trabalhos que deberie apersentar a la fin de l més, Pablo apersentaba-los a la fin de poucos dies, al cabo que l sou trabalho se çtacaba, até, de ls finalistas. [1] Cun catorze anhos, Picasso cunseguie passar las eisegéncias dua cunceituada academie d'arte. Trabalhos académicos, que segundo l própio, al cabo de bários anhos l'assustában. Ls trabalhos que fazie colocában nel na série de cunceituados pintores de Barcelona, cumo Santiago Rusiñol i Isidro Nonell, i l sou quadro La Purmeira Quemunhon ye spuosto na célebre sposiçon de la época na cidade. [1] Anque tener scolhido por ua temática relegiosa, este nun deixa de ser un acuntecimiento pribado, de l praino fameliar. Anque rialista i de sastifazer las eisegéncias académicas, por outro lhado l'obra acaba por ser ua tentatiba de cumbate al cumbencionalismo.
Depuis dua stadie an Málaga, an 1897 anstala-se an Madrid.
An Madrid, anstalado nun nuobo atelier, anscrebe-se na mais próspera i cunceituada academie d'artes spanhola, la Rial Academie de Belas-Artes de San Fernando[1]. Custantemente, bejita l Museu de l Prado, adonde copiaba ls grandes mestres, cataba-les l stilo i tentaba eimitá-lo, l que se rebelou, por un lhado, un abanço, pus zambolbie capacidade eifémeras, i por outro lhado, ua stagnaçon dun génio criatibo lhemitado a la cópia de l trabalho de ls stóricos, cujas obras tamien benírun a ser albo dua rebejitaçon i reanterpretaçon de Picasso an fases mais abançadas.
Mas, la sue stadie an Madrid ye anterrompida. Ne l'ampeço de Júlio daquel anho, Picasso adoece cun scarlatina i la recuperaçon oubriga-lo a retornar la Barcelona, recolhendo-se lhougo a seguir cun Manuel Pallarés, sou amigo, pa l'aldé Horta de Ebro ne ls Pirinéus. L recolhimiento ajudou-lo a restablecer nuobos i ambeciosos porjetos que lhebou a cabo assi que regressou la Barcelona. Afastara-se de l'academie i de l lhar paterno, i percuraba abrir-se a las inobaçones de l'arte spanhola, mantendo-se an cuntato culs sous repersentantes mais célebres. L spácio de culta de la banguarda spanhola era l café Els Quatr Gats[1]. Eilhi conheciu ls modernistas i ribalizou cula arte destes, anfluenciada pula Arte Nuoba francesa i pulas banguardas británcias.
An 1900, nas anstalaçones de l mesmo stablecimiento, abre al público la sue purmeira sposiçon. Antretanto, l zeio de coincer Paris oumentaba.[1]
Passado ampeçar cumo studante d'arte an Madrid, Picasso fizo sue purmeira biaige a Paris (1900), la capital artística de la Ouropa. Alhá morou cun Max Jacob (jornalista i poeta), que l'ajudou cula lhéngua francesa. Max drumie de nuite i Picasso durante l die, el questumaba trabalhar a la nuite. Fui un período de strema pobreza, friu i zespero. Muitos de ls sous zeinhos tubírun que ser outelizados cumo material cumbustible pa calecer l quarto.
An 1901 cun Soler, un amigo, atiradeira ua rebista Arte Joben, na cidade de Madrid. L purmeiro númaro ye to eilustrado por el. Fui a partir desta data que Picasso passa a assinar ls sous trabalhos solo cun “Picasso”, antes assinaba “Pablo Ruiz y Picasso”.
Na fase azul (1901 la 1905), Picasso pintou la solidon, la muorte i l'abandono. Quando se apeixonou por Fernande Olivier, sues pinturas mudórun d'azul para rosa, einougurando la fase rosa (1905-1906). Trabalhaba durante la nuite até l nacer de l sol. An Paris, Picasso coinciu un seleto grupo d'amigos célebres ne ls bairros de Montmartre i Montparnasse: André Breton, Guillaume Apollinaire i la scritora Gertrude Stein.
Na fase rosa hai abundáncia de tones de rosa i burmeilho, caratelizada pula persença de acrobatas, beilarinos, arlequines, artistas de circo, l mundo de l circo. Ne l berano de 1906, durante ua stada an Andorra, sue obra antrou nua nuoba fase marcada pula anfluéncia de las artes griegas, eibérica i africana, era l protocubismo, l'antecedente de l cubismo. L célebre retrato de Gertrude Stein (1905-1906) rebela un tratamiento de l rostro an forma de máçcara.
An 1912, Picasso rializou sue purmeira colaige, colou nas telas cachos de jornales, papéles, tecidos, ambalaiges de cigarros.
Apeixonou-se por Olga Koklova, ua beilarina. Casórun-se an 12 de júlio de 1918. Neste período l'artista yá se tornara coincido i era un artista de la sociadade. Quando Olga quedou preinha, criou ua série de pinturas cun filhos.
Antre l'ampeço i la fin de la 2ª Guerra Mundial (1939-1945), dedica-se tamien a la scultura, grabaçon i cerámica. Cumo grabador, domina las dibersas técnicas: auga-fuorte, auga-tinta, punta-seca, lhitograbura i grabura subre lhinólio quelorido. Para alhá desso, sue dedicaçon a l'arte scultórica era rala. Cabeça de Búfalo, Metamorfose ye un grande eisemplo de sou trabalho cun esse meio. Ye cunsidrado un de ls pioneiros an rializar sculturas a partir de junçon de defrentes materiales.
An 1943, Picasso conhece la pintora Françoise Gilot i ten dous filhos, Claude i Paloma i ancuontrou un pouco de paç i pintou Alegrie de Bibir.
An 1968, als 87 anhos, porduziu an siete meses ua série de 347 graburas recuperando ls temas de la mocidade: l circo, las touradas, l triato, las situaçones eiróticas. Anhos mais tarde, ua ouparaçon de la próstata i de la besícula, para alhá de la bison deficiente, pon fin a las sues atebidades. Cumo ua honra special a el, ne l sou 90ª anibersairo, son comemorados cun sposiçon na grande galerie de l Museu de l Louvre. Torna-se assi l purmeiro artista bibo a sponer ls sous trabalhos ne l famoso museu francés. Pablo Picasso morriu-se a 8 d'abril de 1973 an Mougins, Fráncia cun 91 anhos d'eidade.
Diç-se que lhebou to la sue bida a saber pintar cumo ua nino.
Anque spressar publicamente sue simpatie cun relaçon a las eideias anarquistas i quemunistas i, por outro lhado, atrabeç de l'arte spressar sue rábia delantre de las açones de Franco i de ls Fascistas, Picasso recusou-se agarrar an armas na Purmeira Guerra Mundial, na Guerra Cebil Spanhola i na Segunda Guerra Mundial.
Al chegar an Paris an 5 de Maio de 1901 Picasso morou na casa de Pierre Manach un anarquista spanhol i negociador d'artes de l qual era amigo. Por este motibo zde aqueilha época, Picasso serie ambestigado pula polícia francesa[2]. An alguas oucasiones l moço Picasso tenerie até mesmo se outo-chamado anarquista, fato este que lhebantou inda mais suspeitas de las fuorças d'orde contra el[3].
Inda assi, durante la Guerra Cebil Spanhola, Picasso que cuntinaba bibendo na Fráncia mesmo tomando partido pul lhado de ls Republicanos[4], tenerie se recusado a retornar la sou paíç d'ourige. L serbício melitar pa ls spanholes ne l strangeiro era oupcional i ambolberie un retorno beluntairo al paíç para alistamiento a un de ls dous lhados. Hai muitao diç-que-diç a respeito de sue recusa de tomar lhugar na guerra. Na oupenion d'alguns de sous cuntemporáneos esta decison fui tomada baseada ne ls eideales de pacifismo de Picasso; inda assi, para outros (ancluindo eiqui Braque) essa neutralidade aparente tenie mais a ber cun cobardie que cun percípios.
El tamien quedou a la parte de l mobimiento d'andependéncia de la Catalunha durante sue mocidade, anque tener spresso sou apoio giral i tener sido amigable culs atebistas de l'andependéncia. A esta época feliou-se al Partido Quemunista.
Durante la Segunda Guerra Mundial, Picasso permaneciu an Paris quando ls almanes acupórun la cidade. Ls Nazistas nun gustában sou stilo de pintura, antoce el nun pudo amostrar sou trabalho durante aqueilha época. An sou stúdio, el cuntinou a pintar durante to l tiempo. Ambora ls almanes tubíssen proibido la fundiçon de l bronze, Picasso cuntinou a trabalhar mesmo assi, ousando bronze cuntrabandeado pula rejisténcia francesa.
Ne l'anho de 1947, al fin de la Segunda Guerra, Picasso coinciu Miguel García Bibancos, un anarquista beterano de la Guerra Cebil Spanhola i de la Segunda Guerra Mundial i pintor até anton çcoincido. Ampressionado cun Bibancos, Picasso l'acolhiu an sue casa, antressando-se por sue pintura i sue stória. Apuis i, an parte pula anfluéncia de Picasso, Bibancos tornarie-se un grande pintor spanhol.
Inda na década de 1940 Picasso boltou a se feliar al Partido Quemunista francés, i até mesmo partecipou dua cunferéncia de paç na Polónia. Mas quando l Partido ampeçou a criticá-lo por causa dun retrato cunsidrado ansuficientemente rialista de Stálin, l'antresse de Picasso pul Quemunismo arrefeciu, anque tenga quedado cumo nembro de l Partido até a la muorte.
Ua de las obras mais coincidas de Picasso ye l mural Guernica, an sposiçon ne l Museu Nacional Centro de Arte Reina Sofia, an Madrid. Retrata, de la maneira mui peculiar de l'artista, la cidade basca de Guernica, passado bumbardeio puls abiones de la Luftwaffe de Adolf Hitler. Esta grande tela ancorpora para muitos la zoumanidade, brutalidade i zespráncia de la guerra.
Durante la Segunda Guerra Mundial, Picasso cuntinou a bibir an Paris durante l'acupaçon almana. Tenendo fama de simpatizante quemunista, era albo de cuntroles frequentes puls almanes. Durante ua rebista de l sou apartamiento an Paris, un oufecial nazi ouserbou ua retrato de l mural Guernica na parede i, apuntando pa l'eimaige, preguntou-le: Fui l senhor quien fizo esso? I Picasso respundiu, passado un segundo a pensar: Nó, fustes bós.
L'obra de Picasso ye muitas bezes classeficada an períodos: Azul (1901–1904), Rosa (1905–1907), Africano (1908–1909), Cubismo Analítico (1909–1912) i Cubismo Sintético (1912–1919).
Sous purmeiros trabalhos stan ne l Museu Picasso an Barcelona. Percipales obras de l período:
Cunsiste an obras sombrias an tones d'azul i berde azulado, oucasionalmente usando outras quelores. Zenhaba prostitutas i mendigos i sue anfluéncia bieno de biaiges pula Spanha i de l suicídio de sou amigo Carlos Casagemas. El pintou bários retratos de sou amigo, culminando cula pintura ouscuramente alegórica de La Bie. L mesmo ton stá na auga-fuorte The Frugal Repast, que amostra un ciego i ua mulhier perspicaç, dambos magros, sentados acerca dua mesa bazie. La cegueira ye un tema recorrente ne l período i stá tamien an The Blindman's Meal i ne l retrato Celhestrina. Outros temas frequentes son artistas, acrobatas i arlequines. L arlequin tornou-se un simblo pessonal para Picasso.
L Período Rosa (1905–1907) ye caratelizado por un stilo mais alegre culas quelores rosa i lharanja, i outra beç cun muitos arlequines. Muitas de las pinturas son anfluenciadas por Fernande Olivier, sue modelo i sou amor na época.
L Período Africano de Picasso (1907–1909) ampeçou cun dues figuras anspiradas na África an sou quadro Les Demoiselles d'Avignon. Eideias deste período lhebórun al posterior Cubismo.
Ye un stilo de pintura (1909–1912) que Picasso zambolbiu cun Braque usando quelores marrones monocromáticas. Eilhes agarórun oubjetos i ls analisórun an sues formas. La pinturas de Picasso i Braque éran mui semelhantes nesse período.
Ye un zambolbimiento posterior (1912–1919) de l Cubismo ne l qual cachos de papel (papel de parede ó jornales) éran colados an cumposiçones, marcado l purmeiro uso de la colaige nas artes plásticas.
Ne l período seguinte al caos de la purmeira guerra mundial Picasso porduziu obras nun stilo neoclássico. Este "retorno a l'orde" ye eibidente ne l trabalho de bários artistas ouropeus na década de 20, ancluindo Derain, Giorgio de Chirico, i ls artistas de l New Oubjetebity Mobement. Las pinturas i testos de Picasso deste período frequentemente citan l trabalho de Angres.
Durante ls anhos 30, l minotauro sustituiu l'arlequin cumo motibaçon qu'el uosou an sou trabalho. Sou uso de l minotauro bieno an parte de sou cuntato culs surrealistas, que normalmente l'usában cumo simblo, i aparece an Guernica de Picasso.
Possiblemente l trabalho mais amportante de Picasso ye sue bison de l bumbardeamiento alman an Guernica, Spanha — Guernica. Esta pintura repersenta para muitos la brutalidade i zesperança de la guerra. Guernica staba an sposiçon ne l museu d'arte moderna de Nuoba Iorque por bários anhos. An 1981 Guernica boltou pa Spanha i fui eisibida ne l Casón del Buen Retiro. An 1992 la pintura quedou an sposiçon ne l museu de Reina Sofia an Madrid quando el abriu.
Ne l die 20 de dezembre de 2007, por buolta de las 5:00 horas de la manhana, trés homes ambadírun l Museu de Arte de San Paulo (MASP), lhebando dous quadros cunsidrados de ls mais amportantes de l cunjunto: L lhabrador de café de Cándido Portinari i Retrato de Suzanne Bloch de Pablo Picasso. L tiempo pa l roubo de las dues obras d'artes durou trés minutos.[5] L quadro fui recuperado die 8 de janeiro de 2008 an Ferraz de Vasconcelos, Region Metropolitana de San Paulo, antata. Dous homes fúrun presos.[6]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.